85-تەگى اجەي 285 كىتاپ سىيلادى

كوكتەرەك اۋىلى كوكتەم مەرەكەسىن كول-كوسىر مەيرامعا اينالدىردى. كۇنى بويى اۋىلدى ءان-كۇي مەن شاتتىق اۋەزدەرى كەرنەدى. تاعلىمدى شارا­لاردىڭ ءبىرى جەرگىلىكتى نەگىزگى مەكتەپتە بولعان ەدى. ۇلىستىڭ ۇلى كۇنى جاريا جانايداروۆا 85 جىلدىعىن اتاپ ءوتتى. زەرەندى اۋدانىنىڭ ءارتۇرلى مەكتەپتەرىندە قىرىق جىلدان استام ۇستازدىق قىزمەت اتقارعان جاريا ابدراحمانقىزى ءوزى دە كەزىندە كوك­تەرەك مەكتەبىندە وقىپ, باستاۋىش سىنىپ وقۋشى­لارىن ءبىلىم نارىمەن سۋسىنداتقان. التى بالا ءوسىرىپ, 12 نەمەرە جانە 10 شوبەرە ءسۇيىپ وتىرعان اجەيدىڭ نەمەرەلەرى گاۋحار مەن اسحات «التىن بەلگى» يەگەرلەرى بولسا, گاۋحار, سونداي-اق, استاناداعى ل.ن.گۋميلەۆ اتىنداعى ۇلتتىق ۋنيۆەرسيتەتتى ۇزدىك ءبىتىرىپ شىقتى. ەل اناسى جاسىنىڭ ۇلعايعانىنا قاراماستان, قوعامدىق جۇمىستاردان, تاعلىم شارالارىنان شەت قالعان ەمەس. جاريا اجەي ناۋرىز مەيرامىندا كوكتەرەك مەكتەبىنە ايرىقشا سىيلىق جاسادى. ەندى ءبىلىم ورداسىنىڭ كىتاپحاناسى ارداگەر ۇستاز ۇسىنعان 285 دانا كىتاپپەن تولىقتى. ولاردىڭ ىشىندە قازاقستان مەن الەم كلاسسيكتەرىنىڭ قولعا تۇسە بەرمەيتىن شىعارمالارى, كوكشەتاۋلىق اقىن, جازۋشىلاردىڭ كىتاپتارى بار. كەزدەسۋدە مەكتەپ ديرەكتورى قارلىعاش مانانوۆا, اۋىل اقساقالدارى سابىركەن ءومىروۆ, قادىر­جان تۋمىرزين, مايرا گيمالوۆا ج.جانايداروۆانىڭ اۋىل ءومىرى مەن مادەنيەتىن كوتەرۋگە قاتىستى ەڭبەكتەرىن اتاپ, ەستەلىكتەرىمەن ءبولىستى. مۇندا ارنايى كورمە ۇيىمداستىرىلىپ, مەكتەپ وقۋشىلارى ونەر كورسەتتى. باقبەرگەن  امالبەك, اقمولا وبلىسى, زەرەندى اۋدانى.