رۋدنىيدا تەراكت تۋرالى جالعان اقپارات تاراتۋشى ەكى جىلعا سوتتالدى

ۇستىمىزدەگى جىلدىڭ 5 قىركۇيەگىندە رۋدنىي قالاسىنىڭ  لەنين كوشەسىندەگى  9 قاباتتى ءۇيدىڭ تۇرعىندارىن تۇگەلدەي سىرتقا كوشىرۋگە تۋرا كەلدى. بىرەۋ 1 قىركۇيەكتە 9 قاباتتى ءۇيدىڭ ليفتىنە قارا ماركەرمەن 5 قىركۇيەكتە وسى ۇيدە بومبا جارىلاتىنى تۋرالى جازىپ كەتكەن.  ابدەن زارەزاپ بولعان تۇرعىندار «بومبا» دەگەن سوزدەن  قورقىپ, پوليتسياعا حابارلايدى.   ارنايى قىزمەتتىڭ ماماندارى «جارىلعىش زاتتى» ابدەن ىزدەپ بولىپ, بىرجاقتى شەشىم ايتقانعا دەيىن جۇرت دۇرلىگىپ, ەكى كۇن بويى ۇيىنە كىرە الماي ءجۇردى. ولاردى تۋىستارىنىڭ ۇيىنە, مەكتەپكە,  قوناق ۇيلەرگە ورنالاستىردى. جارىلعىش زات اقىرى تابىلعان جوق, ەسەسىنە  جۇرتتى  وسىنشا دۇرلىكتىرگەن كۇدىكتى انىقتالىپ, ۇستالدى. ول 23 جاستاعى ەرلان اقمۇرزاەۆ دەگەن ازامات بولىپ شىقتى.  رۋدنىي قالالىق سوتى تەررورلىق اكت تۋرالى جالعان لاقاپ تاراتقان  وعان  ۇكىم شىعارىپ, ەكى جىلعا باس بوستاندىعىنان ايىردى. ايىپتى جازاسىن جالپى رەجيمدەگى كولونيادا وتەيتىن بولدى. مۇنىڭ سىرتىندا ول «بومبانى» ىزدەگەن شىعىندى جابۋ ءۇشىن كەمىندە 3 ميلليون تەڭگەنى دە وتەۋى كەرەك. ايتا كەتەيىك, ادەتتە, قر قىلمىستىق كودەكسى بويىنشا تەررورلىق اكت جونىندە جالعان اقپارات تاراتقانى ءۇشىن 6 جىلعا دەيىن بەرىلەدى. بۇل جولى  پروكۋرور  مەن كۇدىكتىنىڭ اراسىندا قورعاۋشىلارىنىڭ قاتىسۋىمەن   سوتقا دەيىنگى  پروتسەسسۋالدىق كەلىسىم بولدى. كوپ بالالى, ءتارتىپتى وتباسىندا تاربيەلەنگەن اقمۇرزاەۆتىڭ ەشقانداي راديكالدىق توپتارمەن قاتىسى جوقتىعى انىقتالدى. ونىڭ ادۆوكاتىنىڭ ايتۋىنشا, 9 قاباتتى ءۇيدىڭ پودەزى, ءليفتىسى وتە لاس, ول ءۇيدىڭ 7- قاباتىندا تۇراتىن اپاسىنىڭ ۇيىنە كوتەرىلگەندە ءليفتىنى بىرەۋلەر دارەتحانا رەتىندە پايدالانعانىن كورەدى.  وعان شىداماعان اقمۇرزاەۆ ءوزىنىڭ  ىزاسىن وسىلاي كورسەتىپتى. تەگىندە ويلاپ سويلەمەگەن وسىلاي وت باسارى انىق. ءنازيرا جارىمبەتوۆا سۋرەتتى تۇسىرگەن سەرگەي ميرونوۆ