"تارتىپكە ۇيرەنگەن بالا جامان جولعا تۇسپەيدى"

بولات كەنجەباەۆ ۇيىنە اۋىلداعى سپورت زالدان تۇنگى ساعات 22.00-گە قاراي ورالادى. ونىڭ وتباسىندا «اكەمىز نەگە كەشىگىپ جاتىر؟» دەپ ەشكىم ويلامايدى. بالالارى دا, جارى دا ونىڭ سپورت زالدا «كۋرسانتتارىمەن» بىرگە جۇرگەنىن ءبىلىپ وتىرادى. ۆلاديميروۆ اۋىلىندا سپورت زالعا كەلگەن مەك­تەپ وقۋشىلارىنىڭ بارلىعى دا وسىنداعى بولات كەنجەباەۆ باسقاراتىن «وليمپ» اسكەري-پاتريوتتىق كلۋبىنىڭ مۇشەسى بولىپ سانالادى. بۇل جاي ايتا سالۋ, تىركەي سالۋ ەمەس, شىنايى جۇمىس بار جەردە جالعاندىق جوق. سوندىقتان كلۋب مۇشەلەرىنىڭ بارلىعىن دا بولات «كۋرسانتتار» دەپ اتايدى. بيىل «وليمپ» اسكەري-پاتريوتتىق كلۋبىنىڭ قۇ­رى­ل­عانىنا 28 جىل بولىپتى, وسى ۋاقىت ىشىندە ودان ەكى مىڭنىڭ سىرتىندا اۋىل بالالارى تۇلەپ ۇشتى. قازىر ولار ەلىمىزدىڭ تۇكپىر-تۇكپىرىندە ءجۇرىپ جاتىر, ءتىپتى ۇستازىنا شەتەلدەردەن حابارلاساتىن كۋرسانتتارى دا جەتكى­لىكتى. بولات كەنجەباەۆ قوستاناي اۋدا­ن­ىنداعى ۆلاديميروۆ ورتا مەكتەبىندە اسكەري العاشقى دايىن­دىقتان ساباق بەرەدى. وسىدان 30 جىلداي بۇرىن اسكەر قاتارىنان ورالعان پراپورششيك جاس جىگىت اۋىل مەكتەبىنە مۇعالىم بولىپ ورنالاستى. كوپ ۇزاماي, 1988 جىلى ول «وليمپ» اسكەري-پاتريوتتىق كلۋبىن قۇردى. اسكەر مەن سپورت ەگىز ۇعىم. بولاشاق وتان قورعاۋشىلار شىمىر بولۋى ءتيىس. كلۋب قۇرىلعان العاشقى جىلدارى كەشكە قاراي سپورت زالدا 300-گە دەيىن وقۋشىلار مەن اۋىل جاستارى دايىندالاتىن. – بۇرىنعىداي ورتالىقتان كەلىپ تۇرعان جىلۋ جوق, سپورت زالى جىلى بولۋى ءۇشىن قىس بويى وتتى ءوزىمىز جاعىپ شىعامىز. بۇل وڭاي بولعان جوق, وتىن, كومىر دايىنداۋ كەرەك, ونى جاققاندى ايتساڭشى. سول قي­ىن­دىقتاردىڭ بارلىعىنان وتتىك, ءبى­راق ريزامىن. وكىنبەيمىن, قايتا ماقتانامىن. وتان قورعاۋدىڭ, وتان الدىنداعى اسكەري پارىز, پاتريوتيزم دەگەننىڭ نە ەكەنىن «وليمپتەن» شىققان بالالار ساناسىنا سىڭىرە ءبىلدىم, – دەيدى بولات كەنجەباەۆ. قازىر قوستاناي اۋدانىنداعى ۆلاديميروۆ سەلوسىن اتاسا الدىمەن اۋىزعا «وليمپ» اسكەري-پاتريوتتىق كلۋبى تۇسەدى. وسى وكرۋگتىڭ برەندى ىسپەتتەس. «مەن ەگەر زاكون قۋاتى قولىمدا بار كىسى بولسام, ادام مىنەزىن تۇزەپ بولمايدى دەگەن كىسىنىڭ ءتىلىن كەسەر ەدىم» دەگەن اباي اتامىزدىڭ ءسوزىن بولات ءپىر تۇتادى. – بۇرىن دا, قازىر دە «وليمپ» اسكەري-پاتريوتتىق كلۋبىنا كەلەتىن بالالاردىڭ باسىم كوپشىلىگى جايسىز وتباسىنان شىققاندار. قازىردە اۋىلدا ىشكىلىككە سالىنعان ۇلكەندەردىڭ بار ەكەنىن جاسىرمايمىن. ال مەن جاس­تاردى داعدىعا, تارتىپكە ۇيرەتەمىن. كەشكە ساباقتان, جۇمىستان كەيىن مىندەتتى تۇردە ولار سپورت زالعا كەلەدى, جۇدىرىقتا­سۋ, كۇ­رەستىڭ سامبو, دزيۋ-دو, قازاق كۇرەسى تۇرلەرىنەن جاتتىعادى. كلۋبتىڭ تولىپ جاتقان باعدارلامالارى بار, سولارعا قاتىسادى, سوسىن اكەسى مەن اناسى سەكىلدى باس­قا جولعا قاراۋعا, بوساڭسۋعا ولاردىڭ ۋا­قىتى دا بولمايدى. ەڭ باستىسى, ءتارتىپ ولار ءۇشىن ومىرلىك داعدى بولىپ قالادى, – دەيدى بولات بوريد ۇلى. وعان ۇستازدىڭ جارقىن مىسالى دا بار. قازىر «وليمپ» كلۋبىندا ءوزىنىڭ اننا فەديانينا دەگەن كومەكشىسى بار. ءوزىنىڭ شاكىرتى, استاناداعى ل.