قازاقستان پارلامەنتى جايىلىمدار تۋرالى زاڭ جوباسىن قابىلدادى

بۇگىن ءماجىلىستىڭ جالپى وتىرىسىندا پالاتا دەپۋتاتتارى «جايىلىمدار تۋرالى» قر زاڭىنىڭ جوباسىنا سەنات ەنگىزگەن وزگەرىستەر مەن تولىقتىرۋلارمەن كەلىستى, دەپ حابارلايدى قازاقپارات. «پارلامەنت سەناتى ەنگىزگەن تۇزەتۋلەر زاڭ جوباسىنىڭ تۇجىرىمدامالىق ەرەجەلەرىن قوزعامايدى. اتاپ ايتقاندا, زاڭ جوباسى «ءاريدتى جايىلىمدار», «جايىلىمداردى سۋلاندىرۋ» جانە «جايىلىمداردىڭ جەم-ءشوپ مولشەرى» دەگەن جاڭادان قابىلدانعان ۇعىمدارعا قاتىستى ەرەجەلەرمەن تولىقتىرىلادى», - دەدى اگرارلىق ماسەلەلەر كوميتەتىنىڭ حاتشىسى جەكسەنباي دۇيسەباەۆ. سونىمەن قاتار كوميتەت قورىتىندىسىنا قاراعاندا, سەنات ەنگىزگەن تۇزەتۋلەر زاڭ جوباسىنىڭ تۇجىرىمدامالىق ەرەجەلەرىن وزگەرتپەي, تەك ولاردىڭ مازمۇنىن ناقتىلايتىنىن ەسكەرە وتىرىپ, وزگەرىستەر كەلىسىلدى. «جايىلىمدار تۋرالى» زاڭ جوباسىنىڭ ماقساتى - جايىلىمداردى وڭتايلى پايدالانۋعا, سونىڭ ىشىندە جايىلىم القاپتارىنا دەگەن تۇرعىنداردىڭ سۇرانىسىن قامتاماسىز ەتۋ بويىنشا اۋىل شارۋاشىلىعى جانۋارلارىن ۇستاۋ ءۇشىن جاعداي جاساۋعا, جايىلىم ينفراقۇرىلىمى نىساندارىنىڭ جاي-كۇيىن جاقسارتۋ, جايىلىمداردىڭ توزۋىن بولدىرماۋعا بايلانىستى قوعامدىق قاتىناستاردى رەتتەۋ بولىپ تابىلادى. سونىمەن قاتار جالپى وتىرىستا دەپۋتتار  «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جايىلىمداردى پايدالانۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنا سەنات ەنگىزگەن وزگەرىستەر مەن تولىقتىرۋلارعا كەلىسىم بەردى. بۇدان بۇرىن حابارلانعانداي, وتكەن اپتادا سەناتتىڭ جالپى وتىرىسىندا «جايىلىمدار تۋرالى», «قازاقستان رەسپۋبليكاسىنىڭ كەيبىر ززاڭنامالىق اكتىلەرىنە جايىلىمداردى پايدالانۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوبالارى قارالدى. وسى ەكى قۇجاتقا بىرقاتار تۇزەتۋلەر جاسالعاندىقتان, زاڭ جوبالارى ماجىلىسكە قايتارىلعان بولاتىن.