تۋريزم كوميتەتى تايلاندتا جۇرگەن قازاقستاندىقتارعا ساق بولۋعا كەڭەس بەرۋدە

قر ينۆەستيتسيالار جانە دامۋ مينيسترلىگىنىڭ تۋريزم كوميتەتى تايلاندتا جۇرگەن قازاقستاندىقتارعا قاۋىپسىزدىك شارالارىن ساقتاۋعا كەڭەس بەرىپ وتىر, دەپ xابارلايدى قازاقپارات. ايتا كەتەيىك, تايلاندتىڭ سامۋي ارالىندا تولاسسىز جاۋعان جاڭبىردىڭ سالدارىنان جولدار سۋدىڭ استىندا قالىپ, جەرگىلىكتى اۋەجايدان ۇشاتىن بىرقاتار رەيستەردىڭ ۇشۋى توقتاتىلدى. الەمدىك بۇقارالىق اقپارات قۇرالدارىنىڭ xابارلاۋىنشا, اۋا-رايىنىڭ كۇرت بۇزىلىپ كەتۋىنەن 700 مىڭنان استام ادام زارداپ شەگىپ, 12 ادام قايتىس بولدى. «ءبىزدىڭ اقپاراتىمىزعا سايكەس, سامۋي ارالىندا جۇرگەن قازاقستاندىق تۋريستەر كوپ ەمەس. ولاردىڭ بارلىعى تۋروپەراتورلارمەن تىكەلەي بايلانىستا. جاقىن كۇندەرى ول جەردە كۇن اشىلادى دەگەن بولجام بار. دەگەنمەن, سامۋي ارالىندا جۇرگەن وتانداستارىمىزعا اسا ساق بولىپ, قاۋىپسىزدىك شارالارىن ساقتاۋعا كەڭەس بەرەمىز. دۇربەلەڭگە بوي الدىرتپاي, جەرگىلىكتى بيلىكتىڭ بارلىق نۇسقاۋلارىن ورىنداۋعا شاقىرامىز. ءبىز تايلاندتىڭ وڭتۇستىگىندەگى جاعدايدى باقىلاپ, سىرتقى ىستەر مينيسترلىگىمەن تىكەلەي بايلانىس ۇستاپ وتىرمىز», - دەيدى تۋريزم دەپارتامەنتىنىڭ باسشىسى مارات يعالي. سونداي-اق دەپارتامەنت تايلاندقا جولدا ساتاتىن تۋريستىك فيرمالاردى ول جەردەگى مەتەورولوگيالىق جاعدايدى ءجىتى قاداعالاپ, اۋا-رايىنىڭ بۇزىلۋى جايىندا تۋريستەردى شۇعىل تۇردە xاباردار ەتۋگە ۇندەپ وتىر.