16 اقپاندا ەلوردا اكىمى حالىققا ەسەپ بەرەدى

2017 جىلدىڭ 16 اقپانىندا تاڭعى ساعات 10.00-دە «استانا» كونتسەرت زالىنىڭ عيماراتىندا (بۇرىنعى كونگرەسس-حولل) استانا قالاسىنىڭ اكىمى اسەت يسەكەشەۆتىڭ ەلوردا حالقىمەن ءداستۇرلى ەسەپ بەرۋ كەزدەسۋى وتەدى, دەپ حابارلادى ەلوردا اكىمدىگىنىڭ ءباسپاسوز قىزمەتى. شارا استانا قالاسى اكىمدىگىنىڭ Facebook جەلىسىندەگى رەسمي اككاۋنتتارىندا ونلاين-رەجيمدە كورسەتىلەدى. سونداي-اق, بارىنشا كوپ حالىقتى قامتۋ ماقساتىندا ل. ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ (ق. مۇڭايتپاسوۆ ك-ءسى, 5) جانە س. سەيفۋللين ات. قازاق اگروتەحنيكالىق ۋنيۆەرسيتەتىنىڭ (جەڭىس داڭع., 62) عيماراتتارىندا تىكەلەي قوسىلۋلار ۇيىمداستىرىلادى. سونداي-اق, 16 اقپاندا «استانا» كونتسەرت زالىندا «بەلسەندى ازامات-2017» اكتسياسىنىڭ شەڭبەرىندە اشىق ەسىك كۇنى وتەدى, شارا حالىقپەن كەرى بايلانىستى ءتيىمدى ورناتۋعا باعىتتالادى. ونىڭ بارىسىندا نيەت بىلدىرگەن ءار ازامات ءوزىن قىزىقتىرعان ساۋالىن قويىپ, قالالىق باسقارمالار مەن قىزمەتتەردىڭ باسشىلارىنان تياناقتى جاۋاپ الا الادى.