وقو-نىڭ سوزاق اۋدانىندا كەلەسى جىلدان التىن ءوندىرۋ باستالادى

سوزاق اۋدانىندا كەلەسى جىلدان باستاپ التىن وندىرىلەدى. بۇل تۋرالى اۋدان اكىمى ماقسات يساەۆتىڭ ەل تاۋەلسىزدىگىنىڭ 25 جىلدىعىندا اتقارىلعان شارۋالاردى بايانداعان ءباسپاسوز بريفينگىندە ايتتى. وسى ارالىقتا جاسالعان قىرۋار شارۋالاردى تىزبەكتەپ شىققان اۋدان باسشىسىنىڭ الداعى جوسپارلارى جەتەرلىك. مەتالل وندىرۋدە تاجىريبەسى جەتكىلىكتى تەرسىكەيلىكتەر كەلەر جىلدان باستاپ كومىر ءوندىرىسىن دە قايتا جانداندىرماق. الداعى ۋاقىتتا اۋداندا ونەركاسىپ, شاعىن كاسىپكەرلىك, اۋىل شارۋاشىلىعى, اتاپ ايتقاندا ەت پەن قىمىران وڭدەۋدى دامىتۋ قولعا الىنباق. بالامالى قۋات وندىرەتىن كۇن ەلەكتر ستانتسياسىن ىسكە قوسۋ دا الداعى جىلدىڭ ەنشىسىنە قالدىرىلىپ وتىر. سونىمەن قاتار, ءبىر كەزدەرى تارتىلىپ قالىپ بيىل قايتا تولعان قىزىلكولدىڭ جاعاسىنان دەمالىس ورىندارىن سالۋعا نيەتتەنىپ وتىرعان كاسىپكەرلەر دە دايىن. تەك, جوبا-جوسپار ءتۇزىلۋى كەرەك. سونداي-اق, سوزاقتا تۇرعىن ءۇي ماسەلەسى دە جىلدان جىلعا شەشىمىن تاۋىپ كەلەدى. شيرەك عاسىردا اۋداندا 206,6 مىڭ شارشى مەتردى قۇرايتىن 4000-عا جۋىق تۇرعىن ءۇي سالىنىپتى. جىل اياعىنا دەيىن تاعى 50 تۇرعىن ءۇي ەل يگىلىگىنە بەرىلگەلى وتىر. سوزاقتىق شارۋالار مال وسىرۋدە دە الدارىنا قارا سالماي كەلەدى. تاۋەلسىزدىك العان جىلدارى اۋداندا ءىرى قارا باسى 7 مىڭنان ارەڭ اسسا, قازىر بۇل كورسەتكىش 27 مىڭعا جەتىپ وتىر. بيىلدىڭ وزىندە سوزاقتان 2 688 قاراكول توقتىسى بىرىككەن اراب امىرلىكتەرىنە ەكسپورتتالدى.