سوڭعى ءۇش-ءتورت جىلدان بەرى ەلىمىزدەگى «112» قۇتقارۋ قىزمەتى حالىقارالىق 911 جەدەل بايلانىسى سياقتى تۇرعىنداردىڭ اپاتتى جاعدايدا حابارلاساتىن بىردەن ءبىر بايلانىس ورتالىعىنا اينالدى. بۇل بىرىڭعاي كەزەكشىلىك-ديسپەتچەرلىك قىزمەتكە 2016 جىلى رەسپۋبليكا بويىنشا 5 ميلليوننان اسا قوڭىراۋ تۇسكەن.
استانا قالاسىنداعى توتەنشە جاعدايلار دەپارتامەنتىنىڭ بىرىڭعاي كەزەكشىلىك ديسپەتچەرلىك قىزمەتى مەكەمەسىنىڭ باستىعى, ازاماتتىق قورعاۋ پولكوۆنيگى بولاتبەك ءامريننىڭ ايتۋىنشا, ەلوردا بويىنشا بىلتىر اتالعان جەلى 520 مىڭنان استام, ياعني, ورتا ەسەپپەن كۇنىنە 1500-دەي قوڭىراۋ قابىلداعان.
«كوبىنە اتا-انالار مەن مەكتەپ وقۋشىلارى ساباقتى كەيىنگە قالدىرعانى جونىندە ءبىلۋ ءۇشىن حابارلاسادى. سوسىن تراسسالاردى جابامىز, سول تۋرالى دا جۇرتشىلىق مالىمەت سۇراپ جاتادى», دەيدى بولاتبەك امرين. ونىڭ ايتۋىنشا, جول جابىلعان كۇندەرى كەيدە قوڭىراۋلار سانى 7000-عا دەيىن جەتەدى ەكەن.
وسى رەتتە ءبىر ايتا كەتەرلىگى, بۇل قىزمەت قالالىق اكىمشىلىككە قاراستى 109 بايلانىسىمەن دە بىرلەسىپ جۇمىس ىستەيدى. ال 2015 جىلدىڭ 30 جەلتوقسانىنان باستاپ ابونەنتتەرگە اۋا رايى تۋرالى «سمس» حابارلامالار جىبەرىلەدى.
«اۋا رايى تۋرالى اقپاراتتى «قازگيدرومەتتەن» رمك الامىز. كۇشتى داۋىل تۋرالى ەسكەرتۋ كەلسە تەلەارنالارعا, ۇيالى بايلانىس وپەراتورلارىنا, باق-نا جونەلتە باستايمىز», – دەيدى ب.باحمان ۇلى.
جالپى, ديسپەتچەرلىك ورتالىققا كەلىپ تۇسكەن حابار 15-20 مينۋتتىڭ ىشىندە تاراتىلىپ ۇلگەرەدى. الايدا كەيبىر بايلانىس وپەراتورلارى «سمس»-ءتى 2-3 ساعات كەشىكتىرىپ جاتاتىنى دا بار.
112 تەگىن – انىقتامالىق ەمەس
جوعارىدا اتاپ وتكەن 5 ملن قوڭىراۋدىڭ 500 مىڭنان استامى بىلتىر قۇتقارۋ بولىمشەلەرىن, 87 مىڭى – ءورت ءسوندىرۋشى-قۇتقارۋشى بولىمشەلەرىن شاقىرتقان. سونىمەن قاتار 408 مىڭى – قوعامدىق ءتارتىپتى قورعاۋ, 344 مىڭى – مەديتسينالىق جاردەم بويىنشا حابارلاسقان. دەسە دە, 112 قىزمەتىن انىقتامالىقپەن, پوليتسيا, جەدەل جاردەم نەمەسە باسقا دا قىزمەت تۇرلەرىمەن شاتاستىراتىندار ءالى دە كوپ ەكەن. جاسىراتىنى جوق, كەيبىر ازاماتتار اقىلى بايلانىستان قاشىپ, تەگىن انىقتاما قىزمەتىن پايدالانعىسى كەلەدى. سالا ماماندارىنىڭ ايتۋىنشا, كەيدە «112» قىزمەتىنە «قانشا بالانسىم قالدى» دەپ تە حابارلاساتىندار بار ەكەن. ويتكەنى, 911 سانىن جۇلدىزشاسىز جانە توركوزسىز جىلدام تەرىپ باسىپ قالسا, جەلى اۆتوماتتى تۇردە 112-گە كەلىپ قوسىلادى. «حالىقتىڭ ساۋاتى ءالى دە تومەندەۋ. سوندىقتان, «112» قىزمەتىن وزگە جەدەل بايلانىستارمەن شاتاستىرماي ورىندى پايدالانۋ قاجەتتىگىن ەسكەرتكىمىز كەلەدى. ونىڭ ۇستىنە, ساباقتىڭ بولمايتىنى تۋرالى اقپاردى اتا-انالار بىزدەن ەمەس, ءبىلىم باسقارماسىنان, ال تراسسالاردىڭ جابىق ەكەندىگىن جەرگىلىكتى پوليتسيا قىزمەتىنەن سۇراعاندارى دۇرىس. ويتكەنى, ءبىزدىڭ قۇزىرىمىزعا تەك اقپاراتتاندىرۋ قىزمەتى كىرەدى», دەيدى ماماندار. ءوز جۇمىسىن 2013 جىلدىڭ مامىر ايىنان باستاعان ديسپەتچەرلىك ورتالىقتا قازىرگى تاڭدا 14 ادام جۇمىس ىستەيدى. ماماندار بۇل ازدىق ەتەدى دەپ وتىر. «ءمينيستردىڭ بۇيرىعى بويىنشا 100 مىڭ ادامعا 1 وپەراتوردان بولۋ كەرەكتىگى ايتىلعان. بۇگىندە ەلوردامىزدا 800 000 ادام بار دەپ ەسەپتەسەك, دەمەك 8 وپەراتور قاجەت», دەيدى باسقارما باسشىسى. ونىڭ ايتۋىنشا, قازىر مۇندا تاۋلىگىنە 3 وپەراتور جۇمىس ىستەۋدە. جانسايا سىدىقباي, سۋرەتتەردى تۇسىرگەن قانات كولباەۆ
