پولشا ەلشىسىمەن كەزدەستى

سەنات توراعاسى قاسىم-جومارت توقاەۆ پولشانىڭ قازاقستانداعى ەلشىسى ماچەي لانگتى ونىڭ ءبىزدىڭ ەلىمىزدەگى ديپلوماتيالىق قىزمەتىنىڭ اياقتالۋىنا بايلانىستى قابىلدادى. ق.توقاەۆ ەلشىنىڭ جەمىستى ەڭبەگىنە ريزاشىلىعىن جەتكىزە وتىرىپ, ونىڭ كاسىبي قىزمەتىنىڭ تابىستى بولۋىنا تىلەكتەستىگىن ءبىلدىردى. سەنات توراعاسى ءبىزدىڭ ەلدەرىمىز اراسىنداعى ىنتىماقتاستىققا جوعارى باعا بەردى. «قازاقستان پرەزيدەنتى نۇرسۇلتان نازارباەۆتىڭ بيىلعى تامىز­داعى پولشاعا مەملەكەتتىك ساپارى ءبىز­دىڭ قاتىناستارىمىزدى ءوزارا تۇسىنىستىك­تىڭ جاڭا ساپالىق تۇرعىداعى دەڭگەيىنە كوتەرۋگە مۇمكىندىك بەردى», – دەپ اتاپ ءوت­تى ق.توقاەۆ. پارلامەنتارالىق ىنتىماق­تاس­تىققا پولشا سەناتىنىڭ توراعاسى ستا­نيسلاۆ كارچەۆسكيدىڭ تاياۋداعى قازاق­ستانعا رەسمي ساپارى ەلەۋلى سەرپىن بەردى. ق.توقاەۆتىڭ ايتۋىنشا, ەۋروپالىق وداقپەن ستراتەگيالىق ارىپتەستىك تۇرعىسىندا دا پولشامەن ەكىجاقتى ىنتىماقتاستىقتى دامىتۋ اسا ماڭىزدى بولىپ وتىر. وسىعان بايلانىستى پولشا پارلامەنتىمەن قوسا, ەۋروپالىق وداققا  مۇشە مەملەكەتتەردىڭ زاڭ شىعارۋ ورگاندارىمەن قازاقستان مەن ەۋروپالىق وداق اراسىنداعى كەڭەيتىلگەن ارىپتەستىك جانە ىنتىماقتاستىق تۋرالى كەلىسىمنىڭ تەزىرەك راتيفيكاتسيالانۋىنا سەنىم ارتىلىپ وتىرعانى ايتىلدى, دەپ حابارلادى قازاقستان رەسپۋبليكاسى پارلامەنتى سەناتىنىڭ ءباسپاسوز قىزمەتى.