الماتىدا ەلەكتروموبيلدەرگە ارنالعان 40 جانارماي قۇيۋ بەكەتى اشىلادى

الماتى قالاسىنىڭ اكىمى باