تۇلعاعا تاعزىم

كەنشىلەر استاناسىندا قاراعاندى وبلىسىنىڭ قۇرىلعانىنا 80 جىل تولۋىنا ارنالىپ عيبراتى مول شارا ۇيىمداستىرىلدى. بۇل كۇنى وبلىستىق تاريحي-ولكەتانۋ مۇراجايىندا وسىدان جارتى جىل بۇرىن ومىردەن وتكەن وڭىرگە بەلگىلى تۇلعا, قاراعاندى قالاسىنىڭ قۇرمەتتى ازاماتى سۇلتان قاپار ۇلى دوسماعامبەتوۆتىڭ جەكە كورمەسى جۇرتشىلىققا ەسىك اشتى. اتالعان كورمەگە وبلىس باسشىلىعى, سۇلتان قاپار ۇلىمەن بىرگە قىزمەتتەس بولعان ارداگەرلەر, مارقۇمنىڭ بالالارى قاتىستى. شارا بارىسىندا قوناقتار س.دوسماعامبەتوۆ تۋرالى دەرەكتى ءفيلمدى كورىپ, اتپال ازاماتتىڭ جەكە مۇراعاتتىق قورىنان الىنىپ, كورمەگە قويىلعان ءتۇرلى قۇجاتتار مەن ناگرادالار جانە جەكە قولدانىستا بولعان جادىگەرلەرمەن تانىستى. شاراعا قاتىسقان وبلىس اكىمى نۇرمۇحامبەت ابدىبەكوۆ قوعام قايراتكەرى سۇلتان دوسماعامبەتوۆ تۋرالى وزەكجاردى لەبىزىن جەتكىزدى. سۇلتان دوسماعامبەتوۆتىڭ 60 جىلعا جۋىق ءومىرى قاراعاندى وبلىسىنىڭ تىنىس-تىرشىلىگىمەن بىتە قايناسقان. ول 1969 جىلى قاراعاندى وبلىستىق اتقارۋ كوميتەتىنىڭ توراعاسى بولىپ سايلاندى جانە وسى قىزمەتتى 1982 جىلدىڭ مامىر ايىنا دەيىن اتقاردى. سول جىلدارى سۇلتان قاپار ۇلى بولاشاق ەلباسى نۇرسۇلتان ءابىش ۇلى نازارباەۆپەن يىق تىرەسە بىرگە ەڭبەك ەتىپ, وبلىستىڭ قارىشتاپ دامۋىنا كۇش-جىگەرىن اياماي جۇمسادى. ەلىمىزدىڭ تۇڭعىش پرەزيدەنتى ن.ءا.نازار­باەۆ «ستالنوي پروفيل كازاحستانا» كىتا­بىندا: «س.ق. دوسماعامبەتوۆ وبلىستىق اتقارۋ كوميتەتىنىڭ توراعاسى بولعان جىلداردا مەتاللۋرگيالىق كومبينات ۇجىمىنىڭ جۇ­مىسىنا بارلىق قاجەتتى جاعدايدى جاساپ وتىردى», دەپ جىلى لەبىز بىلدىرەدى. 1982 جىلى س. دوس­­­ما­عامبەتوۆ قارا­عاندى پەداگوگيكالىق دەنە تاربيەسى ينس­تي­­تۋتىنىڭ رەكتورى بولىپ تاعا­يىن­دالىپ, ۇزاق جىلدار جەمىستى قىزمەت اتقاردى. جەزقازعان جانە قاراعاندى وبلىستارى بىرىككەن كەزدە بالاما نەگىزدە قاراعاندى وبلىستىق ءماسلي­حاتىنىڭ حاتشىسى بولىپ سايلاندى جانە وسى لاۋازىمدا 1999 جىلدىڭ اياعىنا دەيىن جۇمىس ىستەدى. سۇلتان قاپار ۇلى مەن زايىبى, بىلىكتى زاڭگەر, ۇلاعاتتى ۇستاز روزا بالباتىرقىزى ەكەۋى ونەگەلى ۇرپاق تاربيەلەپ ءوسىردى. قىزدارى راۋشان سۇلتانقىزى مەديتسينا عىلىم­دارىنىڭ دوكتورى, پروفەسسور, قاراعاندى مەملەكەتتىك مەديتسينالىق ۋنيۆەرسيتەتىنىڭ رەكتورى, وبلىستىق ءماسليحاتتىڭ دەپۋتاتى بولسا, ۇلدارى ەرلان سۇلتان ۇلى ەكونوميكا عىلىمدارىنىڭ كانديداتى, «ەۆرازەس ىسكەرلىك كەڭەسى» قاۋىمداستىعى وكىلدىگىنىڭ باسشىسى, قاراعاندى قالاسىنداعى ۋكراينانىڭ قۇرمەتتى كونسۋلى بولىپ قىزمەت ەتەدى. تاريحي-ولكەتانۋ مۇراجايىنىڭ ديرەكتورى ەرجان نۇرماعامبەتوۆ كورمەگە قويىلعان زاتتاردىڭ بارلىعى دا مۋزەيدىڭ مەنشىگىنە وتەتىنىن ايتتى. سونداي-اق, ول جەكە مۇراعاتتىق ماتەريالداردى جيناستىرۋدا سۇلتەكەڭ بالالارىنىڭ كوپ كومەك تيگىزگەنىن ريزاشىلىقپەن اتاپ ءوتتى. قايرات ءابىلدينوۆ, «ەگەمەن قازاقستان»