وقو-دا كوكتەمگى تاسقىننىڭ الدىن الۋعا 856 ملن تەڭگە ءبولىندى

وڭتۇستىك قازاقستان وبلىسى اكىمدىگىندە ءوڭىر باسشىسىنىڭ توراعالىعىمەن وبلىس اۋماعىندا كوكتەمگى سۋ تاسقىنىن الدىن الۋ جۇمىستارى بويىنشا وقو توتەنشە جاعدايلار دەپارتامەنتى قىزمەتى مەن اۋدان, قالا اكىمدەرىنىڭ قاتىسۋىمەن سەلەكتورلىق ءماجىلىس ءوتتى. بۇل تۋرالى اكىمنىڭ ءباسپاسوز قىزمەتى حابارلادى. «­­­­جيىندا وبلىس اۋماعىندا كوكتەمگى سۋ تاسقىنى, سەل, سىرعىما, قار كوشكىنىن الدىن الۋ جۇمىستارى جانە وڭىردەگى سۋ قويمالارىنىڭ جاعدايى تالقىلاندى. جيىندا كوكتەمگى سۋ تاسقىنىنىڭ الدىن الۋ شارالارى بويىنشا جاۋاپتى تۇلعالاردىڭ بايانداماسى تىڭدالدى», دەلىنگەن حابارلامادا. ايتا كەتەيىك, توتەنشە جاعدايدىڭ الدىن الۋ ماقساتىندا, 2016 جىلى وبلىستىڭ اۋماعى مەن حالقىن سۋ تاسقىنىنان قورعاۋ ءۇشىن 664,2 ملن تەڭگەگە جالپى ۇزىندىعى 6,21 شاقىرىم ارنا تۇزەۋ جانە جاعا بەكىتۋ جۇمىستارى جۇرگىزىلدى. ال 1,5 ملرد تەڭگەگە جالپى ۇزىندىعى 955 شاقىرىم يرريگاتسيالىق جۇيەنىڭ سۋ وتكىزۋ قابىلەتتىگى كۇشەيتىلىپ, جوق جەرلەرگە سالىندى. سونداي-اق, وسى جىلى سۋ تاسقىننىڭ الدىن الۋ ماقساتىنا 856 ملن تەڭگە ءبولىندى. كوكتەمگى سۋ تاسقىنىنا قاۋىپتى كەزەڭگە وبلىستى دايىنداۋ ماقساتىندا, وبلىس كولەمىندە 6,36 شاقىرىم قورعانىس بوگەتى سالىنسا, 325,3 شاقىرىم قورعانىس بوگەتتەرى نىعايتىلدى. ال 36,3 شاقىرىم بوگەت جاڭادان تۇرعىزىلدى. جانە دە 48,5 شاقىرىم وزەندەردىڭ جاعالاۋلارى بەكىتىلىپ, 668,1 شاقىرىم ارىق-كانالدارمەن 397 بىرلىك سۋ وتكىزۋ قۇبىرلارى تازالاندى. توتەنشە جاعدايلار دەپارتامەنتىنىڭ حابارلاۋىنشا, «قازگيدرومەت», «قازسۋشار» رمك, «قازسەلدەنقورعاۋ» مم وقف گيدروبەكەتتەرىنەن سۋ قويمالار مەن وزەندەردەگى سۋ دەڭگەيىنىڭ تولۋى جانە اعىندارى بويىنشا كۇندەلىكتى شۇعىل اقپاراتتار الىنادى. ولاردىڭ مالىمدەۋىنشە, قازىرگى تاندا وبلىس اۋماعىنداعى سۋ تاسۋ جاعدايى ءبىر قالىپتى, وزەندەردەگى سۋدىڭ دەڭگەيى اۋمالى كۇيدەگى دەڭگەيدەن تومەن, سۋ قويمالارىندا سۋدىڭ دەڭگەيى ورتا ەسەپپەن جوبالىق مولشەرىنىڭ 30-35% قۇرايدى.