ن.گۋميلەۆ اتىنداعى ەۋرازيا ۋنيۆەرسيتەتىن ءبىتىرىپ, تۋعان اۋىلىنا كەلىپ, مەكتەپكە جۇمىسقا تۇردى. ۇستازىنىڭ شاقىرۋىمەن كەلدى. سامبودان سپورت شەبەرى. اۋىلدا وسى «وليمپ» كلۋبى كۋرسانتىنىڭ ءبىرى بولعان ميحايلعا تۇرمىسقا شىقتى, قازىر ءبىر ۇلى بار. – نەسىن جاسىرايىن, ميشانىڭ دا, انيانىڭ دا اتا-اناسى ءىشىپ كەتكەن. وزگەرگەن جوق, قازىر دە سولاي. مەن جاستارعا: «سەندەردىڭ جولدارىڭ – باسقا جول» دەپ ايتتىم. قازىر ەكەۋى تاپ-تاماشا وتباسى, سپورتشى, ناعىز پاتريوت بالالار, – دەيدى بولات بوريد ۇلى. نەگىزى پاتريوتتىق جۇ­مىس بو­لات كەنجەباەۆتىڭ بولمىسى دەۋگە بولادى. پاتريوتتىق سەزىمنىڭ ار جا­عىندا ادامگەرشىلىك, مەيىرىمدى­لىك, ەڭبەكقورلىق, تاباندىلىق دەگەن اسىل قاسيەتتەر جاتاتىنىن ول قاتارلاستارىنا دا, كۋرسانتتارىنا دا ءتۇسىندىرىپ كەلەدى. بوكەڭ اۋىلدان اسكەري بورىشىن وتەۋ­گە كەتىپ بارا جات­قان كۋرسانتتاردى شى­عارىپ سالۋدى ادەتكە اينالدىرعان. قوس­تانايعا اكە­لىپ, پويىزعا وتىرعىزىپ ءجى­بەرەتىنىن, جانىنا كلۋبتىڭ مۇشەلەرىن, اۋىل­دىڭ كۋرسانتتارىن ەرتىپ الاتىنىن قايتەرسىز. «وليمپ» كلۋبى وسى جىل­دار ىشىندە تالاي جورىقتارعا شىق­تى, تالاي بايقاۋلارعا قاتىستى. «وليمپ» كلۋبى 2014-2015 جىلدارى پاتريوتتىق تاربيە بەرۋ جونىندەگى جۇمىستار قورىتىندى­سى بويىنشا وبلىستا ءبىرىنشى ورىندى يەلەندى. ال رەسپۋبليكادا ونىڭ تاجىريبەسىن تاراتۋ جونىندە دە سەمي­نارلار وتكەنىن ماقتانىش ەتەدى. – وتانعا دەگەن پاتريوتيزم جالعان ۇران بولماۋى ءتيىس, ول كۇندەلىكتى ءتى­ر­لىكتەن باستالادى. تەك ەرىنبەۋ كەرەك, ءىسىڭدى دە, بالالاردى دا, بارلىعىن دا جاقسى كورە بىلسەڭ بولعانى, – دەپ اعىنان جارىلادى اڭقىلداعان بولات بوريد ۇلى. قازىر قاي اۋىلدان دا كەتۋشىلەر كوپ, كەلۋشىلەر از. ۆلاديميروۆ اۋىلى دا ۋاقىتتىڭ وسى كو­رىنىسىنەن شەت قالعان جوق. بولاتتىڭ «وليمپ» اسكەري-پاتريوتتىق كلۋبىندا بۇگىندە 135 وقۋشى مەن اۋىل جاستارى جاتتىعادى. ونىڭ وسى جانقيارلىق ءىسى وبلىس, اۋدان باسشىلىعىنىڭ نازارىنا ىلىگىپ, 2012 جىلى سپورت زالعا بيۋدجەت ەسەبىنەن ەۋروجوندەۋ جۇمىسىن جاساپ بەردى. قازىر كىشكەنتاي كۋرسانتتارى دا, ءوزى دە راحاتتانىپ قالدى, جىلى جەردە جاتتىعادى, پەش جاعۋدان قۇتىلدى. سپورت قۇرالدارىنىڭ بارلىعى دا بار. 7-8 جاسار كۋرسانتتاردى كومەكشىسى اننا فەديانينا جاتتىقتىرادى, ەرەسەك بالالاردى ءوزى باۋليدى. – مەن «ەگەمەن قازاقستان» گازەتى ارقىلى بۇكىل قازاقستاندىقتارعا اۋىل­دا بالالارعا ارنالعان اۋلا جانە اسكەري-پاتريوتتىق كلۋبتار قۇرىڭىزدار دەپ جار سالعىم كەلەدى. ونىڭ تاماشا ناتيجەسىن كورۋگە دە كەپىلدىك بەرەمىن, – دەيدى بولات كەنجەباەۆ. – تەمىردەي تارتىپكە ۇيرەنگەن, شىمىر, وزىنە سەنىمدى بالانىڭ جانى دا تازا بولادى. جانى تازانىڭ رۋحى دا مىقتى. ونداي جاس اداسۋعا ءتيىستى ەمەس. ءبىز اماناتقا قيانات جاسامادىق. بولات كەنجەباەۆتىڭ ءسوزىن وقىرمانعا سول كۇيىنشە جەتكىزۋدى ءجون كوردىك. ءنازيرا جارىمبەتوۆا, «ەگەمەن قازاقستان» قوستاناي وبلىسى, قوستاناي اۋدانى, ۆلاديميروۆ سەلوسى