كەشە ەلوردادا قازاقستان حالقى اسسامبلەياسىنىڭ دوستىق ۇيلەرى مەن وڭىرلەردەگى «قوعامدىق كەلىسىم» كەڭەستەرىنىڭ ديرەكتورلارىنا ارنالعان رەسپۋبليكالىق كەڭەس ءوتتى.
كەڭەس بارىسىندا ەلباسىنىڭ قازاقستان حالقىنا ارناعان جولداۋى كەڭىنەن تالقىلاندى, سونداي-اق ەكسپو-2017 حالىقارالىق كورمەسىنە اتسالىسۋعا دايىندىق جۇمىستارى قاراستىرىلدى. بۇعان قوسا, جەر-جەردەگى مەكەمەلەردىڭ باسشىلارى ءوز وڭىرلەرىندە اتقارىلىپ جاتقان جۇمىستاردىڭ جاي-كۇيى تۋرالى باياندادى.
جيىندا ءسوز العان قازاقستان حالقى اسسامبلەياسى حاتشىلىعىنىڭ سەكتور مەڭگەرۋشىسى ازات جولدىباەۆ ەلباسى جولداۋىن جانە بيلىك تارماقتارى اراسىندا وكىلەتتىكتەردى قايتا ءبولۋ ءماسەلەلەرى ءجونىندەگى ۇندەۋىن حالىققا ءتۇسىندىرۋدە دوستىق ءۇيلەرى مەن «قوعامدىق كەلىسىم» كەڭەستەرىنە ۇلكەن مىندەت جۇكتەلەتىنىنە توقتالدى.
– ءبىز وسى ايدان باستاپ ناۋرىزدىڭ 5-نە دەيىن الماتىداعى دوستىق ءۇيىنىڭ بازاسىندا رەسپۋبليكالىق 18 شارا ءوتكىزۋدى جوسپارلاپ وتىرمىز. ونىڭ 14-ءىن تىكەلەي ەتنومادەني ءبىرلەستىكتەر جۇرگىزەدى. ءبىر شارا عىلىمي-ساراپشىلىق توپتاردىڭ قاتىسۋىمەن, ادىستەمەلىك باعىتتا وتەدى. جالپى, جۇمىس فورماتى دوڭگەلەك ۇستەل, سەمينار تۇرىندە بولۋعا ءتيىس. ءدال وسىنداي جۇمىستار ەلىمىزدىڭ بارلىق وڭىرىندە جۇرگىزىلۋى كەرەك, – دەدى ازات جولدىباەۆ.
ونىڭ ايتۋىنشا, شارالاردىڭ مىندەتتى تۇردە رەسپۋبليكالىق اۋقىمدا بولۋى شارت ەمەس. ولاردىڭ قاي-قايسىسى دا ماڭىزدى. سەبەبى, قازاقستان حالقى اسسامبلەياسىنىڭ رەسۋرستارىن ءتيىمدى پايدالانىپ, جولداۋدىڭ, كونستيتۋتسيالىق رەفورمانىڭ ءمانىن ءاربىر ازاماتقا جەتكىزۋ كەرەك, ەڭ ماڭىزدىسى وسى.
وڭىرلەردەگى دوستىق ۇيلەرى جەرگىلىكتى حالىقتىڭ اياعى ءۇزىلمەيتىن, تىرشىلىك قىز-قىز قايناپ جاتقان مەكەمە بولۋى كەرەك. «قوعامدىق كەلىسىم» رەسپۋبليكالىق مەملەكەتتىك مەكەمەسى توراعاسىنىڭ ورىنباسارى تالعات جاقيانوۆ وسىنداي وي ايتتى.
– جاقىندا وڭتۇستىك قازاقستان وبلىسىندا ەلىمىزدەگى ەڭ ۇلكەن دوستىق ءۇيى قۇرىلعالى جاتىر. وسىنداي دوستىق ۇيلەرى بارلىق وبلىستاردا بار. وكىنىشكە قاراي, ءوڭىرلەردى ارالاپ جۇرگەنىمىزدە كەيبىر دوستىق ۇيلەرىنىڭ قاڭىراپ بوس تۇرعانىن كورەمىز. نەگىزى, ول مەكەمەلەردە ءتۇرلى شارالار ۇزدىكسىز ءوتىپ جاتۋى ءتيىس. دوستىق ۇيىندە كىرىپ-شىعىپ جاتقان ادامدار, ءتۇرلى ۇيىمدارعا كەلگەن جاستار, ءمادەني شارالاردى تاماشالاۋعا كەلگەن جاندار كوپ بولۋى كەرەك. ءبىز بۇگىن ەلورداعا جينالعان قاۋىممەن بىرلەسىپ, وسىعان قاتىستى ۇسىنىستاردى قاراستىرعانىمىز ءجون, – دەدى تالعات جاقيانوۆ.
كەڭەسكە قاتىسۋشىلار مەملەكەت باسشىسىنىڭ قازاقستان حالقىنا ارناعان جولداۋىنىڭ, ۇسىنىلعان كونستيتۋتسيالىق رەفورمانىڭ قانشالىقتى زور ماڭىزعا يە ەكەنىن حالىققا ءتۇسىندىرۋ جولدارىن ۇيىمداستىرۋ تۋرالى ءوزارا وي ءبولىستى. بۇدان بولەك, ەكسپو-2017 حالىقارالىق كورمەسىنە اتسالىسۋعا ازىرلىك بارىسى دا ءسوز بولدى. سونىمەن قاتار, جيىندا دوستىق ۇيلەرىن دامىتۋدىڭ 2017-2020 جىلدارعا ارنالعان تۇجىرىمداماسىن ىسكە اسىرۋ بويىنشا ءىس-شارالار جوسپارى ورتاعا سالىندى.
ارنۇر اسقار, «ەگەمەن قازاقستان»
سۋرەتتى تۇسىرگەن
ەرلان وماروۆ,
«ەگەمەن قازاقستان»
