9 ملرد تەڭگە ۇكىمەتتىك ەمەس ۇيىمدارعا ءبولىندى

سوناۋ 2000 جىلدىڭ قازانىندا ەل پرەزيدەنتى ءوزىنىڭ جىل سايىن جاسايتىن جولداۋىندا الەۋمەتتىك ماڭىزى جوعارى جوبالاردى جۇزەگە اسىرۋمەن اينالىساتىن ۇەۇ-عا ارنالعان گرانت جۇيەسىن جەتىلدىرۋدىڭ قاجەتتىلىگى تۋرالى ايتقان بولاتىن. سودان بەرى تۇڭعىش پرەزيدەنت قو­رى­نىڭ قارجىلىق قولداۋىمەن  ەلىمىز­دەگى 200-دەن استام قوعامدىق ۇيىمنىڭ جۇمىسىنا ناقتى كومەك بەرىلدى. ۇكىمەتتىك ەمەس ۇيىمدار مەن ۇكىمەت اراسىنداعى ارىپتەستىك وڭ ناتيجەسىن بەرىپ, كۇنى بۇگىنگە دەيىن 9 ملرد تەڭگە قاراجاتتى قۇرايتىن الەۋمەتتىك جوبالار جۇزەگە اسىرىلعان. وسى جولداۋدان كەيىن الماتى قالاسىنداعى باستاماشىل توپ ۇەۇ-نىڭ مەملەكەتتىك مەكەمەلەرمەن جانە حالىقارالىق ۇيىمدارمەن ءوزارا ىسكەرلىگىن, ىنتىماقتاستىعىن ارتتىرۋ ماقساتىندا ديالوگ الاڭىنىڭ قۇرىلۋىنا مۇرىندىق بولىپ, بىرنەشە ءىس-شارا وتكىزگەن بولاتىن.  ويتكەنى, ەلىمىزدەگى ۇكىمەتتىك ەمەس ۇيىمداردىڭ جۇمىسى ءالى دە بولسا اشىق ەمەس, مەملەكەتتىك الەۋمەتتىك تاپسىرىس دۇرىس جۇرگىزىلمەگەن, باسقا ۇكىمەتتىك ۇيىمدارمەن بايلانىسى جەتىلمەگەن جانە ەڭ باستىسى, قوعامدىق سالانىڭ جۇمىسىنا قىزىعاتىن ادامدار جوقتىڭ قاسى. مىنە, وسى ماسەلەلەر جيناقتالا كەلە, ەلىمىزدە العاش رەت ۇەۇ جارمەڭكەسى مەن فورۋمىن ۇيىمداستىرۋعا سەبەپ بولدى. الەۋمەتتىك جوبالار مەن يدەيا­لاردى ىسكە اسىرۋعا باعىتتالعان بۇل جارمەڭكە ۇەۇ-عا ءتيىمدى بولعالى تۇر. كەلەسى جىلدان باستاپ تابىستى جۇمىس ىستەگەن ۇكىمەتتىك ەمەس ۇيىمدارعا ارنايى سىياقى تاعايىندالماق. تاۋەلسىزدىكتىڭ 25 جىلدىعىنا وراي ۇيىمداستىرىلعان ۇكىمەتتىك ەمەس ۇيىمداردىڭ حالىقارالىق جارمەڭكەسىندە ءمالىم بولعان بۇل جاڭالىق الەۋمەتتىك سالالارعا سونى سەرپىن بەرمەك. حالىقارالىق جارمەڭكە مەن فورۋمدى وتكىزىپ وتىرعان «اقپاراتتىق-رەسۋرستىق ورتالىقتىڭ» ەسەبىنشە, الماتىدا 500 ۇكىمەتتىك ەمەس ۇيىم جۇمىس ىستەيدى. بۇل ۇيىمداردىڭ باسىم بولىگى ءارتۇرلى الەۋمەتتىك توپتاردىڭ مۇددەسىن قورعاسا, تاعى ءبىر ۇلكەن بولىگى دەنساۋلىق ساقتاۋ, جاستار ساياساتىن قولداۋ جانە تاعى باسقا باعىتتاردىڭ جۇمىسىنا قوزعاۋ سالىپ, ىلگەرىلەتۋگە ارنالعان. فورۋمدا 25 جىل بۇرىن قۇرىلعان, تاۋەلسىزدىكپەن تۇيدەي قۇرداس Special Olympics ۇيىمىنىڭ جۇ­مىسى كوپشىلىككە ۇلگى رەتىندە ۇسى­نىل­دى. وسى ۋاقىت ارالىعىندا تالاي مۇمكىندىگى شەكتەۋلى بالالاردىڭ ەم­دەلىپ, شيپا تابۋى­نا, اياعىنان تۇرۋىنا كومەكتەسىپ, ەلىمىزدە عانا ەمەس, شەتەلدە وتەتىن بايقاۋلاردان جەڭىمپاز بولىپ ورالۋىنا يگى ىقپالىن تيگىزگەن. قوعامدىق ۇيىمنىڭ تاعى ءبىر وكىلى ليۋبوۆ چەرۆوننىح وزدەرى اشقان ورتالىقتا 800 بالانىڭ تىركەۋدە تۇرعانىن, ولاردىڭ باسىم بولىگى ينتەرنات, تۇزەتۋ مەكتەپتەرىنىڭ ءتار­بيە­لەنۋشىلەرى ەكەنىن ايتادى. ال, ولاردىڭ ماقساتى, سپورت ارقىلى بالا­لاردىڭ قوعامعا بەيىمدەلۋىنە جاعداي جا­ساۋ ەكەن. فورۋم-جارمەڭكەگە قاتىسقان ءدىن ىستەرى جانە ازاماتتىق قوعام ۆيتسە-مي­نيسترى ابزال نۇكەنوۆ: «ءبىز ناقتى الەۋمەتتىك جوبالارمەن اينالىساتىن ۇيىم­دارمەن جۇمىس ىستەۋگە ءازىرمىز. وسى مۇددەمەن جۇمىس ىستەيتىن باسقا سا­لالاردى دا ۇمىتپايمىز. ول ءۇشىن گرانتتىق, سىياقىلىق ارنايى جوبالار قاراستىرىلعان», دەيدى. ۇكىمەتتىك ەمەس ۇيىمداردىڭ حالىق­ارا­لىق فورۋمى ەلىمىزدىڭ ءار وڭىرىنەن كەلگەن 200-گە جۋىق بەلسەندى وكىلدىڭ باسىن قوستى. ولار بۇگىنگى قوعامدا الەۋمەتتىك يننوۆاتسيانىڭ دامىپ, ازاماتتاردىڭ بەلسەندىلىگى مەن باستاماشىلدىعىنىڭ ارتىپ كەلە جاتقانىنا ريزاشىلىق ءبىلدىردى. جارمەڭكە-فورۋمنىڭ اياسىندا كورمەلەر, ترەنينگتەر, شەبەرلىك ساباقتارى ۇيىمداستىرىلدى. ايگۇل احانبايقىزى, «ەگەمەن قازاقستان» الماتى