قر جوعارعى سوتى سۋديالارعا قويىلاتىن تالاپتاردى كۇشەيتپەك

بۇگىن ءماجىلىستىڭ جالپى وتىرىسىندا ءاربىر بەس جىلدا وتكىزىلەتىن بىلىكتىلىك باعالاۋىنان وتپەگەن سۋديالاردى بىردەن لاۋازىمىنان بوساتۋدى ۇسىناتىن زاڭ جوباسى ماقۇلداندى, دەپ حابارلايدى قازاقپارات. «تاجىريبە سۋديالاردىڭ كاسىبي ءبىلىمىن باعالاۋ ينستيتۋتىنىڭ تيىمدىلىگىن كورسەتىپ وتىر. سونىمەن بىرگە, باعالاۋدىڭ قولدانىستاعى تەتىگى قايتا قاراۋدى تالاپ ەتۋدە», - دەدى قر جوعارعى سوتىنىڭ سۋدياسى اقىلتاي قاسىموۆ «قازاقستان رەسپۋبليكاسىنىڭ كەيبىر كونستيتۋتسيالىق زاڭدارىنا وزگەرىستەر ەنگىزۋ تۋرالى» قر كونستيتۋتسيالىق زاڭىنىڭ جوباسى بويىنشا بايانداما جاساۋ كەزىندە. ونىڭ سوزىنە قاراعاندا, زاڭناماعا سايكەس, سوت ءجيۋريى باعالاۋىنىڭ ناتيجەسى بويىنشا سۋدياعا تەرىس قورىتىندى بەرىلسە سۋديانىڭ بىلىكتىلىگىن ارتتىرۋ تۋرالى جانە ءبىر جىل وتكەن سوڭ كاسىبي قىزمەتىن قايتادان باعالاۋدى جۇرگىزۋ تۋرالى شەشىم قابىلداناتىن. قايتا باعالاۋدا تەرىس ناتيجە بولعان جاعدايدا عانا سۋديانىڭ اتقارىپ جاتقان قىزمەتىنە سايكەس كەلمەيتىندىگىن تانۋ تۋرالى شەشىم ەنگىزىلەتىن. وسى ارقىلى, اتقارىپ جاتقان لاۋازىمىنا سايكەس كەلمەيتىنىن كۋالاندىراتىن سۋديانىڭ كاسىبي قىزمەتىنىڭ ءبىرىنشى تەرىس ناتيجەسى ونى جۇمىسىنان بوساتۋعا نەگىز بولمايتىن. «وسىعان بايلانىستى سۋديالار كورپۋسىنىڭ ساپالىق قۇرامىن ودان ءارى ارتتىرۋ, كاسىبي بىلىكتىلىگىن باعالاۋ مەن ونى كوتەرۋگە ىنتالاندىرۋ تەتىگىن جەتىلدىرۋ, ىستەردى قاراۋ كەزىندە زاڭدىلىقتى نىعايتۋ ءۇشىن جاۋاپكەرشىلىكتى ارتتىرۋ ماقساتىندا سۋديانىڭ كاسىبي قىزمەتىن مەرزىمدى باعالاۋدىڭ تەرىس ناتيجەسى الىنعان جاعدايدا, ونىڭ كاسىبي قىزمەتىنە قايتادان باعالاۋ جۇرگىزبەستەن سۋديانى لاۋازىمىنان بوساتۋ ۇسىنىلادى», - دەدى ا. قاسىموۆ. مۇنىمەن قوسا, زاڭ جوباسىندا سوت ءجيۋريى سۋديانى باسقا سوتقا نەمەسە باسقا ماماندانۋعا اۋىستىرۋ تۋرالى شەشىم قابىلداعان جاعدايدا, سۋديالاردى باسقا سوتقا كونكۋرس وتكىزبەستەن اۋىستىرۋ ءتارتىبىن رەگلامەنتتەۋ ەسكەرىلدى. تالقىلاۋلاردان كەيىن پالاتا دەپۋتاتتارى زاڭ جوباسىن ماقۇلدادى.