كەزدەسۋ بارىسىندا جاتاقحاناداعى قۇبىرلاردىڭ توزعاندىعى, جىلۋ مەن سۋدىڭ جەتپەيتىندىگى, جارىقتىڭ ءسونىپ قالا بەرەتىنى, سوندىقتان كۇردەلى جوندەۋ جۇمىسىنىڭ قاجەتتىگى سياقتى وزەكتى ماسەلەلەر ءسوز بولدى. تۇرعىنداردىڭ تالاپ-تىلەكتەرىن زەيىنمەن تىڭداعان وبلىس اكىمى الداعى ۋاقىتتا جاتاقحانالارعا جىلۋ جۇيەسىن جۇرگىزۋگە, ونىڭ سىرتى مەن شاتىرىن جوندەۋگە قارجى بولىنەتىنىن ايتتى. مىسالى, بۇگىندە №25 جاتاقحانا اۋلاسىن اباتتاندىرۋ, جارىق ورناتۋ, جولدارىن جوندەۋ جۇمىستارى قولعا الىنعان. بۇل ماقساتقا بىلتىر 24 ميلليون تەڭگە ءبولىنىپتى.
كوسەمالى ساتتىباي ۇلى. تاراز.
ەلشىنىڭ كەرەكۋ وڭىرىنە ساپارى. وتكەن اپتادا وبلىس ورتالىعىندا ەكى كۇندىك ساپارمەن كانادانىڭ ەلىمىزدەگى توتەنشە جانە وكىلەتتى ەلشىسى ستيۆەن ميللار كەلىپ كەتتى. وبلىس اكىمى باقىتجان ساعىنتاەۆپەن ەكەۋارا كەزدەسۋى كەزىندە ءوندىرىستى ءوڭىردىڭ وركەندەۋى, ەكونوميكالىق-الەۋمەتتىك ماسەلەلەر تاقىرىبىندا اڭگىمە قوزعالدى. ەلىمىزدىڭ سولتۇستىك ايماقتارى, ءبىزدىڭ شالداي ورماندارى تىزبەسى كانادا تابيعاتىنا ۇقساس كورىنەدى. ەلشى وبلىس ورتالىعىنداعى سۇلتانماحمۇت تورايعىروۆ اتىنداعى مەملەكەتتىك ۋنيۆەرسيتەتىندە ستۋدەنتتەرگە ءدارىس وقىپ, سوڭىنان ۇكىمەتتىك ەمەس ۇيىمدار وكىلدەرىمەن كەزدەسۋ وتكىزدى.
فاريدا بىقاي. پاۆلودار.
تۋعان جەر جايلى تولعاۋ. اكادەميك م.قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىندە «تۋعان جەر» اتتى اۋماقتىق عىلىمي-تاجىريبەلىك كونفەرەنتسيا ءوتتى. ونى تاريح جانە زاڭ فاكۋلتەتىنىڭ وقىتۋشىلارى ۇيىمداستىرىپ, ەل تاۋەلسىزدىگىنىڭ 20 جىلدىعىنا ارنالدى. وعان كورشىلەس رەسەي جەرىنەن دە عالىمدار مەن ولكەتانۋشىلار قاتىستى. كونفەرەنتسيادا 50-گە تارتا بايانداما تىڭدالىپ, قىزىلجار ءوڭىرىنىڭ كونە اتاۋلارى مەن تاريحىنا, تۇلعالار تاعدىرىنا قاتىستى سىرلار شەرتىلدى. ەل-جەر, سۋ اتتارىنا قاتىستى جۇرتشىلىققا ءالى جەتە قويماعان تىڭ دەرەكتەر كەلتىرىلدى. باياندامالارداعى وي-پىكىرلەر ۇلكەن قىزىعۋشىلىق تۋدىردى. عالىمداردىڭ ولكەتانۋ سالاسىن دامىتۋعا بايلانىستى ۇسىنىستارى دا كونفەرەنتسياعا قاتىسۋشىلار تاراپىنان قولداۋ تاپتى.
ءومىر ەسقالي. سولتۇستىك قازاقستان وبلىسى.
حالىق اقىندارىنا قامقورلىق. وتكەن جىلى جەرگىلىكتى عالىم, دوتسەنت ت.يمانجاپاردىڭ قۇراستىرۋىمەن تولەۋ, ساپارعالي, نۇرلىبەك, تاڭىربەرگەن, شاكىر, قاليحان سىندى حالىق اقىندارىنىڭ ارتىندا قالعان مول مۇراسى مەيلىنشە قامتىلعان ءۇش بىردەي جيناق جارىق كورگەن ەدى. جۋىردا اباي قورىق مۇراجايىندا وسى كىتاپتاردىڭ تۇساۋكەسەر ءراسىمى وتكىزىلدى. وندا ابايدىڭ اقىندىق مەكتەبىنەن ءنار العان حالىق اقىندارىنىڭ ءومىرى مەن شىعارماشىلىعىن مولىنان قامتىعان كىتاپتار تۋرالى جىلى لەبىز ءبىلدىرىلىپ, تىڭ دەرەكتەر ورتاعا سالىندى. اسەرلى كەش اسەم انمەن ورنەكتەلدى.
