قور نارىعىنا «سامۇرىق-قازىنا» قورى كومپانيالارىنىڭ اكتسيالارى ورنالاستىرىلادى

قازاقستان پرەزيدەنتى بۇگىن جاريالانعان جولداۋىندا قور نارىعىن ودان ءارى دامىتۋ ماسەلەسىنە ايرىقشا توقتالعان. «جەكەشەلەندىرۋ ونىڭ دامۋىنا سەرپىن بەرۋگە ءتيىس. مەن جوعارىدا ايتىپ وتكەندەي, قور نارىعىنا «سامۇرىق-قازىنا» قورى كومپانيالارىنىڭ اكتسيالارىن ورنالاستىرۋ كەرەك. حالىقتىڭ جيناعان ءوز قاراجاتىن ەڭ الدىمەن ءتۇرلى باعالى قاعازدارعا ينۆەستيتسيالاۋ مۇمكىندىگىن ودان ءارى ارتتىرۋ قاجەت», - دەدى نۇرسۇلتان نازارباەۆ. مەملەكەت باسشىسى 2016 جىلدىڭ سوڭىندا زاڭداستىرۋ ناۋقانى اياقتالعانىن, وعان ەلىمىزدىڭ 140 مىڭنان استام ازاماتى قاتىسقانىن اتاپ ءوتتى. ناتيجەسىندە 5,7 تريلليون تەڭگە, ونىڭ ىشىندە قاراجات تۇرىندە 4,1 تريلليون تەڭگە زاڭداستىرىلدى. «ۇكىمەتتىڭ مىندەتى - بۇل قاراجاتتىڭ ەكونوميكاعا, سونىڭ ىشىندە جەكەشەلەندىرۋگە قاتىسۋ ارقىلى پايدا بەرۋىن قامتاماسىز ەتۋ. سونىمەن بىرگە, قازاقستاننىڭ جەكەمەنشىك كاسىپورىندارىنىڭ وبليگاتسيا شىعارىلىمدارىن سۋبسيديالاۋ ماسەلەسىن پىسىقتاۋ قاجەت. ۇكىمەتكە ۇلتتىق بانكپەن بىرلەسىپ, وتاندىق قور نارىعىن جانداندىرۋعا باعىتتالعان شارالار قابىلداۋدى تاپسىرامىن», - دەدى ەلباسى.