ەلدوس سمەتوۆ: ەرەجەسىز جەكپە-جەككە اۋىسۋ ويىمدا جوق

ريو وليمپياداسىندا بىرنەشە قازاقستاندىق دزيۋدوشى  جۇلدەگەر اتاندى. بۇل ەلىمىزدە دزيۋدونىڭ قارقىندى دامىپ كەلە جاتقانىن بىلدىرەدى. ريو ءدۇبىرى باسىلعاننان ارادا ەكى اي وتكەندە ءبىز سول ويىنداردىڭ كۇمىس جۇلدەگەرى ەلدوس سمەتوۆپەن كەزدەسىپ, قىسقاشا سۇحبات جاساعان ەدىك. – ەلدوس, وليمپيادانى تاعى ءبىر ەسكە الساق. ەش وكىنىشىڭىز جوق پا؟ – وليمپيادا مەن ءۇشىن ءساتتى ءوتتى. بۇل سپورتتاعى ەڭ ۇلكەن  جەتىستىگىم. كوڭىلىم تولمايتىن, وكىنەتىن تۇسىم جوق. تەك ساتتىلىك جەتىسپەدى. دەگەنمەن, كۇرەسىمە ءوزىم ءتانتىمىن, ەكىنشى ورىن العانىما وتە قۋانىشتىمىن. – فينالداعى قارسىلاسىڭىز بەسلان مۋدرانوۆ رەسەيلىك جۋرناليستەرگە بەرگەن سۇحباتىندا «سمەتوۆ – وتە جىلدام. بىراق سوڭعى مينۋتتاردا شارشاپ قالادى ەكەن, سونى بايقاپ دايىندالدىم» دەدى. كەلىسەسىز بە؟ – جوق, مەن شارشاعان جوقپىن. كەرىسىنشە, جەڭىسكە دەگەن كۇش-جىگەرىم ويانىپ كەتتى. وزىمە قاتتى سەنىپ, ەموتسياعا بەرىلىپ قويدىم. ال تەحنيكالىق, فيزيكالىق, پسيحولوگيالىق تۇرعىدا ءبارى وتە جاقسى بولدى. – دزيۋدودا ەڭ كوپ قولداناتىن ءادىسىڭىز قانداي؟ – شىن بالۋانعا وڭ مەن سولى بىردەي عوي. سول سياقتى ەكى جاققا دا كىرە بەرەمىن. ءبىر ءادىستى ءجيى قولداناتىن سپورتشىلار قاتارىنان ەمەسپىن. – تاتاميدەگى قارسىلاستارمەن ومىردەگى قارىم-قاتىناسىڭىز قانداي؟ – ومىردە ەشقايسىسىمەن قارسىلاس ەمەسپىن. سالەمىمىز ءتۇسۋ, ارالاسامىز, ءبىر-ءبىرىمىزدى سىيلايمىز, ىشكە بۇككەن سىرىمىزدى جاسىرماي بايانداماساق تا, ورتاق تاقىرىپتاعى اڭگىمەلەر تابىلىپ جاتادى. دوس دەگەن اتاۋعا لايىقتىلار دا بار, لايىقسىزدار دا تابىلادى. ولاردى, حالىقارالىق سىندارعا بىرگە قاتىسىپ جۇرگەن شەتەلدىك دزيۋدوشىلاردى تانىستار كاتەگورياسىنا جاتقىزامىن. – تاتاميگە قاشان شىعاسىز؟ – جارىستى ديۋسەلدورفتا وتەتىن حالىقارالىق «Grand Prix» تۋرنيرىنەن باستايمىن. وول كەلەسى جىلى اقپان ايىندا وتەدى. – كۋميرىڭىز كىم؟ – دزيۋدوداعى كۋميرىم – تادوحيرو نامۋرا. 60 كەلىدە وليمپيادانىڭ ءۇش دۇركىن چەمپيونى رەتىندە تاريحتا اتى قالعان سپورتشى. – وليمپيادا چەمپيونى بولىپ جاتساڭىز, ەرەجەسىز جەكپە-جەككە اۋىساتىن ويىڭىز بار ما؟ – جوق, ونداي ماقساتىم جوق. ول دەنساۋلىققا وتە زيان سپورت تۇرلەرىنىڭ ءبىرى. – سپورتشىلار ادەتتە ءبىر وليمپيادادان كەيىن سپورتتىق كارەراسىن اياقتاپ جاتادى. بۇل جايلى ويلاپ كوردىڭىز بە؟ – ەكىنشى ورىن العانىم دا جاقسى بولعان شىعار. ريو وليمپياداسىندا التىن العانىمدا, cپورتتىق كارەرامدى اياقتاۋىم دا مۇمكىن ەدى. سەبەبى, قالعان جارىستاردىڭ بارىنەن التىن مەدال الىپ بولعام. تەك وليمپيادا التىنى جەتىسپەي تۇر. ريوداعى ولقىلىقتىڭ ورنىن تولتىراتىن كەز كەلەتىنىنە سەنەمىن. جەڭىلگەن كۇرەسكە تويماس دەيدى عوي. ريو وليمپياداسىندا ماراپاتتاۋ ساتىنەن كەيىن «مىنا التىن مەدال مەنىڭ موينىما تاعىلۋى كەرەك. مىنا ءاننىڭ ورنىنا قازاقتىڭ ءانۇرانى شىرقالۋى كەرەك» دەپ, ىشتەي بۇلقىنىپ تۇردىم.  قۇداي قالاسا, توكيوعا بارامىن. سپورتشى بولعاننان كەيىن التىن ءۇشىن ەڭبەك ەتەمىن. بىراق, كىم بىلەدى, الداعى ءتورت جىلدىقتا مەنەن دە مىقتى سپورتشى ەل ىشىنەن شىعىپ قالار. وليمپيادا ويىنىنا قاتىسۋ ۇلكەن ءبىر جەتىستىك. – جاتتىقتىرۋشى بولعىڭىز كەلە مە؟ – شىنىمدى ايتسام, ءالى جاتتىقتىرۋشىلىق تۋرالى ويلانىپ كورمەدىم. قازاقتا «ەكى قايىقتىڭ باسىن ۇستاعان سۋعا كەتەدى» دەيدى عوي. سپورت جولىمدى ءالى دە جالعاستىرىپ, كەلەسى وليمپياداعا دايىندالامىن. وليمپيادانىڭ التىن مەدالىن الام دەپ الدىما ماقسات قويعان سوڭ سوعان جەتۋىم كەرەك. باسقا ەشتەڭە ويلاماۋىم كەرەك, باسقا ەشتەڭەنى جوسپارلاماۋىم قاجەت. قازىردەن ءار نارسەنىڭ باسىن ءبىر شالسام, ماقساتىما جەتۋ قيىندايدى.   اڭگىمەلەسكەن ايگەرىم توقسانبەك