جۇكەمباەۆ پەن قۇسايىنوۆ كەلەسى جەكپە-جەكتەرىن قايدا وتكىزۋى مۇمكىن؟

كاسىپقوي بوكستا باقتارىن سىناپ جۇرگەن وتانداستارىمىز باتىر جۇكەمباەۆ پەن ابىلايحان قۇسايىنوۆ گەننادي گولوۆكيننىڭ بۇرىنعى قارسىلاستارى داۆيد لەمە مەن كەرتيس ستيۆەنس اراسىندا وتەتىن بوكس كەشىنىڭ اندەركارتىندا شارشى الاڭعا شىعۋى مۇمكىن. بۇل تۋرالى vesti.kz حابارلادى. «مەنەدجەرىمىز اننا رەۆا ءبىزدىڭ بۇل بوكس كەشىندە جۇدىرىقتاسۋىمىز تۋرالى كەلىسسوز جۇرگىزىپ جاتىر. ءبىر وكىنىشتىسى, مۇندا ءبىر عانا ورىن بار ەكەن, ياعني ەكەۋىمىزدىڭ ءبىرىمىز عانا جۇدىرىقتاسۋىمىز كەرەك. ازىرگە كىمنىڭ شارشى الاڭعا شىعاتىنى بەلگىسىز بولىپ تۇر. قايسىسىمىز شىقساق تا, جاقسى بوكس كورسەتۋگە تىرىسامىز», – دەدى ابىلايحان قۇسايىنوۆ. كانادالىق داۆيد لەمە مەن امەريكالىق كەرتيس ستيۆەنس اراسىنداعى جەكپە-جەك 11 ناۋرىز كۇنى نيۋ-يورك قالاسىندا وتەدى. ايتا كەتەيىك, ءبىرىنشى ورتا سالماقتا 25 جاستاعى جۇكەمباەۆ كاسىپقوي بوكستا وسىعان دەيىن سەگىز كەزدەسۋ وتكىزىپ, جەتەۋىن ۋاقىتىنان بۇرىن اياقتاعان. ال قۇسايىنوۆ بەس جەكپە-جەگىنىڭ تورتەۋىندە قارسىلاستارىن نوكاۋتقا تۇسىرگەن.