سولتۇستىكتە ساكۋرا گۇلدەپ تۇر

پەتروپاۆل بوتانيكالىق باعىندا تروپيكالىق, سۋبتروپيكالىق وسىمدىكتەر مەن جەمىس اعاشتارىنىڭ 400-گە جۋىق ءتۇرى جەرسىن­دىرىلگەن. ولاردىڭ اراسىندا پالما, پاپوروتنيك, كيپاريس, ماگنوليا, لاۆر, بانساي, تۋيا, اگاۆا, يۋككي سىندى اعاشتار كەزدەسەدى. ال ساكۋرانىڭ مۇندا ور­نى­عۋىنىڭ ءوزىندىڭ تاريحى بار. ورانجەرەيانىڭ نەگىزىن قالاۋ­شىلاردىڭ ءبىرى, قازاق­ستاننىڭ ەڭبەك سىڭىرگەن اگرونومى راۆيل ريازاپوۆ 1965 جىلى تىڭ جانە تىڭايعان جەرلەردى يگەرۋدىڭ ون جىلدىعىنا وراي دەلەگا­تسيانىڭ قۇرامىندا ماسكەۋگە بارادى. بۇكىلوداقتىق حالىق شارۋا­شىلىعى كورمەسىندە دەكوراتيۆتى اعاشتار سەمينارى ۇيىمداستىرىلىپ, جاپو­نيا ەلشىسىنىڭ ايەلى وعان دەلەگا­تسيانىڭ ەڭ جاس مۇشەسى رەتىندە ساكۋرا اعاشىن سىيلايدى. – جاپوندار ورىك, شيە, القورى سەكىلدى جەمىس اعاشتارىن ساكۋراعا جاتقىزادى. مۇنداي ەرگەجەيلى اعاشتار جيىنتىعىن بانساي دەپ تە اتايدى. شىعىس كۇنتىزبەسى بويىنشا 13-14 اقپان كۇندەرى جاپوندار جاڭا جىلدى تويلايدى. جاراتقاننىڭ قۇدىرەتتىلىگىن كورمەيمىسىڭ, وسى كەزدەرى تەرىس­كەيدىڭ قاتال كليماتىندا ءوسىپ تۇرعان ساكۋرا دا گۇل جارادى. وسى­دان بىرنەشە جىل بۇرىن قاتتى داۋىلدىڭ سالدارىنان عيما­راتتىڭ شاتىرى ج ۇلىنىپ, ساكۋرانىڭ ۇسىككە شالىنعانى بار. بىراق, جاس بۇتالارىن ساقتاپ قالدىق, – دەيدى باعبانشى. ساكۋرانىڭ گۇلدەۋ ارالىعىن جاپوندار «حانامي», ياعني «گۇلگە قاراۋ» دەپ اتايدى. سوندىقتان, جان-جاقتى دايىندىق شارالارى جاسالدى. قازىر قىزىقتاۋشىلار قاتارى قالىڭ. جاسىل وسىمدىكتەردىڭ ادام سەنبەس تىلسىم سىرلارى تولىپ جاتىر-اۋ! ماسەلەن, اگاۆا گۇل­دەسە, ءومىرى ۇزاققا بارمايتىن قاسيەتى بار ەكەن. ال ماگنوليانىڭ گۇلدەۋى وتە سيرەك. ءبۇر جارسا, حوش ءيىسى تاناۋ قىتىق­تايدى. قۇرما اعاشىنىڭ «كوڭىل كۇيى» كەلىسسە, ءبىر-ەكى ايدا وسكىن پايدا بولاتىن كورىنەدى. ايتپەسە, جىلداپ «ءۇن-ءتۇنسىز» جاتىپ الۋى ىقتيمال. وسىدان ەكى جىل بۇرىن ارابيادان اكەلىنگەن قۇرمانىڭ داندەرى ەگىلىپ, بۇگىندە الىپ داراققا اينالعان پالما بىردە اياقاستى «ءتىرىلىپ», جىلدام وسە باستاپ, ءتىپتى جىلىجايدىڭ اينەكتەلگەن توبەسىن تەسىپ شى­عىپتى. سودان ءۇش مەترگە دەيىن قىسقارتۋعا تۋرا كەلگەن. ءومىر ەسقالي, «ەگەمەن قازاقستان» سولتۇستىك قازاقستان وبلىسى