قولا مەدالىمدى كۇمىستەن ارتىق كورەمىن - تەڭىزباەۆ

2008 جىلعى بەيجىڭ وليمپياداسىندا گرەك-ريم كۇرەسىنەن 60 كيلوعا دەيىنگى سالماقتا كۇمىس مەدال العان ازەربايجان بالۋانى ۆيتالي راگيموۆتىڭ دوپينگ قولدانعانى انىقتالعان بولاتىن. وسى سالماقتا ونەر كورسەتىپ, قولا مەدال يەلەنگەن قازاقستاندىق بالۋان نۇرباقىت تەڭىزباەۆ بۇل وقيعاعا بايلانىستى facebook-تەگى جەكە پاراقشاسىندا پىكىرىن ءبىلدىردى. - قۇرمەتتى دوستار! پەكين وليمپياداسى مەن ءۇشىن سپورتتىق كارەرامنىڭ شىڭى بولدى. ءاربىر سپورتشى وليمپيادا ويىندارىنىڭ جەڭىمپازى نەمەسە جۇلدەگەرى بولعىسى كەلەتىنى انىق. سپورتتا ۇزاق ۋاقىت ءجۇرىپ, ەشقاشان جەڭىلدىڭ استىمەن, اۋىردىڭ ۇستىمەن جۇرگەندى قولدامايتىنمىن جانە قولدامايمىن دا. قانداي مەدال بولسىن ونى كىلەم ۇستىندە جەڭىپ العاندى قولدايمىن. ءدال سول كۇنى, مەنى ءازىربايجان بالۋانى ۆيتالي راگيموۆ ۇتقان بولاتىن. ءۆيتاليدى تالانتتى دا مىقتى بالۋان رەتىندە تانيمىن. سول كۇنى ءۇشىنشى ورىن يەلەنۋ مەنىڭ ماڭدايىما جازىلعان بولار, ماعان ءوزىمنىڭ ۇتقان قولا مەدالىم اسا قىمبات. كۇمىس ۆيتاليگە جانە ونىڭ جانۇياسىنا تيەسىلى. ول مەدالدىڭ ارتىندا كوپتەگەن ادامنىڭ ەڭبەگى جاتىر. كۇمىس سول ەڭبەكتىڭ جەمىسى دەپ ويلايمىن! سىزدەردىڭ جىلى لەبىز جانە قولداۋلارىڭىزعا ۇلكەن العىس ايتامىن-دەدى نۇرباقىت تەڭىزباەۆ. نۇرحان سامارحان