قازاقستاندا ەسكى كولىكتەردى قابىلداۋ باستالدى

بۇگىن قازاقستاندا ۋتيليزاتسيالاۋ باعدارلاماسى اياسىندا ەسكى كولىكتەردى قابىلداۋ جۇمىستارى باستالدى, دەپ حابارلايدى قازاقپارات. بۇگىندە ەلىمىزدىڭ 17 قالاسىندا قابىلداۋ بەكەتتەرى اشىلدى. «وكم (وندىرۋشىلەردىڭ كەڭەيتىلگەن مىندەتتەمەلەرى) وپەراتورى» جشس-نىڭ باسقارۋشى ديرەكتورى رۋستام تەمىربەكوۆتىڭ ايتۋىنشا, جىل سوڭىنا دەيىن 10 مىڭ كولىكتى قابىلداۋ جوسپارلانعان. وعان بيۋدجەتتەن كۆوتا, ياعني ءتيىستى قاراجات ءبولىنىپ وتىر. باعدارلاما اياسىندا 3,5 توننادان اسپايتىن جەڭىل كولىكتەر قابىلدانادى. ال ۋتيليزاتسيالىق تولەمنىڭ كولەمى ءاۆتوموبيلدىڭ تەxنيكالىق جاعدايىنا قاراي بەلگىلەنەدى. تولىق كومپلەكتاتسياسىنا 150 000 تەڭگە بەرىلسە, ىستەن شىققان كولىكتەر ءۇشىن 48 000 تەڭگە تولەنەدى. «ەسكى كولىكتى تاپسىرۋ ءۇشىن الدىمەن سول ايماقتا كۆوتانىڭ بار جوعىن تەكسەرىپ الۋ قاجەت. سونداي-اق www.avto.recycle.kz سايتىنان كولىكتىڭ قاي ساناتقا جاتاتىنىن بىلۋگە مۇمكىندىك بار. ەندى, ءدال قازىر ءبىز ەسىكتى بولەك, شاناقتى بولەك ەسەپتەپ جاتقان جوقپىز. ازىرشە, ەكى-اق كاتەگوريا بار. ول – 150 جانە 48 مىڭ تەڭگەنىڭ وتەماقىسى», – دەيدى ر.تەمىربەكوۆ. سونداي-اق, ول باعدارلاما اياسىندا ەسكى كولىكتى قابىلداۋ بەكەتىنە دەيىن جەتكىزۋ قىزمەتى قاراستىرىلماعانىن ايتتى.