قازاقستاندىق بيزنەسكە 8,61 ملرد. تەڭگە بولىنەدى

«بايتەرەك» ۇلتتىق باسقارۋشى حولدينگى» اق باسقارماسىنىڭ توراعاسى ەربولات دوساەۆ ەۋروپا قايتا قۇرۋ جانە دامۋ بانكىنىڭ ءبىرىنشى ۆيتسە-پرەزيدەنتى فيل بەننەتپەن كەلىسسوز جۇرگىزدى. "تاراپتار شاعىن جانە ورتا كاسىپكەرلىكتى دامىتۋ, ۇلتتىق ۆاليۋتادا قورلاندىرۋدى تارتۋ, تۇرعىن ءۇي قۇرىلىسىن قارجىلاندىرۋ سالاسىنداعى ىنتىماقتاستىق, ينۆەستيتسيالىق جوبالاردى دايىنداۋ مەن قۇرىلىمداۋ, مەملەكەتتىك اكتيۆتەردى جەكەشەلەندىرۋ, سونداي-اق ساقتاندىرۋ ونىمدەرىن دامىتۋ سالاسىنداعى ىنتىماقتاستىق ماسەلەلەرىن تالقىلادى. كەلىسسوزدەر بارىسىندا ەربولات دوساەۆ ينۆەستيتسيالىق جانە ينفراقۇرىلىمدىق جوبالار بويىنشا ءوزارا ءتيىمدى ىنتىماقتاستىقتى كەڭەيتۋ, شاعىن جانە ورتا بيزنەس وكىلدەرىن قاشىقتان وقىتۋ جونىندەگى وڭىرلىك ءوفيستى قۇرۋ, سونداي-اق حولدينگتىڭ ەنشىلەس ۇيىمدارىن جەكەشەلەندىرۋ جونىندەگى جوسپارلاردى ىسكە اسىرۋ بويىنشا ەقدب-نىڭ تاجىريبەسىن (تەحنيكالىق كومەك) تارتۋدىڭ ماڭىزدىلىعىن اتاپ ايتتى",- دەلىنگەن حولدينگ ءباسپاسوز قىزمەتى تاراتقان اقپاراتتا. حولدينگ اقپاراتىنا سايكەس, فيل بەننەت ورنىقتى جانە ينكليۋزيۆتى ەكونوميكانى قۇرۋ ەقدب ءۇشىن ءتۇيىندى باسىمدىلىق بولىپ تابىلاتىندىعىن تىلگە تيەك ەتكەن. سونداي-اق ەقدب-نىڭ ۆيتسە-پرەزيدەنتى قازاقستاندىق كاسىپكەرلەردى قولداۋعا دايىن ەكەندىگىن ايتىپ, شاعىن كاسىپكەرلەر دەڭگەيىندە قارجىلاندىرۋعا قولجەتىمدىلىكتى جاقسارتۋ جانە جەرگىلىكتى ۆاليۋتادا قارىز بەرۋ ماسەلەسىن قوزعاعان. كەزدەسۋ بارىسىندا ەۋروپا قايتا قۇرۋ جانە دامۋ بانكى, حالىقارالىق قارجىلىق كورپوراتسياسى (IFC), «بايتەرەك» ۇلتتىق باسقارۋشى حولدينگى» اق مەن حولدينگتىڭ ەنشىلەس ۇيىمى «Kazakhstan Project Preparation Fund» (KPPF) اراسىندا ءوزارا تۇسىنۋشىلىك تۋرالى مەموراندۋمعا قول قويىلعان. مەموراندۋم اياسىندا يندۋستريالىق جانە ينفراقۇرىلىمدىق جوبالاردى, ونىڭ ىشىندە مەملەكەتتىك-جەكەمەنشىك سەرىكتەستىك جوبالاردى بىرلەسىپ ىزدەۋ, ىرىكتەۋ, قۇرىلىمداۋ جانە بىرلەسىپ ىسكە اسىرۋ ءۇشىن تۇجىرىمدامالىق تاسىلدەردى ىسكە اسىرۋ باعىتىندا ديالوگتىق پلاتفورما قۇرىلاتىن بولادى. سونىمەن قاتار حولدينگتىڭ ەنشىلەس ۇيىمى «دامۋ» قورى ەقدب-نىڭ قازاقستاندىق بيزنەستى قولداۋ ءۇشىن 8,61 ملرد. تەڭگە بولەتىندىگى تۋرالى كەلىسىمگە قول قويدى. قۇجاتتى ەقدب ءبىرىنشى ۆيتسە-پرەزيدەنتى فيل بەننەت, «تسەنتركرەديت بانك» اق توراعاسى ۆلاديسلاۆ لي جانە «دامۋ» كاسىپكەرلىكتى دامىتۋ قورى» اق باسقارما توراعاسى قانىش تۋلەۋشين راسىمدەدى. قاراجات «دامۋ» قورىنىڭ كەپىلدىگىمەن «تسەنتركرەديت بانك» اق بولىنەدى. جالپى سوماسى 8,61 ملرد. تەڭگەنى قۇرايتىن قاراجاتتىڭ 6 ملرد. 750 ملن. تەڭگەسىن شاعىن جانە ورتا بيزنەس جوبالارىنا, 1 ملرد 860 ملن. تەڭگەسىن «بيزنەستەگى ايەلدەر» باعدارلاماسىنا بەرۋ كوزدەلگەن. كرەديت بەرۋدىڭ تالاپتارى: قارىزدىڭ ماكسيمالدى سوماسى - 900 ملن. تەڭگەگە دەيىن; كرەديت بەرۋ مەرزىمى 12 ايعا دەيىن; سىياقى مولشەرلەمەسى جىلدىق 16 پايىزعا دەيىن.