وزبەك-قىرعىز قاتىناسىنداعى جاڭا كەزەڭ

ۇستىمىزدەگى جىلدىڭ 19 قازانىندا وزبەكستان مەن قىرعىزستاننىڭ سىرتقى ساياسات ۆەدومستۆولارىنىڭ وكىلدەرى 2016-2017 جىلدارعا ارنالعان ىنتىماقتاستىق تۋرالى باعدارلاماعا قول قويدى. قول قويۋ ءراسىمى قىرعىز رەسپۋبليكاسىنىڭ سىرتقى ىستەر ءمينيسترى ەرلان ابدىلداەۆتىڭ وزبەكستان رەسپۋبليكاسىنا جۇمىس ساپارىنىڭ اياسىندا جۇزەگە استى. ەكى كورشى ەل اراسىنداعى قارىم-قاتىناستا ايتارلىقتاي جىلىمىق باستالعالى اسا كوپ ۋاقىت بولا قويعان جوق. ساراپشىلار مۇنى وزبەكستان پرەزيدەنتىنىڭ مىندەتىن اتقارۋشى شاۆكات ميرزيەەۆتىڭ جاڭا باعىتىمەن بايلانىستىرادى. وزبەك باسشىلىعى قىرعىزستان ازاماتتارىنىڭ وزبەك­ستانعا كىرۋ جانە ودان شىعۋ رەجىمىن جەڭىلدەتۋ جاعىنا قاراي قايتا قاراۋى ىقتيمال دەگەن دە اقپارات ەستىلگەن ەدى. ەكىجاقتى قارىم-قاتىناستى جاق­سارتۋ جاعىنا قاراي ناقتى قادام قىرعىز رەسپۋبليكاسىنىڭ ۆيتسە-پرە­مەرى مۇحاممەتكالىي ابۋلعازيەۆ باستاعان اۋقىمدى دەلەگاتسيانىڭ دوس­تىق ساپارىنان باستاۋ العان-تىن. سول كەزدە, وسى قازان ايىنىڭ باسىن­دا وزبەكستاننىڭ ءاندىجان وبلى­سىنا قۇرامىنا مەملەكەتتىك ورگان­داردىڭ, جەرگىلىكتى ءوزىن ءوزى باسقارۋ ورگان­دارىنىڭ قىزمەتكەرلەرى, مادەنيەت قايراتكەرلەرى مەن جاستار وكىلدەرىنىڭ كوشباسشىلارى ەنگەن 130 ادامدىق دەلەگاتسيا بارعان ەدى. ولاردىڭ اراسىندا وش, باتكەن جانە جالال-اباد وبلىس­تارى وكىمەتتەرىنىڭ وكىلەتتى وكىلدەرى بار بولاتىن. تاراپتار بىرقاتار كەزدەسۋدىڭ قو­رى­تىندىلارى بويىنشا دوستىق ءراۋىش­تە ەكىجاقتى قارىم-قاتىناس پەن ءارى قارايعى ءوزارا ءىس-قيمىلدىڭ پەرسپەكتيۆالارىن تالقىلادى. ەكى ەلدىڭ بۇقا­رالىق اقپارات قۇرالدارى اتالعان وقي­عانى تاريحي رەتىندە سيپاتتاپ, تاش­كەنت پەن بىشكەك اراسىنداعى بايلانىستاردى ءارى قاراي جاقسارتا تۇسەدى دەگەن ىڭعايدا ۇلكەن ءۇمىت ارتاتىندارىن ءبىلدىردى. قىرعىز-وزبەك قارىم-قاتىناسىنىڭ قازىرگى جاعدايى مەن پەرسپەكتيۆالارى بۇدان دا جوعارىراق دەڭگەيدە وزبەكستان رەسپۋبليكاسىنىڭ سىرتقى ىستەر ءمينيسترى  ابدۋلازيز كاميلوۆتىڭ قىرعىزستانعا جۇمىس ساپارى بارىسىندا تالقىلاندى. ساپار بارىسىندا ا.كاميلوۆتى قىرعىز رەسپۋبليكاسىنىڭ پرەزيدەنتى المازبەك اتامباەۆ قابىل­دادى. بۇقارالىق اقپارات قۇرالدارىنىڭ حابارلاۋلارىنا قاراعاندا, تاراپتار ەكى جاققا قاتىستى اسا شەتىن ماسەلەلەردى, ولاردىڭ ىشىندە شەكارا, سۋ پروبلەمالارى جانە تاعى باسقا ماسەلەلەردى تالقىلاعان. كورىپ وتىرعانىمىزداي, ەكى ەل سىرتقى ساياسات ۆەدومستۆولارى باس­شى­لارىنىڭ وسى جولعى كەزدەسۋى الدىن­دا ءتۇرلى دەڭگەيلەردە بىرقاتار ساپار­لار الماسۋ جۇزەگە اسسا, بۇل ۇدەرىس­تەردىڭ بىرتە-بىرتە قىرعىزستان مەن وزبەكستاننىڭ ەكىجاقتى ىنتى­ماق­تاستىعىن نىعايتا ءتۇسۋ ءۇشىن نەگىز قالاپ وتىرعانى بايقالادى. مىسال ءۇشىن ايتساق, وسى اپتادا تاشكەنتتە وتكەن وزبەكستان مەن قىرعىزستاننىڭ سىرت­قى ىستەر مينيسترلەرى ابدۋلازيز كامي­لوۆ پەن ەرلان ابدىلداەۆتىڭ كەزدە­سۋلەرى شەڭبەرىندە تاراپتار ساۋدا-ساتتىق, ينۆەستيتسيالار, شەكارا ءجا­نە سۋ سالالارىنداعى ەكىجاقتى ىنتى­ماقتاستىق ماسەلەلەرىن تالقىلادى. وزبەكستاننىڭ بۇقارالىق اقپارات قۇرالدارى اتاپ وتكەندەي, كەلىسسوزدەر بارىسىندا تاراپتار ەكىجاقتى بايلانىستاردى ءتۇرلى دەڭگەيلەردە جانە ناقتى ناتيجەلەرگە جەتكىزۋ بويىنشا بەلسەندى ەتە تۇسۋگە ءوزارا مۇددەلىلىك تانىتقان. وزبەكستان مەن قىرعىزستان اراسىنداعى قارىم-قاتىناستىڭ قىر­عىز­ستاننىڭ وڭتۇستىگىندەگى بەلگىلى وقي­عا­لاردان كەيىن ايتارلىقتاي ناشار­لاعانى ءمالىم. ونىڭ ۇستىنە, سول كەزدەن بەرى ەكى ەلدىڭ شەكاراسىندا وقتىن-وق­تىن تالاس-تارتىستار پايدا بولدى. ەندى, ەكىجاقتى ءوزارا قارىم-قاتىناستاردىڭ بىرتە-بىرتە جاقسارۋىنا وراي, ەكىجاقتى شەتىن ماسەلەلەر وڭ شەشىلەدى دەۋگە دە نەگىز بار سەكىلدى. ءبىرىنشى كەزەكتە, بۇل شەكاراداعى تالاس تۋعىزىپ كەلە جاتقان تەلىمدەرگە قاتىستى. بۇقارالىق اقپارات قۇرال­دارىنىڭ حابارلاۋلارىنا قاراعاندا, بۇل باعىتتا قازىردىڭ وزىندە ناقتى قادامدار بايقالىپ وتىر. ەكى ەل وكىلدەرىنەن قۇرالعان جۇمىس توبى 14-20 قىركۇيەك ارالىعىندا ورتاق شە­كا­رانىڭ 23 تالاس تۋعىزىپ كەلە جاتقان تەلىمدەرى بويىنشا دەماركاتسيالاۋ ماسەلەلەرىن قاراستىردى. وزبەكستان مەن قىرعىزستان ساياسات­كەر­لەرىنىڭ جوعارى دەڭگەيدەگى سوڭعى كەزدەسۋىنەن كورىنىپ وتىرعانىنداي, ەكى ەل باسشىلارىنىڭ ساياسي ەرىك-جىگەرلەرى قارىم-قاتىناستى جاقسارتۋعا ىڭعاي تانىتاتىنىن انىق اڭعارتتى. ماسەلەن, قىرعىز رەسپۋبليكاسىنىڭ سىرتقى ىستەر مينيسترلىگىندە ەكى ەل مينيسترلەرىنىڭ كەزدەسۋىنەن كەيىن ەكىجاقتى قارىم-قاتىناستىڭ دامۋ سيپاتى وڭ ديناميكاعا قاراي بۇرىلعانى اتاپ ءوتىلدى. مىسالى, ەرلان ابدىلداەۆ پەن ابدۋلازيز كاميلوۆتىڭ كەزدەسۋىنەن شىعاتىن ءبىر قورىتىندى: تاراپتارعا ماسەلەلەردىڭ بارلىق كەشەنى بويىنشا ءارى قارايعى ىنتىماقتاستىقتى جۇرگىزۋگە مۇمكىندىك بەرەتىن «جول كارتاسىن» دايىنداۋ قاجەتتىگى بولىپ وتىر. ول ساياسي, ساۋدا-ەكونوميكالىق, شەكارالىق, مادەني-گۋمانيتارلىق جانە باسقا دا ماسەلەلەردى قامتيدى. كەزدەسۋدىڭ قورىتىندىلارى بو­ي­ىنشا قىرعىز تاراپى وزبەك جاعىنا جاقىن ارادا جاۋاپ ساپارمەن شەكارا ماڭىنداعى ىنتىماقتاستىقتى نىعايتۋ اياسىندا وش قالاسىنا كەلىپ قايتۋعا رەسمي شاقىرۋ تابىستاۋى ەكىجاقتى قارىم-قاتىناستىڭ وڭ سيپات الا باستاعانىنىڭ قيسىندى جالعاسى بولدى دەۋىمىز كەرەك. رۋسلان ءىزىموۆ, cاياساتتانۋشى