«جايساڭ» ازىرگە جايسىز بولىپ تۇر

دەپۋتات گلەب ششەگەلسكي پرە­مەر-مينيستر باقىتجان ساعىن­تاەۆ­تىڭ اتىنا ساۋال جولداپ, «باتىس قىتاي – باتىس ەۋروپا» كولىك جولىمەن قازاقستاننان رەسەيگە شىعاتىن «جايساڭ» شەكارالىق بەكەتىندەگى جايسىزدىق تۋرالى بايانداعان ەدى. دەپۋتاتتىڭ ايتۋىنا قاراعاندا, قازاقستان جاعى 227 ملن تەڭگە قارا­جات سالىپ, جولدى ءۇش جولاقتان التى جولاققا اۋىستىرىپ, بەكەتتەن بوگەلمەي ءوتۋ ماسەلەسىن شەشىپ قوي­عان. وكىنىشكە قاراي, رەسەي جاعىندا مۇن­داي جاعداي جوق, سونىڭ كەسىرىنەن ەكى ەلدىڭ بەكەتى اراسىنداعى بەيتاراپ ايماقتا كولىك تولىپ كەتەدى ەكەن. مۇندا جەڭىل ماشينالار 7-8 ساعاتتاپ, ال جۇك ماشينالارى تاۋلىكتەپ تۇرىپ قالاتىن كورىنەدى. جۇرگىنشىلەرگە تاماق ساتاتىن ورىندار تۇگىل قاراپايىم گيگيەنالىق قاجەتتىلىكتى وتەيتىن جايلار دا قا­راس­­تىرىلماعان. سونىڭ كەسىرىنەن ءبىزدىڭ كوپ اقشا ءبولىپ, جاعدايدى جاقسارتقانىمىز دالاعا كەتىپ تۇر. وسىنى رەسەي فەدەراتسياسىنىڭ ۇكىمەتىمەن كەلىسىپ, ەكىجاقتى شەشۋدى قاراستىرساڭىز ەكەن, دەگەن ەدى دەپۋتات ۇكىمەت باسشىسىنا. بۇل ساۋالدى قولداپ بىرنەشە دەپۋتات ءوز قولدارىن قويعان-تىن. ساۋالعا جۋىردا پرەمەر-مي­نيستر باقىتجان ساعىنتاەۆتان جاۋاپ كەلدى. وندا اتالمىش جولدى كەڭەيتۋ ماقساتىمەن قازاقستان, قىتاي جانە رەسەي تاراپتارى مەموراندۋم قابىلداعانى ايتىلعان. وسى مەموراندۋمعا سايكەس قىتاي جاعى وزىنە تيەسىلى مىندەتتى تولىعىمەن ورىنداپ, ءوز اۋماعى ارقىلى وتەتىن 3425 شاقىرىمدىق جولدى تالاپقا سايكەس قايتا جاراقتاۋدى اياقتاعان. قازاقستان جاعى دا وزىنە تيەسىلى ءدالىزدىڭ 2028 شاقىرىمىن تەگىس جاراقتاپ ۇلگەرگەن. قالعانىن ۇستىمىزدەگى جىلدىڭ سوڭىنا دەيىن بىتىرمەكشى. ال رەسەي جاعى سانكت-پەتەر­بۋرگتەن شىعىپ, ماسكەۋدى اينالىپ ءوتىپ, قازاقستان شەكاراسىنا دەيىن جەتەتىن جولدى تەك 2019 جىلى عانا اياقتاۋدى بەلگىلەپ وتىر. سونىڭ ىشىندە پەتەربۋرگتەن ماسكەۋدىڭ اينالما جولىنا دەيىنگى قاشىقتىق 2018 جىلى اياقتالسا, قالعانىن تەك 2019 جىلدىڭ اياعىنا دەيىن بىتىرمەك. رەسەيدىڭ ورىنبور قالاسىنان قازاقستان شەكاراسىنا دەيىن جەتەتىن 150 شاقىرىمدىق جولدىڭ ساپاسى تومەن. وسىنى ەسكەرىپ, قازان ايىندا استانا قالاسىندا بولعان ايماق­ارالىق ىنتىماقتاستىقتىڭ 13-فورۋمىندا قازاقستان مەن رەسەي تاراپتارى ۆەدومستۆوارالىق دەڭگەيدە «باتىس قىتاي – باتىس ەۋروپا» كولىك ءدالىزىنىڭ بويىنداعى ينفراقۇرىلىمداردى دامىتۋ ماسەلەسىن قاراستىرعان قۇ­جاتقا قول قويدى. بۇل قۇجات قازاقستان اۋماعىنداعى «جايساڭ» مەن رەسەي اۋماعىنداعى «ساگارشىن» شەكارالىق بەكەتتەرىندەگى وتكىزۋ مۇمكىندىكتەرىنىڭ ساپاسىن ارتتىرۋدى كوزدەيدى, دەلىنگەن جاۋاپتا. ءسويتىپ, «جايساڭ» بەكەتىندەگى جاعداي جاقىن ارادا جاقسارىپ قالاتىن شىعار دەگەن ءۇمىت بار.