ازەربايجان باسىلىمى "ەگەمەن قازاقستاننىڭ" ماقالالارى تۋرالى جازدى

باسىلىمدا جارىق كورگەن جاريالانىمنان گازەتتىڭ ءتول وقىرماندارى عانا ەمەس, باسقا ەلدەگىلەر دە حاباردار بولىپ جاتقانى جاقسىلىقتىڭ نىشانى ەمەس پە! «ەگەمەننىڭ» 12 قاراشاداعى سانىندا «ىزگى نيەت شەكارا ىزدەمەيدى» اتتى ماقالا جاريالانعان بولاتىن. كاسپيدىڭ ارعى بەتىنەن سوعان وراي تاعى ءبىر حابار جەتتى. «Egemen Qazaxistan» گازەتىندە گەيدار اليەۆ قورىنىڭ قىزمەتى تۋرالى «Xoş niyyət sərhəd tanımır» («ىزگى نيەت شەكارا ىزدەمەيدى») اتتى ماقالا جارىق كوردى» دەگەن تاقىرىپپەن ماقالا ازەربايجان مەملەكەتتىك اقپاراتتىق اگەنتتىگىنىڭ سايتىندا. ازەرتادج مەنشىكتى ءتىلشىسى يلاحا احمەدوۆا ءارى قاراي اتالعان ماقالادا ازەربايجاننىڭ ءبىرىنشى حانىمى, يۋنەسكو جانە يسەسكو-نىڭ ىزگى نيەت ەلشىسى مەحريبان اليەۆا باسشىلىق جاسايتىن گەيدار اليەۆ قورى قىزمەتىنىڭ بارلىق باعىتتارىنا ناقتى تالداۋ جاسالعانىن جازادى. «ماقالانىڭ قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ گەيدار اليەۆ قورىنىڭ ەستەلىك داپتەرىندەگى: «گەيدار اليەۆتىڭ ەسىمى ارقاشان دا حالقىنىڭ جادىندا. ول بار عۇمىرىن حالقىنىڭ وركەندەپ وسۋىنە, ەلىنىڭ قايتا جاڭعىرۋىنا سارپ ەتتى, سول سەبەپتى دە ەسىمى ماڭگىلىك جاساي بەرەدى» دەگەن جازبادان باستالاتىندىعىن جازادى اگەنتتىك ءتىلشىسى. «وقىرماندار نازارىنا قور اشىلعالى ءبىر جىل وتكەن سوڭ, 2005 جىلدىڭ مامىر ايىندا قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ ازەرباي جانعا ساپارى شەڭبەرىندە گەيدار اليەۆ قورىنا بارىپ, قورمەن تانىسقان سوڭ, ەستەلىك داپتەرىنە قازاق تىلىندە ءوز جۇرەگىنەن شىققان لەبىزىن جازىپ قالدىرعاندىعى جەتكىزىلەدى. قوردا گەيدار اليەۆ ءومىرىنىڭ ەڭ ماڭىزدى ساتتەرى جانە ازەربايجان تاريحىنىڭ تۇتاس كەزەڭى تۋرالى اۋقىمدى مالىمەتتەرمەن, ازەربايجان مەملەكەتىن قۇرۋشى پرەزيدەنت تۋراسىنداعى وي-پىكىرلەر, ول تۋرالى جازىلعان كىتاپتارمەن تانىسقان پرەزيدەنت ن.نازارباەۆ گەيدار اليەۆپەن وتكەن كەزدەسۋلەردە بىرگە تۇسكەن فوتوسۋرەتتەردى دە ۇلكەن قىزىعۋشىلىقپەن شولىپ شىقتى. نۇرسۇلتان نازارباەۆ قور پرەزيدەنتى مەحريبان اليەۆا حانىمعا قازاقستان تاۋەلسىزدىگىنىڭ سيمۆولى بولىپ تابىلاتىن ەسكەرتكىشتىڭ ماكەتىن تابىس ەتتى» دەلىنگەن ازەربايجان اگەنتتىگىنىڭ سايتىندا جاريالانعان ماقالادا. ودان ءارى قاراي باسىلىمنىڭ ەلدەگى ءىرى اقپارات قۇرالى ەكەنىن دە تىلگە تيەك ەتەدى. «قازاقستاننىڭ ەڭ تارالىمى كوپ باسىلىمى قوردىڭ ماقساتىن جەرىنە جەتكىزە جازىپ, ونىڭ ۇلى مەملەكەت قايراتكەرى گەيدار اليەۆتىڭ باي مۇرالارىن زەرتتەۋ جانە ناسيحاتتاۋ ماقساتىندا قۇرىلعاندىعىنا توقتالادى. قور قۇرىلعان كۇننەن باس­تاپ حالىقتىڭ ءال-اۋقاتىنا قىزمەت ەتكەن ءىرى اۋقىمداعى جوبالاردى جۇزەگە اسىراتىن ىزگى نيەت ميسسياسىنىڭ وكىلى بولىپ تابىلاتىندىعىن اتاپ كورسەتەدى». «ەگەمەن قازاقستاندا» جاريالانعان ماقالادا قور حالىقتىڭ ۇلتتىق-رۋحاني قۇندىلىقتارىنىڭ ساقتالۋىنا قولداۋ كورسەتۋمەن قاتار, شەت ەلدەردە ازەربايجاندى ناسيحاتتاۋ بويىنشا باعدارلامالار مەن جوبالاردى جاسايتىندىعى جانە جۇزەگە اسىراتىندىعى ايتىلادى» دەيدى اگەنتتىك ءتىلشىسى. وسىلايشا, «ەگەمەن قازاقستاننىڭ» بەتىندە «تۋىستىق تۋى» ايدارى اياسىندا جارىق كورگەن ماقالا باۋىرلاس ەلدىڭ بۇقارالىق اقپارات قۇرالدارىنان ورىن الىپ جاتسا, ءتۇبى ءبىردىڭ اقپارات كەڭىستىگىنىڭ دە ورتاق ەكەندىگىن كورسەتەدى. دايىنداعان جاقسىباي سامرات, «ەگەمەن قازاقستان»