پودوبەدوۆا – جىل سپورتشىسى

جاقىندا الماتىدا تۋريزم جانە سپورت مينيسترلىگىنىڭ ۇيىمداستىرۋىمەن وتكەن سپورتشىلار كەشىندە اۋىر اتلەت سۆەتلانا پودوبەدوۆا وتكەن جىلدىڭ ەڭ ۇزدىك سپورتشىسى اتاعىنا يە بولدى. «جىل ۇزدىگى» اتانعان پودوبەدوۆا وتكەن جىلى 2009 جىلعى الەم چەمپيونى اتاعىن تاعى جە­ڭىپ الدى. سونىمەن بىرگە ول تۇر­كيا­نىڭ انتاليا قالاسىندا وتكەن الەم چەمپيوناتىندا دۇنيە­جۇ­زى­لىك رەكوردقا ءۇش رەت وزگەرىس ەنگىز­دى. پودوبەدوۆانىڭ وسىنداي ەرلىكتەرىن ەسكەرگەن حالىقارالىق اۋىر اتلەتيكا فەدەراتسياسى ونى جىل­دىڭ «ەڭ ۇزدىك زىلتەمىرشىسى» دەپ تانىدى. ەندى مىنە, سۆەت­لا­نانىڭ وسى جەتىستىكتەرى ەلىمىزدە دە ەسكەرىلىپ, وعان 2010 جىلدىڭ «ەڭ ۇزدىك سپورتشىسى» اتاعى بەرىلىپ وتىر. وسى كەشتە مينيسترلىكتىڭ ۇيىم­­داستىرۋىمەن جىل سايىن قالامگەر سەيداحمەت بەردىقۇلوۆ اتىنداعى سپورت جۋرناليستەرى ارا­سىندا وتەتىن كونكۋرستىڭ جەڭىم­پاز­دارى دا انىقتالدى. كونكۋرس­تىڭ جەڭىمپازى بولىپ «قازاق سپورتى» گازەتى باس رەداكتورىنىڭ ورىنباسارى زەينەل ۇيسىنبايتەگى, «قازاقستان» ۇلتتىق ارناسىنىڭ وڭ­تۇستىك قازاقستان وبلىسى بو­يىنشا فيليالىنىڭ ءتىلشىسى ينديرا بەكتەنوۆا مەن «سپورت جۇلدىزدارى» جۋرنالىنىڭ باس رەداكتورى مۇسا­عالي تاسقاليەۆ اتاندى. كەشتە جەڭىمپازدارعا سىيلىق­تى مينيسترلىكتىڭ سپورت ىستەرى جونىندەگى كوميتەتىنىڭ توراعاسى ەلسيار قاناعاتوۆ تابىس ەتتى.