اتامەكەندى اڭساعان اۋەن

ازات ەلدە شىرقالعانىنا 25 جىل تولدى الماتىدا كۇن سايىن ءتۇرلى مادەني شارالار ءوتىپ جاتادى. الايدا كەشە كەشكىسىن ستۋدەنتتەر سارايىن دۇبىرلەتكەن «كوش جانە كوشباسشى» ونەر دۋمانىنىڭ ورنى بولەك بولدى. ول  «قامشى» اقپاراتتىق اگەنتتىگى مەن «قازاقستان» ۇلتتىق تەلەارناسى ۇيىمداستىرعان شارا ەدى. وسىناۋ سالتاناتتى شاراعا  اقپارات جانە كوممۋنيكاتسيالار ءمينيسترى داۋرەن اباەۆ قاتىسىپ, قۇتتىقتاۋ ءسوزىن ايتتى: – ارداقتى اعايىن, قادىرمەندى باۋىرلار! تاۋەلسىزدىك جىلدارىنداعى وقيعالاردىڭ ءبىرى مەن بىرەگەيى شەت جۇرتتا جۇرگەن قانداستارىمىزدىڭ اتاجۇرتقا ورالۋى ەكەنى بەلگىلى. وسىناۋ تاريحي وقيعانىڭ باستاۋ العانىنا بۇگىن تۋرا 25 جىل تولدى. 1991 جىلى 18 قاراشادا مەملەكەت باسشىسىنىڭ باستاماسىمەن شەتەلدەگى قازاقتاردىڭ ەلگە ورالۋىن قامتاماسىز ەتەتىن قاۋلى قابىلداندى. «قۇدايعا شۇكىر, ءوز بيلىگىمىز ءوز قولىمىزعا ءتيدى. اتامەكەنگە كەلەمىن دەگەن اعايىندى اتا-بابا ارۋاعى الدان جارىلقاسىن!» دەگەن مەملەكەت باسشىسىنىڭ ءسوزى ۇلى كوشكە قوزعاۋ سالدى. تاعدىردىڭ جازۋىمەن الەمگە تارىداي شاشىراعان باۋىرلارىمىز وسى كەزدەن باستاپ اتاجۇرتقا بەت تۇزەدى. سودان بەرى 25 جىلدا قاراشاڭىراققا ورالعان قانداستار سانى 1 ميلليونعا جەتتى», – دەدى مينيستر. ۇلى كوشتىڭ شەجىرەسىنە از-كەم توقتالعان مينيستر, 2015 جىلى ەلگە 5 مىڭعا جۋىق قانداسىمىز كوشىپ كەلسە, تەك ۇستىمىزدەگى جىلدىڭ 9 ايىندا 24 مىڭ ادام ورالعانىن اتاپ ءوتتى. – الداعى ۋاقىتتا دا كوشىپ كەلەتىن اعايىنداردىڭ سانى ارتا بەرەتىن بولادى. وسىنىڭ بارلىعى ساناۋلى كۇننەن كەيىن 25 جىلدىعىن اتاپ وتەتىن تاۋەلسىزدىگىمىزدىڭ جەڭىسى. مەملەكەت باسشىسى ايتقانداي, بۇل قادام جاڭىلمايدى, شەكارا جابىلمايدى. ۇلى كوش جالعاسا بەرەدى, – دەدى داۋرەن اباەۆ. ۇلت بىرلىگى مەن «ماڭگىلىك ەل» يدەيا­سىن جۇزەگە اسىرۋدى مۇرات تۇتقان مادەني شارادا كوڭىل كوتەرۋدەن گورى, تاعدىرعا تاۋبە ايتۋ, تاۋەلسىزدىك بەدەرىندەگى بۇرالاڭ كەزەڭ, اتاجۇرتقا ات باسىن تىرەگەن اعايىننىڭ تولقى­نىستى ەستەلىكتەرى باسىم ءتۇسىپ جاتتى. ءاربىر اننەن كەيىن ەكرانداعى اسەرلى كورىنىستەر «قازاق كوشىنىڭ» شەجىرەسىن كوز الدىمىزعا اكەلدى. سيۋجەتتەردەن ۇلى كوشتىڭ باسىندا تۇرعان مۇستافا وزتۇرىك, حاليفا التاي سياقتى تۇلعالار باستاعان باۋىرلاردىڭ تۋعان جەردىڭ توپىراعىن قۇشا جىعىلۋىن كورگەندە اسەرلەنبەۋ مۇمكىن ەمەس-ءتى. قازاق پەن قازاقتى باۋىرلاستىرا تۇسكەن وسىناۋ باستاماعا مۇرىندىق بولىپ جۇرگەن «قامشى» اقپاراتتىق اگەنتتىگىنىڭ جەتەكشىسى ءبىلال قۋانىش: «بۇل شارانى ءبىز نە ءۇشىن وتكىزدىك؟ ءبىز –  اتامەكەنىمىز قازاقستانعا كەلدىك. وستىك! وندىك! وسىنى پاش ەتكىمىز كەلدى. ەڭبەگىمىز اقتالدى دەپ ويلايمىن. حالىق ءدان ريزا. بۇل شارانى – «قازاق كوشىنىڭ» 25 جىلىنا تاريحي باعا بەرۋ جانە قاراشاڭىراققا ۋىق بولىپ قادالعان ميلليوننان استام قازاقتىڭ ەل مەن ەلباسىنا العىس ايتۋى دەپ قابىلداعان ءجون. العىستى تەك جالاڭ سوزبەن عانا ەمەس, ەلگە كەلىپ ءوسىپ-ونگەن, جەتىستىككە جەتكەن اعايىننىڭ جارقىن بەت-بەينەسىمەن كورسەتكىمىز كەلدى. كونتسەرت اياقتالعاننان كەيىن دە كوزىنە جاس الىپ جۇرگەن ادامداردى كورىپ, بۇل باستامانى بەكەر قولعا الماعانىمىزدى سەزىندىك. كونتسەرتتىڭ ەڭ ءبىر اسەرلى تۇسى قۋانىش التىباەۆتىڭ اقتامبەردى جىراۋدىڭ ماقامىنا سالىپ ورىنداعان «تاۋەلسىزدىك تولعاۋىمەن» اياقتالۋى بولدى. تىڭدارمان جانىن تەبىرەنتتى»,  – دەدى. اقيقاتىندا تالاي اعايىننىڭ جانىن تەبىرەنتىپ, ساعىنىشتارىن تەربەگەن بۇل كونتسەرتتە ەلىمىزگە قانداستارىمىز عانا ەمەس, رۋحاني بايلىعىمىز, ونەرىمىز, ءتىپتى اندەرىمىزدىڭ, كەيىنگىلەر ەستىمەگەن جىرلاردىڭ دا ورالعانىن كوردىك. ويعا وي, اقىلعا اقىل قوسىلعانىن سەزدىك. الىستان كەلگەن اعايىننىڭ دا, وسىنداعى قانداستاردىڭ دا ساناسىنداعى ءبىر تىلەك – ەلدىڭ اماندىعى بولسا, سول ءان مەن كۇي تىلىمەن اۋەلەپ جاتتى. ساحنادا سالتانات قۇرعان مايرا مۇحاممەد, رامازان ستامعازيەۆ, «قوڭىر» توبى, «الاش ۇلى», شابا ادەنقۇل سىندى ونەر ساڭلاقتارى مەن ەسترادالىق توپتار كوپشىلىكتىڭ كوڭىلىن ءبىر كونشىتىپ تاستادى. سول سياقتى مۇراتبەك سارباسوۆ, يبراگيم ەسكەندىر, كۇيشى ەركىن ەرگەن, بيبىگۇل قيلىمحان, وزگەرىس شەرىكباي, اينۇر قاجيموللا, قۋانىش التىباەۆتاردىڭ ونەرى دە ءبارىمىزدى ريزا قىلدى. وسىناۋ ونەر – قازاق مادەنيەتى قورجىنىنىڭ بايىتا تۇسسە, وندا «كوشى-قون» ساياساتى ايرىقشا ءرول ات­قار­عانىن بارشامىز مويىنداي­مىز. بۇل از دەسەك,  شەتەلدە ءومىر ءسۇ­رىپ جاتقان قازاقتار قازاقستانمەن كور­شىلەس شەكارادا تۇرىپ جاتقاندىقتان ولاردىڭ اراسىنداعى اقىن-جازۋشىلار, عالىمدار اتامەكەنگە قۇر قول كەلمەدى. بۇل قازاقستان ءۇشىن ۇلكەن رۋحاني دەمەۋ ەكەنىن ەشكىم جوققا شىعارا المايدى. ءتىپتى باعالى جادىگەرلەر, قىمبات مۇراعاتتار, قۇندى بۇيىمدار دا ەلگە بەت بۇرعان قازاق­تىڭ قورجىنىمەن اتاجۇرتقا كەلىپ جاتىر. ەكونوميكالىق ءوسىم­گە قوسقان ۇلەستەرى ءوز الدىنا. سون­دىقتان دا تاقىرىپتىق كونتسەرتكە جينالعان جۇرتشىلىق مۇنى قاتار­داعى كوپ شارانىڭ ءبىرى دەپ سانامادى. بۇل – كونتسەرتتىڭ اياسى جوعارى, ويىن-ساۋىق دەڭگەيىنەن بيىك, ياعني تاۋەل­سىزدىك جىلدارىندا اتاجۇرتقا قونىس اۋدارعان قانداستارىمىزدىڭ كەۋدەسىندەگى قۋانىشى ەدى. ايناش ەسالي, «ەگەمەن قازاقستان» الماتى