بالالارعا ارنالعان حالىقارالىق كونفەرەنتسيا وتپەك

ەلىمىزدە جىل سايىن بالا تۋ كورسەتكىشى وڭ سيپاتقا يە بولىپ كەلەدى. بيىلعى جىلدىڭ 10 ايىنىڭ قورىتىندىسى بويىنشا ەلىمىزدە 308 297 نارەستە دۇنيەگە كەلگەن. بۇل تۋرالى ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا قر پارلامەنتى ءماجىلىسىنىڭ دەپۋتاتى, قازاقستانداعى بالا قۇقىقتارى جونىندەگى ۋاكىل زاعيپا باليەۆا مالىمدەدى, دەپ حابارلايدى Baq.kz. «قازاقستاندا 5 460 449 بالا بار. 2016 جىلدىڭ 10 ايىنىڭ قورىتىندىسى بويىنشا 308 297 بالا دۇنيەگە كەلگەن. ولارعا ءتيىستى كوڭىل ءبولىنۋى كەرەك», - دەدى دەپۋتات. سونىمەن قاتار, زاعيپا باليەۆا الداعى ۋاقىتتا بالالارعا ارنالعان حالىقارالىق كونفەرەنتسيا وتەتىنىن اتاپ ءوتتى. وندا قوعامدا شەشىمىن تاپپاعان ماسەلەلەر تالقىلاناتىن بولادى. «21-22 قاراشا كۇندەرى ەلىمىزدە بالالارعا ارنالعان «مەيىرىمدى قازاقستان» حالىقارالىق كونفەرەنتسياسى وتەدى. وندا وزەكتى ماسەلەلەر تالقىعا سالىنادى. قازىر 12 تاقىرىپتى جاريالادىق. الەمنىڭ 35 ەلىنەن جينالاتىن ساراپشىلار وسى ماسەلەلەر جونىندە ءوز ويلارىن ورتاعا سالادى», - دەدى حالىق قالاۋلىسى. ال قر دەنساۋلىق ساقتاۋ جانە الەۋمەتتىك دامۋ مينيسترلىگى الەۋمەتتىك قىزمەتتەر دەپارتامەنتىنىڭ ديرەكتورى اجار تولەعاليەۆا قازاقستاندا جىل سايىن بالا تۋ كورسەتكىشىنىڭ وڭ سيپاتقا يە بولىپ كەلە جاتقانىن, انا مەن بالا ءولىمىنىڭ ازايعانىن مالىمدەدى. «ەلىمىزدە جىل سايىن 400 مىڭنان استام ءسابي دۇنيەگە كەلەدى. قازاقستاندا تۋ كورسەتكىشى جىلدان جىلعا ءوسىپ وتىر. بۇل كورسەتكىش حالىقتىڭ الەۋمەتتىك-ەكونوميكالىق جاعدايىنىڭ جاقسارعاندىعىن كورسەتەدى. ەكىنشى – انا مەن بالانىڭ ءولىم-ءجىتىم كورسەتكىشى. ول جىل سايىن 10%-عا تومەندەپ كەلەدى. قازاقستان وسىنداي كورسەتكىشكە جەتكەن ورتا ازياداعى بىردەن ءبىر مەملەكەت. 1990 جىلدان بەرى انا مەن بالا ءولىم-ءجىتىمى 30%-عا تومەندەدى. 2016 جىلدىڭ 9 ايىنىڭ قورىتىندىسى بويىنشا ءولىم-ءجىتىم 8,6%-عا ازايعان», - دەدى دەپارتامەنت ديرەكتورى.