قازاقستان جاسىل ەكونوميكاعا ىقپال ەتەتىن زاڭ قابىلدادى

بۇگىن پارلامەنت سەناتىنىڭ جالپى وتىرىسىندا «پاريج كەلىسىمىن راتيفيكاتسيالاۋ تۋرالى» زاڭ جوباسى قابىلداندى. «2015 جىلعى 12 جەلتوقساندا پاريج قالاسىندا بۇۇ-نىڭ كليماتتىڭ وزگەرۋى تۋرالى نەگىزدەمەلىك كونۆەنتسياسىنىڭ 21-ءشى تاراپتار كونفەرەنتسياسىنىڭ قورىتىندىسىمەن پاريج كەلىسىمى قابىلداندى. قازاقستان كەلىسىمگە 2016 جىلعى 2 تامىزدا قول قويدى. بۇل اعىمداعى جىلدىڭ 5 قازانىندا پاريج كەلىسىمىنىڭ كۇشىنە ەنۋى ءۇشىن قاجەتتى شارتتارعا قول جەتكىزىلىپ,  قازىرگى تاڭدا اتالعان كەلىسىمدى جالپى شىعارىندىلار جيىنتىعى 60 پايىزدان اساتىن 86 ەل راتيفيكاتسيالادى», - دەدى زاڭ جوباسىن تانىستىرعان قر ەنەرگەتيكا ءمينيسترى قانات بوزىمباەۆ. ونىڭ ايتۋىنشا, پاريج كەلىسىمى جاھاندىق ورتاشا تەمپەراتۋرا ءوسىمىن يندۋسترياعا دەيىنگى دەڭگەيدەن 2 گرادۋستان تومەنىرەك دەڭگەيدە ۇستاۋعا, پارنيكتى گازدار شىعارىندىلارىن تومەن دەڭگەيىندە كليمات وزگەرۋىنىڭ قولايسىز اسەرلەرىنە بەيىمدەلۋ جانە السىزدىكتىڭ تومەندەۋىنە نەگىزدەلەدى. بۇل كەلىسىم جاھاندىق ورتاشا تەمپەراتۋرانىڭ جوعارىلاۋىنا جول بەرمەۋ باعىتىندا جۇمىس ىستەۋ, جاسىل ەكونوميكاعا قارجى كوزدەرىن كوپتەپ تارتۋ سەكىلدى نەگىزگى ماسەلەلەردى قامتىپ وتىر. كەلىسىم اياسىندا ءاربىر تاراپ ۇلتتىق دەڭگەيدە ايقىندالعان جوسپارلى جۇيەلى ۇلەسى تۋرالى حابارلاپ, ونى ورىندايدى. 5 جىلدا ءبىر رەت ەلدەر ۇلتتىق دەڭگەيدە انىقتالاتىن كەزەكتى ۇلەستەرىن ايقىندايدى. «قازاقستان 2015 جىلعى قىركۇيەكتە 2030 جىلعا دەيىنگى مەرزىمدە بازالىق 1990 جىلمەن سالىستىرعاندا پارنيكتى گازدار شىعارىندىلارىن شارتسىز تۇردە 15 پايىزعا جانە شارتتى تۇردە 25 پايىزعا قىسقارتۋ مىندەتتەمەسىن جاريالادى. ۇسىنىلعان ۇلەستەرگە قول جەتكىزۋ پاريج كەلىسىمىمەن زاڭدى تۇردە مىندەتتەلمەيدى. ولار ەرىكتى نەگىزدە ورىندالادى جانە حاتشىلىقتىڭ اشىق تىزىلىمىندە جاريالانادى», - دەدى ق. بوزىمباەۆ.