اسسامبلەيا كاسىپكەرلىكتى دامىتۋعا ۇلەس قوسادى

كەشە قازاقستان حالقى اسسامبلەياسىنىڭ پارلامەنت ماجىلىسىندەگى دەپۋتاتتىق توبىنىڭ وتىرىسى وتكىزىلدى. وتىرىستى اشقان دەپۋتاتتىق توپ­تىڭ جەتەكشىسى, ءماجىلىس دەپۋتاتى ساۋىتبەك ابدراحمانوۆ  توپتىڭ التىن­شى شاقىرىلىمداعى ەكىنشى سەسسيا­عا بەلگىلەنگەن جۇمىس جوسپارى تۋرالى حاباردار ەتتى. ءوزىنىڭ كىرىسپە ءسو­زىندە ءماجىلىس توراعاسىنىڭ ورىنباسارى ۆلاديمير بوجكو قازاقستان حالقى اسسامبلەياسىنىڭ كاسىپكەرلەر قاۋىم­داستىعىنىڭ قىزمەتى تۋرالى اڭگىمەلەپ بەردى. ءىس جۇزىندە ەلدىڭ ەتنومادەني بىرلەستىكتەرىنىڭ يندۋس­تريا­لاندىرۋدىڭ اۋقىمدى باعدارلاماسىنا قاتىسۋىن قامتاماسىز ەتەتىن قۇرىلىم جاسالعان. قاۋىمداستىق مەملەكەتتىڭ, بيزنەستىڭ, ەتنومادەني بىرلەستىكتەردىڭ ارىپتەستىگىن دامىتۋعا جۇيەلى نەگىزدە سەپتەسەتىن بولادى. قازاقستان حالقى اسسامبلەياسىنىڭ كاسىپكەرلەر قاۋىمداستىعى ۇلتتىق كاسىپكەرلەر پالاتاسىمەن بەلسەندى تۇردە ىنتىماقتاسا جۇمىس ىستەۋگە نيەتتى. تاۋەلسىزدىك جىلدارىنىڭ بارىندە ۇكىمەت مەملەكەت باسشىسىنىڭ كاسىپ­كەر­لىكتى ورنىقتى دامىتۋدىڭ ۇلگى­سىن قا­لىپتاستىرۋ جونىندەگى باس­تى با­عى­تىن تاباندى تۇردە جۇزەگە اسىرىپ كەلەدى. مەملەكەتتىڭ ەل ءۇشىن ەڭ قيىن كەزدىڭ وزىندە جاساعان باتىل قادام­دارى از ۋاقىتتىڭ اياسىندا وتان­دىق كاسىپ­كەرلەردىڭ ۇلكەن توبىن قالىپتاستىرۋعا مۇمكىندىك اشتى, دەدى دەپۋتاتتار الدىندا سويلەگەن سوزىندە ۇلتتىق كاسىپكەرلەر پالاتاسى باسقار­ماسىنىڭ توراعاسى ابىلاي مىرزاح­مەتوۆ. ول كاسىپكەرلىكتى دامىتۋدىڭ 10 قادامى تۋرالى جان-جاقتى ايتىپ بەردى. ولاردىڭ اراسىن­دا شاعىن كرەديتتەۋدى كەڭەيتۋ, حالىق­تى بيزنەستىڭ نەگىزدەرىنە ۇيرەتۋ, اۋىلشا­رۋا­شىلىق كووپەراتسياسىن دامىتۋ, باسەكەگە شىداس بەرەرلىك بيزنەس قالىپتاس­تىرۋ, ەكسپورتقا ەسەپتەلگەن ءونىم شى­عارۋ, كاسىپكەرلىكتى دامىتۋدىڭ وڭىرلىك كارتاسىن جاساۋ, مەملەكەتتىك ورگان­داردىڭ باقىلاۋ-قاداعالاۋ مىندەت­تەرىن قايتا رەتتەۋ, قىلمىستىق جانە اكىم­شىلىك زاڭدىلىقتى جۇمسارتۋ, بارلىق ۆەدومستۆولىق جانە ەنشىلەس قۇ­رى­لىم­داردىڭ نارىق قاعيداتتارىن بۇ­زۋىن تەكسەرۋ سياقتى قادامدار بار. وتىرىستا ءسوز العان حالىق قالاۋ­لى­لارى «اتامەكەن» ۇلتتىق پالاتاسىنىڭ قىز­مەتىن نەگىزىنەن ماقۇلدادى, كاسىپ­كەرلىك بەلسەندىلىكتى ودان ءارى دامىتا ءتۇسۋ جونىندە وزدەرىنىڭ ۇسىنىستارىن ايت­تى. عابيت ىسكەندەر ۇلى, «ەگەمەن قازاقستان»