داۋلەت سەيسەن ۇلى. سەمەي.
جيىرما جىل ءان قاناتىندا. قوستانايلىقتار تاماشا ءان كەشىنىڭ كۋاسى بولدى. ءانشى گۇلبانۋ ابدۋللينا شىعارماشىلىعىنىڭ جيىرما جىلدىعىنا وراي جەكە كونتسەرتىن بەردى. قازاق مەملەكەتتىك كونسەرۆاتورياسىندا كسرو حالىق ءارتىسى روزا جامانوۆانىڭ الدىنان ءتالىم العان گۇلبانۋ قوستاناي وبلىستىق فيلارمونياسىنداعى بەلدى ءانشىنىڭ بىرىنە اينالدى. ول وسى ۋاقىتقا دەيىن بىرنەشە رەسپۋبليكالىق بايقاۋلاردىڭ دا لاۋرەاتى اتاندى. ورەلى ونەرى ءۇشىن وبلىستىق مەتسەناتتار كلۋبى سىيلىعىن العان بولاتىن. گۇلبانۋ ابدۋللينا كونتسەرتىندە باتىستىڭ, ورىس كلاسسيكتەرىنىڭ وپەرالارىنان اريالار, رومانستار جانە قازاقتىڭ حالىق اندەرى مەن قازاق كومپوزيتورلارىنىڭ شىعارمالارىن ورىندادى.
ءنازيرا جارىمبەتوۆا. قوستاناي.
ءتۇبىت شالىلەر كورمەسى. وبلىستىق تاريحي-ولكەتانۋ مۇراجايىندا ەل تاۋەلسىزدىگىنىڭ 20 جىلدىعىنا ارنالعان ءداستۇرلى «ورىنبور ءتۇبىت ءشالىسى» كورمەسى ۇيىمداستىرىلدى. كورمەنى ۇيىمداستىرۋدىڭ ماقساتى – كورشىلەس ورىنبور وبلىسىمەن مادەني بايلانىستى نىعايتۋ جانە وڭىردەگى قولونەر شەبەرلەرىن ۇلتتىق قول ونەرىمىزدى دامىتۋعا تارتۋ. توقىماشى ىسمەرلەر ءبىرىنىڭ سالعان ورنەكتەرىن ەكىنشىلەرى قايتالامايدى. مۇندا جەپ-جەڭىل اسەم شالىلەردى ساتىپ الۋعا دا بولادى. كورمەدەن توقىماشىلىقتى ۇرپاقتان-ۇرپاققا جالعاستىرىپ كەلە جاتقان ر.ياكۋپوۆا, گ.ماساليموۆا, م.ابدۋللينا, م.يشمۇحامبەتوۆا, ر.سايفۋتدينوۆا سىندى حاس شەبەرلەردىڭ قولىنان شىققان الۋان ءتۇرلى ءتۇبىت شالىلەردى كەلۋشىلەر قىزىعا تاماشالادى.
ساتىبالدى ءساۋىرباي. اقتوبە وبلىسى.
وڭىردەگى ەكىنشى ستۋديا. تاسقالا اۋداندىق مادەنيەت ءۇيى جانىندا دىبىس جازۋ ستۋدياسى اشىلىپ جۇمىس جاساي باستادى. بۇل وسىعان دەيىنگى ىسكە اسقان ۇلكەن ازىرلىك جۇمىستارىنىڭ ناتيجەسى دەۋگە بولادى. ياعني, وتكەن جىلى بولاشاق ستۋدياعا كاجەتتى قوندىرعىلار مەن قۇرال-جابدىقتار ساتىپ الىندى. يا, ءان مەن كۇي جازدىرامىن دەسەڭىز, تاسقالاعا كەلىڭىز. مۇنداي مۇمكىندىكتى, ەڭ الدىمەن, تاسقالالىق ونەرپازدار پايدالانا الادى. باتىس قازاقستان وبلىستىق مادەنيەت باسقارماسىنىڭ باستىعى ايدار باتىرحانوۆتىڭ ايتۋىنشا, بۇل – وڭىردەگى ەكىنشى ستۋديا. مۇنىڭ ءبىرىنشىسى عاريفوللا قۇرمانعاليەۆ اتىنداعى وبلىستىق فيلارمونيادا ورنالاسقان.
تەمىر قۇسايىن. باتىس قازاقستان وبلىسى.
