تارازدىق وقۋشى ستيۆەن حوكينگپەن كەزدەسەدى

الەمگە اتاقتى عالىم, بريتانيانىڭ استروفيزيگى ستيۆەن حوكينگ تارازدا تۇراتىن 14 جاستاعى يسااك مۋستوپۋلومەن 2017 جىلدىڭ 23 قاڭتارىندا كەزدەسەتىن بولدى. بۇل تۋرالى بريتانيا كەڭەسىندەگى دەرەككە سۇيەنە وتىرىپ, "CentrAsia Group" جشس كومپانيالار توبىنىڭ دامۋ جونىندەگى ديرەكتورى جۇماتاي ءسالىموۆ ءمالىم ەتتى, دەپ حابارلايدى قازاقپارات. سال اۋرۋىنا شالدىققان يسااك تاراز قالاسىنداعى №13 مەكتەپتە وقيدى. بىراق, سىرقاتىنا قاراماستان ول 2015 جىلى وقۋشىلار اراسىنداعى ۇلتتىق يننوۆاتسيالار كونكۋرسىنىڭ ارنايى سىيلىعىنا يە بولدى. سودان بەرى يسااكتى قازاقستاننىڭ تۇكپىر-تۇكپىرى, ءتىپتى, شەنەۋنىكتەر دە تانىپ, بىلە باستادى. سول كەزدە ينۆەستيتسيالار جانە دامۋ مينيسترلىگىن باسقارعان اسەت يسەكەشەۆ تە يسااكپەن تانىسىپ, ونىمەن تۇسكەن سۋرەتىن بۇكىل الەۋمەتتىك جەلىگە تاراتقان بولاتىن. ناتر مەن قازاقستانداعى بريتانيا كەڭەسى ۇيىمداستىرعان وقۋشىلار اراسىنداعى يننوۆاتسيالار كونكۋرسىنا ءوتىنىم بەرگەن كەزدە, يسااك ءوز بەينەروليگى ارقىلى «گارمون تەورياسى» اتتى جوباسىن ۇسىنا وتىرىپ, اتاقتى ستيۆەن حوكينگپەن كەزدەسۋدى ارماندايتىنىن ايتقان ەدى. جارىستىڭ ۇيىمداستىرۋشىسى بولعان تەحنيكالىق دامۋ جونىندەگى ۇلتتىق اگەنتتىكتىڭ سول كەزدەگى توراعا ورىنباسارى قىزمەتىن اتقارعان جۇماتاي ءسالىموۆ جاس بالانىڭ ارمانىن ورىنداۋ ءۇشىن بارىمدى سالامىن دەپ ۋادە بەرگەن بولاتىن. ال, وتە اۋىر اميوتروفيكالىق سكلەروز اۋرۋىنا شالدىققان ستيۆەن حوكينگتى تانىستىرۋدىڭ دا قاجەتى جوق. ول قازىر كەمبريدج ۋنيۆەرسيتەتىنىڭ پروفەسسورى, اعىلشىننىڭ اتاقتى عالىمى.  18 جاسىندا ستيۆەن حوكينگتىڭ دەنساۋلىعىندا اميوتروفيكالىق سكلەروزدىڭ العاشقى بەلگىلەرى بىلەنە باستايدى دا, كوپ ۇزاماي ول مۇلدە سال دەرتىنە شالدىعادى. تاماعىنا جاسالعان وپەراتسيادان كەيىن 1985 جىلى ول سويلەۋ قابىلەتىنەن ايىرىلادى. دوستارى وعان سويلەۋگە مۇمكىندىك بەرەتىن سينتەزاتور سىيلايدى. ستيۆ تەك وڭ قولىنداعى سىلتەۋشى ساۋساعىمەن قيمىلداتا الادى. سوعان قاراماستان, عىلىمنان قول ۇزبەي, كىتاپ جازىپ, ءتىپتى 2009 جىلى عارىشقا ۇشىپ كەلگەن.