ەلباسى «سامۇرىق-قازىنا» توراعاسىن قابىلدادى

ەلباسى «سامۇرىق-قازىنا» ۇلتتىق ءال-اۋقات قورى» اق باسقارماسىنىڭ توراعاسى ومىرزاق شوكەەۆتى قابىلدادى. بۇل تۋرالى اقوردانىڭ ءباسپاسوز قىزمەتى حابارلادى. كەزدەسۋدە ءو.شوكەەۆ مەملەكەت باسشىسىنا «سامۇرىق-قازىنا» اكتسيونەرلىك قوعامىنىڭ بيىلعى 9 ايدا اتقارعان جۇمىسىنىڭ قورىتىندىسى, سونداي-اق ترانسفورماتسيالاۋ جانە جەكەشەلەندىرۋ باعدارلامالارىنىڭ ىسكە اسىرىلۋ بارىسى تۋرالى باياندادى. اتالعان كەزەڭدە قوردىڭ قارجىلىق جانە وندىرىستىك كورسەتكىشىنىڭ ءوسىمى وڭ قارقىن العانى بايقالادى. ماسەلەن, ونىڭ تابىسى بىلتىرعىمەن سالىستىرعاندا 15%-عا ءوستى. جەكەشەلەندىرۋ باعدارلاماسى اياسىندا قور توبىنىڭ 216 نىسانىن باسەكەلىك ورتاعا شىعارۋ جوسپارلانىپ وتىر. بۇگىنگى كۇنى ەكونوميكانى جاڭعىرتۋ ماسەلەلەرى جونىندەگى مەملەكەتتىك كوميسسيا 133 اكتيۆتىڭ ساتىلۋ ءادىسىن ماقۇلدادى. قازىردىڭ وزىندە جالپى قۇنى 7,4 ملرد تەڭگە بولاتىن 39 اكتيۆ ساتىلعان. نۇرسۇلتان نازارباەۆ «سامۇرىق-قازىنا» اكتسيونەرلىك قوعامىنىڭ ترانسفورماتسيالاۋ باعدارلاماسىنىڭ تيىمدىلىگىن ارتتىرىپ, ناقتى ناتيجەلەرگە قول جەتكىزۋ قاجەتتىگىنە نازار اۋداردى. كەزدەسۋ قورىتىندىسى بويىنشا ەلباسى بىرقاتار تاپسىرما بەردى.