يسلامحان – قازاقستان چەمپيوناتىنىڭ ۇزدىك فۋتبولشىسى

الماتىنىڭ «قايرات» فۋتبول كومانداسى مەن قازاقستان ۇلتتىق قۇراماسىنىڭ جارتىلاي قورعاۋشىسى باۋىرجان يسلامحان 2016 جىلعى قازاقستان چەمپيوناتىنىڭ ۇزدىك فۋتبولشىسى اتاندى, دەپ جازدى sports.kz ۇزدىك فۋتبولشى پرەمەر-ليگا كوماندالارىنىڭ باس جاتتىقتىرۋشىلارى مەن فۋتبولشىلارى اراسىندا جۇرگىزىلگەن ساۋالناما ارقىلى انىقتالدى. «قايراتتىڭ» كاپيتانى ماۋسىم بويى جاقسى ويىن كورسەتتى. ەل چەمپيوناتىندا ول 17 گول سوعىپ, كوماندالاستارىنا 9 ناتيجەلى پاس شىعىرىپ بەردى. قازاقستان ۇلتتىق قۇراماسىنىڭ كوشباسشىلارىنىڭ ءبىرى. 23 جاسار فۋتبولشى ساۋالناما قورىتىندىسى بويىنشا 106 ۇپاي جيناپ, چەمپيوناتتىڭ ۇزدىك ويىنشىسى اتاندى. ەكىنشى ورىندى يەلەنگەن «قايراتتىڭ» رەسەيلىك لەگيونەرى اندرەي ارشاۆين ەل چەمپيوناتىندا 8 گول مەن 7 ناتيجەلى پاستىڭ اۆتورى اتاندى. ول 96 ۇپاي جينادى. ۇزدىك ۇشتىكتى پاۆلودارلىق «ەرتىستىڭ» 23 جاسار شابۋىلشىسى رومان مۋرتازاەۆ تۇيىندەيدى. ونىڭ كومانداسى دا ەل چەمپيوناتىندا قولا جۇلدەگە قول جەتكىزگەنىن ايتا كەتۋ كەرەك. پرەمەر-ليگادا 18 گول سوققان رومان بيىل ۇلتتىق قۇراما ساپىندا العاش رەت الاڭعا شىقتى. ساۋالناما قورىتىندىسى بويىنشا ول 60 ۇپاي جينادى.