«ەكى جۇلدىزدا» رەترو اندەر اۋەلەدى

قوستانايدا ءبىرىنشى رەت «ەكى جۇلدىز» مۋزىكالىق فەستيۆالى ءوتتى. وعان 16 جۇپ ءانشى قاتىستى. بۇل وبلىستىق ارداگەرلەر كەڭەسىنىڭ 30 جىلدىق تويىنا ارنالعان شارالاردىڭ ءبىرى بولاتىن. وبلىستىق ارداگەرلەر كەڭەسىنىڭ توراعاسى كەنجەبەك ۇكين بۇل جوبانى وسىدان ءۇش جىل بۇرىن رۋدنىيلىقتار باستاعانىن ايتادى. الدىمەن وعان قاتىسۋعا تىلەك بىلدىرگەندەر ەكى-ۇشەۋدەن اسپاپتى, كەيىن ولاردىڭ قاتارى كوبەيە تۇسكەن. – رۋدنىي قالاسىنىڭ باستاماسىن ءبىز دە قولداپ, قوستاناي قالالىق اكىم­دىگىنىڭ كومەگىمەن فەستي­ۆالدى بىرىگىپ وتكىزدىك, – دەيدى كەنجەبەك ۇكى ۇلى. فەستيۆال شارتى بو­يىن­شا ساحناعا شىعاتىن قوس ءانشىنىڭ ءبىرى ارداگەر, ەكىنشىسى جاس ءانشى بولدى. جانە ولار ورىندايتىن شىعارمالار كەڭ تاراعان رەترو نەمەسە حالىق اندەرى بولۋى كەرەك دەگەن تالاپ قويىلدى. مىسالى, رۋدنىيلىق ارداگەر جاقسىلىق كاكەنوۆ پەن مەكتەپ وقۋشىسى ءابىلحايىر قانافين ورىنداعان «نادو منوي نەبو سينەە» ءانى وتكەن عاسىردىڭ 50-ءشى جىلدارى «سۇيىكتى ءبىزدىڭ دارىگەر» ءفيلمى ارقىلى حالىق اراسىنا كەڭ جايىلعان ەدى. ءار جۇپ زالدى ءوز ەرەكشەلىگىمەن قۋانتتى. وسى فەستيۆالدا ءان شىرقاعان ونەرپازدىڭ بارلىعى دەرلىك وبلىستا كەڭ ءورىس العان ارداگەرلەر حورىنا قاتىسادى. بەلگىلى مۋزىكا ماماندارى جەتەكشىلىك ەتەتىن حورلاردا ارداگەرلەر ءان ايتۋ ونەرىن كادىمگىدەي مەڭگەرىپ الادى. سوندىقتان, ساحناعا شىق­قان جۇپتاردىڭ بارلىعى دا كورەرمەندەر كوڭىلىنەن شىعىپ وتىردى. – اتتەڭ, اككوردەون بولمادى, بۇدان دا جاندىرىپ جىبەرەر ەدىك, – دەپ الاقانىن ىسىپ قويادى انىمەن كورەرمەندەردى جەلپىنتىپ تاستاعان زەينەتكەر يۆان ەرمانوۆ. بايگەدە «باپ شابا ما, باق شابا ما؟» دەگەن عوي. قازىلار القاسى باس جۇلدەنى ۋكراين حالقىنىڭ «دۆا كولەرا» ءانىن قۇيقىلجىتا ورىنداعان ليۋبوۆ فرولوۆا مەن ۆلاديمير الەكسانينگە لايىق دەپ شەشتى. ءبىرىنشى ورىندى «سچاستيا تەبە, زەمليا» ءانىن ايتقان سۆەتلانا وبۋحوۆا مەن ءامينا جۇماعاليەۆاعا بەردى. ەكىنشى ورىندى جەڭىس قوجاحمەتوۆ پەن مۇرات شاحمانوۆ, ءۇشىنشى ورىندى بيبىگۇل ىبىراەۆا مەن ءانۋار قاسقاباسوۆ ءبولىستى. ءنازيرا جارىمبەتوۆا, «ەگەمەن قازاقستان» قوستاناي