ماكسيموۆيچ: «استاناعا» بەرگەن ۋادەمدى ورىندادىم

«استانا» فۋتبول كلۋبىنىڭ جارتىلاي قورعاۋشىسى نەمانيا ماكسيموۆيچ ەلوردالىقتاردىڭ ساپىنا قايتا قوسىلعاننان كەيىن پىكىر ءبىلدىردى. بۇل تۋرالى vesti.kz حابارلادى. سەربيالىق فۋتبولشى قاڭتار ايىندا «ۆالەنسيا» كومانداسىمەن كەلىسسوزدەر جۇرگىزگەندىكتەن, «استانانىڭ» دۋبايداعى وقۋ-جاتتىعۋ جيىنىنا قاتىسا الماعان. دەگەنمەن, تۇركياداعى جاتتىعۋعا قوسىلعان بولاتىن. ەلوردالىق كلۋبپەن وسى قىستا ترانسفەر ماسەلەسى جونىندە كەلىسسوزدەر وتكەن. الايدا, «جارقاناتتار» 300 مىڭ ەۋرو تولەۋدەن باس تارتقاندىقتان, ماكسيموۆيچ يسپانياعا ەركىن اگەنت رەتىندە كەتەدى. «كوماندامەن ەشقانداي تۇسىنبەۋشىلىك بولعان جوق. ۋادەم ورىندالدى. جازعا دەيىن استانادا قالامىن. دەڭگەيىمدى تومەندەتىپ الماۋ قازىرگى باستا ماقساتىم. ونىڭ ۇستىنە ۇلتتىق قۇرامانىڭ ماتچتارىمەن قاتار, جاستار اراسىنداعى ەۋروپا چەمپيوناتى دا كەلە جاتىر», – دەدى ماكسيموۆيچ. قازىرگى ۋاقىتتا ول «ۆالەنسيامەن» الدىن الا بەسجىلدىق كەلىسىمگە كەلگەن. وسى ۋاقىت ارالىعىندا سەرب ويىنشىسى 7 ميلليون ەۋرو جالاقى الادى. ەلوردالىقتاردىڭ ساپىندا 2015 جىلدىڭ اقپان ايىنان بەرى ونەر كورسەتىپ كەلەدى. وسى ۋاقىت ارالىعىندا ەكى دۇركىن ەل چەمپيونى اتانىپ, ءبىر مارتە قازاقستان كۋبوگىندا جەڭىسكە جەتكەن. پرەمەر-ليگادا 54 ويىنعا قاتىسىپ, 9 گولدىڭ جانە 6 ناتيجەلى پاستىڭ اۆتورىن اتانعان.