ادامي كاپيتال – نەگىزگى باسىمدىق

اتالمىش وقۋ ورنىنىڭ رەكتورى ايمان مۇساقوجاەۆا ەلباسىنىڭ جۋىردا عانا قازاقستان حالقىنا ارناعان جولداۋىنىڭ باسىمدىقتارىن ستۋدەنتتەر قاۋىمىنا كەڭىنەن ءتۇسىندىرىپ, نەگىزگى باسىمدىقتاردى قايتادان وي ەلەگىنەن وتكىزدى. بيىلعى جولداۋداعى نەگىزگى التى باسىمدىقتىڭ ءبىرى – ادامي كاپيتال ساپاسىن جاقسارتۋ ەكەنى بەلگىلى. مۇندا, ەڭ الدىمەن, ءبىلىم بەرۋ جۇيەسىنىڭ ءرولى وزگەرۋگە ءتيىس ەكەندىگى ايتىلعان. وسىعان بايلانىس­تى وقىتۋ باعدارلامالارىن سىني ويلاۋ قابىلەتىن جانە ءوز بەتىمەن ىزدەنۋ داعدىلارىن دامىتۋعا باعىتتاۋ قاجەتتىگى كورسەتىلگەن. قازاق, ورىس, اعىلشىن تىلدەرىن وقۋعا كەزەڭ-كەزەڭمەن كوشۋ ماسەلەسى بويىنشا ۇكىمەتكە ۇسىنىستار ازىرلەۋ قاجەتتىگى باياندالعان. «2019 جىلدان باستاپ 10-11 سىنىپتاردا كەيبىر پاندەردى اعىلشىن تىلىندە وقىتاتىن بولامىز. بۇل ماسەلەنى تياناقتى ويلانىپ, اقىلمەن شەشۋ قاجەت» – دەلىنگەن جولداۋدا. ايمان مۇساقوجاەۆا وسى ماسە­لە­لەرگە قاتىستى ءوز كوزقاراسىن تومەن­دەگىشە ءبىلدىردى: – ەلباسى جولداۋىندا ءۇش ءتىلدى مەڭگەرۋ تۋرالى ايتىلعان. ارينە, ءبىز, ەڭ الدىمەن, ءوز انا تىلىمىزگە باسىمدىق بەرۋىمىز قاجەت. ال, اعىلشىن ءتىلىن ۇيرەنۋ – قازىرگى ۋاقىتتىڭ تالابى. اسىرەسە, ءبىز, شەت ەلدەردە وتەتىن بايقاۋلارعا, فەستيۆالدارعا قاتىسىپ جاتامىز. سول ەلدەردەگى مۋزىكا ماماندارىمەن قارىم-قاتىناس جاساۋ ءۇشىن, سۇحبات بەرۋ ءۇشىن ءبىز اعىلشىن ءتىلىن ۇيرەنۋىمىز كەرەك. قاراپايىم عانا ءبىر مىسال, كوپتەگەن بايقاۋلاردىڭ جەڭىمپازى اتانعان نەبىر تالانتتى بالالاردىڭ ءوزى اعىلشىن ءتىلىن بىلمەگەنى سەبەپتى ماگيستراتۋراعا دا تۇسە الماي قالىپ جاتادى. سول ءۇشىن ءبىز بۇل ماسەلەگە جاي قاراماۋىمىز كەرەك. كەلەسى كەزەكتە ءسوز العان مەملەكەت جانە قوعام قايراتكەرى, عالىم, ۋنيۆەرسيتەتتەگى قورقىت اتا اتىنداعى عىلىمي-زەرتتەۋ ينستيتۋتىنىڭ ديرەكتورى مىرزاتاي جولداسبەكوۆ ەلىمىز تاۋەلسىزدىك العاننان بەرگى جىلداردا جاسالعان جولداۋلار جايلى ايتا كەلىپ, بۇل جولعى قۇجاتتىڭ ەرەكشەلىگى – ءۇشىنشى جاڭعىرۋدى ماقسات ەتۋىندە دەدى. الدىڭعى ەكى جاڭعىرۋعا دا توقتالىپ ءوتتى. بەلگىلى عالىم ەلىمىزدىڭ ءبىرىنشى جاڭعىرۋى الەم كارتاسىندا بولماعان جاڭا مەملەكەتتىڭ قۇرىلۋىمەن بايلانىستى دەگەن ەلباسى ءسوزىن كەلتىردى. سونداي-اق, ەكىنشى جاڭعىرۋ «قازاقستان-2030» ستراتەگياسىنىڭ قابىلدانۋىمەن, استانانىڭ سالىنۋىمەن باستالعانىن ايتتى. «ەلىمىز ءۇشىنشى جاڭعىرۋعا قادام باسىپ وتىر. ءۇشىنشى جاڭعىرۋ قالاي ىسكە اسىرىلادى. كونستيتۋتسياعا رەفورما جاساۋ ارقىلى ءبىز كوپ نارسەنى وزگەرتەمىز. قاراپ وتىرسام, 1995 جىلى اتا زاڭىمىز قابىلدانعالى بەرى وسى ۋاقىتقا دەيىن وعان 59 رەت وزگەرىس ەنگىزىلدى. وسى جولى كونستيتۋتسياعا 18 وزگەرىس ەنگىزىلمەك. سونداي-اق, ەلباسى 40-قا جۋىق وكىلەتتىگىن وكىلەتتى اتقارۋشى ورگاندارعا بەرمەك. بۇل ارقىلى ولارعا ۇلكەن جاۋاپكەرشىلىك جۇكتەلەدى» – دەدى م.جولداسبەكوۆ. جالپى, ۋنيۆەرسيتەتتەگى جول­داۋ­دى تالقىلاۋعا ارنالعان جيىن ءوز دەڭگەيىندە ءوتتى. تالقىلاۋ, پىكىر ايتۋدان ۋنيۆەرسيتەت وقىتۋشىلارى مەن ستۋدەنتتەر دە سىرت قالمادى. ولار دا جولداۋداعى ناقتى ءبىلىم-عىلىمعا قاتىستى ءتورتىنشى باسىمدىقتىڭ ەرەكشەلىكتەرى, ءمان-ماڭىزى تۋرالى ءوز ويلارىن ورتاعا سالدى. ايگۇل سەيىلوۆا, «ەگەمەن قازاقستان»