پان گي مۋن وڭتۇستىك كورەيا پرەزيدەنتتىگى ءۇشىن سايلاۋعا ءتۇسۋى مۇمكىن

بۇۇ باس حاتشىسى قىزمەتىنەن كەتىپ جاتقان پان گي مۋن كەلەسى جىلدىڭ سوڭىندا وتەتىن وڭتۇستىك كورەيا پرەزيدەنتىنىڭ سايلاۋىندا ءوز كانديداتۋراسىن ۇسىنۋى مۇمكىندىگىن جوققا شىعارمايدى. بۇعان قاتىستى شەشىمدى 2016 جىلدىڭ سوڭىندا بىرىككەن ۇلتتار ۇيىمىنىڭ باس حاتشىسى لاۋازىمىنداعى مەرزىمى اياقتالىپ, ءوز ەلىنە ورالعاننان كەيىن قابىلداماق, دەپ حابارلايدى قازاقپارات Reuters  اگەنتتىگىنە سىلتەمە جاساپ. «كورەيادا (وڭتۇستىك) كوپتەگەن ادام ەل بولاشاعىن جاقسى ەتۋ ءۇشىن ءوز كانديداتۋرامدى ۇسىناتىنىمدى كۇتۋدە, مەن ونى سەزەمىن», - دەدى ول. پان گي مۋن وڭتۇستىك كورەياعا قاڭتار ايىنىڭ ورتاسىندا قايتاتىنىن اتاپ ءوتتى. «سودان كەيىن كورەيانىڭ (وڭتۇستىك) بولاشاعىندا قانداي ءرول ويناي الاتىنىم جونىندە ماعان جاقسى كەڭەس بەرە الاتىن دوستارىممەن, قۇرمەت تۇتاتىن ادامدارىممەن اقىلداساتىن بولامىن.بارلىق نۇسقالار اشىق كۇيىندە قالۋدا», - دەپ قوستى ول. Reuters-ءتىڭ اتاپ وتۋىنشە, ەگەر پان گي مۋن پرەزيدەنتتىك كرەسلو ءۇشىن سايلاۋعا ءتۇسۋ شەشىمىن قابىلداسا, ول بيلىك باسىنداعى «سەنۋري» پارتياسى اتىنان قاتىساتىن بولادى. وڭتۇستىك كورەيادا قىركۇيەك ايىندا وتكىزىلگەن ساۋالناماعا سايكەس, رەسپوندەنتتەردىڭ 32,7 پايىزى پان گي مۋن ءۇشىن داۋىس بەرۋگە دايىن. ونىڭ  ءىزىن الا 17,3% داۋىسپەن وپپوزيتسيالىق ساياساتكەر مۋن چجە ين مەن 8,1% داۋىسپەن ان چحول سۋ كەلەدى. وڭتۇستىك كورەيانىڭ بۇرىنعى سىرتقى ىستەر ءمينيسترى پان گي مۋن بۇۇ باس حاتشىسى قىزمەتىن 2007 جىلدان بەرى اتقارىپ كەلدى.