جاناتتىڭ جەڭىسىنەن كەيىن قازاقستان ۇزدىك بەستىككە كىردى

قازاقستاندىق جانات جاقيانوۆ (27-1, 18 كو) جەڭىل سالماقتا WBA (Super) جانە IBO تۇجىرىمدارى بويىنشا الەم چەمپيونى اتانعاننان كەيىن قازاقستان كاسىپقوي بوكستا چەمپيوندىق تيتۋلدارى بار ۇزدىك بەس ەلدىڭ قاتارىنا كىردى. بۇل تۋرالى vesti.kz حابارلادى. بىرنەشە كۇن بۇرىن جاقيانوۆ اقش-تىڭ وگايو شتاتىنداعى تولەدو قالاسىندا امەريكالىق روۋشي ۋوررەنمەن (14-2, 4 كو) جۇدىرىقتاسىپ, تورەشىلەردىڭ شەشىمىمەن جەڭىسكە جەتكەن بولاتىن. وسىدان كەيىن ول ەكى بىردەي بەلبەۋدىڭ يەگەرى اتاندى. جاناتتىڭ جەڭىسىنىڭ ارقاسىندا قازاقستاننىڭ دا كورسەتكىشى جاقساردى. ەندى جەرلەستەرىمىزدىڭ ەنشىسىندە ءتورت چەمپيوندىق بەلبەۋ بار. ونىڭ ۇشەۋى ورتا سالماقتا جۇدىرىقتاساتىن گەننادي گولوۆكينگە تيەسىلى (WBA (Super), WBC جانە IBF). سونداي-اق, ەكۋىندە دە IBO تيتۋلدارى بار. بىراق ول اسا ماڭىزدى بولىپ ەسەپتەلمەيدى. وسى كورسەتكىش بويىنشا قازاقستان بەسىنشى ورىنعا فيليپپين ەلىمەن بىرگە ورنالاستى. بۇل ءتىزىمدى اقش (12 تيتۋل) باستاپ كەلەدى. ەكىنشى ورىندا – ۇلىبريتانيا (9), ۇشتىكتى جاپونيا (8) تۇيىندەپ تۇر. ءتورتىنشى ورىنعا مەكسيكا (7) تۇراقتادى. سونىمەن قاتار, جانات ەلىمىزدىڭ قازىرگى چەمپيون بوكسشىلارىنىڭ دا ستاتيستيكاسىن جاڭارتۋىنا سەپتىگىن تيگىزدى. ەكى چەمپيونى بار (گولوۆكين مەن جاقيانوۆ) قازاقستان التىنشى ورىنعا كوتەرىلدى. مۇنداي كورسەتكىشكە رەسەي, كۋبا, تايلاند جانە ۋكراينا ەلدەرى دە يە. بۇل تىزىمدە ءبىرىنشى ورىندا تاعى دا اقش (12) كەلەدى. ەكىنشى – ۇلىبريتانيا (9), ءۇشىنشى – جاپونيا (8), ءتورتىنشى – مەكسيكا (7), بەسىنشى – فيليپپين (4). ايتا كەتەيىك, 33 جاستاعى جاقيانوۆ ەلىمىزدىڭ اتىنان شىققان ۆاسيلي جيروۆ, بەيبىت شۇمەنوۆ جانە گەننادي گولوۆكيننەن كەيىن ءتورتىنشى بولىپ چەمپيون اتانىپ وتىر.