گەرمانيا بيۋدجەتىنە قارجىنىڭ 80%-ءى شاعىن جانە ورتا بيزنەستەن تۇسەدى

«قازاقستان  90-شى جىلداردىڭ باسىندا بولعان كەدەيشىلىكتى ەڭسەردى. حالىقتىڭ كىرىسى كوبەيدى. ماسەلەن, سول كەزدە جان باسىنا شاققانداعى ىشكى جالپى ءونىم 300 دوللار شاماسىندا بولسا, ال 2015 جىلدىڭ قورىتىندىسى بويىنشا, بۇل كورسەتكىش  10 مىڭ دوللارعا جەتتى.  كەدەيشىلىك حالىقتىڭ 47 %-ءىن قۇراعان كەزدەر دە بولدى. بۇگىندە  بۇل كورسەتكىش 2-3%-ءتىڭ اينالاسىندا تۇر». مەملەكەتتىك حاتشى گۇلشارا ابدىقالىقوۆا گەرمانيا فەدەراتيۆتىك رەسپۋبليكاسى پارلامەنتى بۋندەستاگىنىڭ دەپۋتاتى سيبيللە پفايفەرمەن كەزدەسۋى كەزىندە وسىلاي دەدى. كەزدەسۋ بارىسىندا قازاقستان مەن گەرمانيا اراسىنداعى ساياسي-ەكونوميكالىق ارىپتەستىككە توقتالعان گۇلشارا ابدىقالىقوۆا بۇل ەلمەن رۋحاني-مادەني سالاداعى دا ىنتىماقتاستىق جاقسى جولعا قويىلعانىن اتاپ ءوتتى. «ءبىز قازاقستاندا تۇراتىن ەتنيكالىق نەمىستەرگە دە ايرىقشا كوڭىل بولەمىز. قازىر قازاق جەرىندە 180 مىڭ-عا تارتا نەمىس تۇرادى. ەلىمىزدىڭ كوپ وڭىرىندە نەمىس ورتالىقتارى بار. ولارعا نەمىس ۇلتىنىڭ مادەنيەتىن, ءتىلىن, سالت-ءداستۇرىن دامىتۋ ءۇشىن بارلىق جاعداي جاسالعان. ال بۇگىنگى كۇنگە دەيىن گەرمانياعا كەتكەن نەمىستەردىڭ سانى شامامەن 900 مىڭ ادامدى قۇرايدى. ءبىز ولارمەن دە بەلسەندى تۇردە ارىپتەستىك بايلانىس ورناتىپ كەلەمىز»,– دەدى گۇلشارا ناۋشاقىزى. سونداي-اق, مەملەكەتتىك حاتشى قازاقستاننىڭ گەرمانيامەن گەندەرلىك ساياسات توڭىرەگىندە دە ارىپتەستىك ورناتۋعا ءازىر ەكەندىگىن جەتكىزدى. «قازىر پارلامەنتتەگى ازاماتتاردىڭ 28 %-ءى,  بيزنەستە جۇرگەن جانداردىڭ 50 %-ءى ايەلدەر. شاعىن جانە ورتا كاسىپكەرلىك سالاسىنىڭ تىزگىنىن ۇستاعانداردىڭ 40 %-ءى دە نازىك جاندىلار. ءبىز گەرمانيانىڭ ۇلتتىق ءىرى كومپانيالارىنا ايەلدەردىڭ كوپتەپ جەتەكشىلىك ەتەتىنىن بىلەمىز. ياعني, سىزدەردىڭ  بۇل سالادا ۇلكەن تاجىريبەلەرىڭىز بار دەگەن ءسوز.  ەندەشە, بۇل باعىتتا جان-جاقتى ارىپتەستىك ورناتۋعا دايىنبىز», – دەدى گۇلشارا ابدىقالىقوۆا. سيبيللە پفايفەر ءوزىن ارنايى وسى ەلگە شاقىرىپ, قوناقجايلىق تانىتقانى ءۇشىن قازاقستان تاراپىنا العىسىن ءبىلدىردى.  «مەن قازاقستانعا مەملەكەتتىڭ ەكونوميكالىق تەتىگىن نىعايتۋ باعىتىنداعى تاجىريبەمىزبەن بولىسۋگە كەلدىم. بۇگىندە گەرمانيا بيۋدجەتىندەگى قارجىنىڭ  80 %-ءى شاعىن جانە ورتا بيزنەستەن تۇسەدى. ءبىز شاعىن جانە ورتا كاسىپكەرلىكتى, ونىڭ ىشىندە ەلدى مەكەندەردە ءوز كاسىپتەرىن دوڭگەلەتىپ وتىرعان ايەلدەرگە قولداۋ كورسەتۋگە, ءوزارا تاجىريبە الماسۋعا دايىنبىز. گەرمانيادا شاعىن جانە ورتا بيزنەستىڭ دامۋىنا ۇلەس قوساتىنداردىڭ 50 %-ءى ايەلدەر.  ولاردىڭ الەۋەتى - جوعارى, كىرىستەرى - تۇراقتى.  ياعني,  ايەل كاسىپكەرلەر گەرمانيا ەكونوميكاسىنىڭ دامۋىنا بەلگىلى ءبىر مولشەردە قوماقتى قوسىپ وتىر», – دەدى بۋندەستاگ دەپۋتاتى. سونداي-اق, ول گەرمانيانىڭ ورتا جانە كاسىپكەرلىكتى دامىتۋعا ايرىقشا كوڭىل ءبولىپ وتىرعانىن, بۇل ماقساتتا مەملەكەتتىك قولداۋ كورسەتىلەتىنىن,  ماسەلەن, كاسىپكەرلىك سالاسىندا جۇرگەن ازاماتتارعا بەرىلەتىن نەسيە وتە تومەن % -پەن بەرىلەتىنىن جەتكىزدى.