امەريكا بيزنەسى ترامپ ساياساتىنا قارسى شىعىپ جاتىر

Ford Motor كومپانياسىنىڭ جەتەكشىلەرى كىشى بيلل فورد پەن مارك فيلدس جانە Goldman Sachs باستاعان ءىرى امەريكالىق كومپانيالاردىڭ باسشىلىعى پرەزيدەنت دونالد ترامپ ساياساتىنا قارسى نارازىلىقتارىن بىلدىرۋدە, دەپ جازادى investing. ء"بىز بيزنەستىڭ كورپوراتيۆتى قۇندىلىقتارىنا قايشى كەلەتىن ساياساتقا تۇبەگەيلى قارسىمىز", - دەلىنگەن كاسىپكەرلەردىڭ پرەزيدەنت ساياساتىنا قارسى جازىلعان ۇندەۋىندە. ترامپتىڭ كوشى-قون ساياساتىنان كەيىن دوللار قۇنى تومەندەپ, ەلدەگى ءىرى كومپانيالاردىڭ اكتسيالارى قۇنسىزدانىپ جاتقانى بەلگىلى. ەستەرىڭىزگە سالا كەتەيىك, ترامپ وتكەن اپتا تاياۋ شىعىستاعى جەتى مۇسىلمان ەلدەرىنىڭ ازاماتتارىن اقش-قا كىرۋىنە شەكتەۋ قويعان ەدى. Goldman Sachs ينۆەستيتسيالىق بانكىنىڭ باسشىسى للويد بلانكفەين بانكيرلەردىڭ ىشىندە بولىپ العاش نارازىلىعىن كورسەتكەن تۇلعا. ال Starbucks كومپانياسى  ترامپقا نارازىلىق شاراسى رەتىندە الەم بويىنشا 75 ەلدەگى ءوزىنىڭ بولىمشەلەرىندە 10 مىڭ بوسقىندى جۇمىسقا الاتىنىن مالىمدەدى. Uber باسشىلىعى دا پرەزيدەنتتىڭ قاۋلىسىنا قارسىلىعىنىڭ بەلگىسى رەتىندە وسى ماسەلەنى اق ۇيدەگى جيىندا قايتا كوتەرەتىنىن ايتتى. كومپانيا وكىلدەرى سىن ايتقانىمەن, تىكەلەي ترامپ وزىنە قاراتا ەشقانداي قارسى مالىمدەمە جاساماي وتىر. ماسەلەن, United Parcel Service پوشتا قىزمەتى "ەلدىڭ قاۋىپسىزدىگىنە باعىتتالعان ساياساتتى قولداعانىمەن, ازاماتتاردىڭ ەمىن-ەركىن شەت ەلگە كىرۋىن دە قولدايتىنىن" ايتتى. General Motors كادر ءبولىمى قىزمەتكەرلەرىنىڭ بارلىعىنا كومپانياداعى ازاماتتاردىڭ ءار الۋاندىعىن قۇرمەتتەيتىنىن ايتىپ حات جىبەردى. United Auto Workers اۆتويندۋسترياسى قىزمەتكەرلەرى كاسىپوداعىنىڭ باسشىسى دەننيس ۋيليامس ادامزاتتىڭ ءناسىلى مەن ۇلتىنا قاتىستى الالاۋدىڭ دۇرىس ەمەستىگىن ايتىپ مالىمدەمە جاسادى. ال Tesla Motors جەتەكشىسى يلون ماسك الەۋمەتتىك جەلى ارقىلى پرەزيدەنتتىڭ الگى قاۋلىسىنا ايتارلىقتاي وزگەرىس ەنگىزۋ كەرەكتىگىن ايتتى. دەگەنمەن, بيزنەس الەمىندەگى ءىرى كومپانيا وكىلدەرى مەن الپاۋىت قارجىگەرلەر ازىرگە ءۇنسىز وتىر. Bridgewater Associates, Renaissance Technologies, Millennium Management, Two Sigma Investments سەكىلدى ءىرى فيرما وكىلدەرى جۋرناليستەرگە وسى ماسەلەگە قاتىستى پىكىر بەرۋىنەن باس تارتتى.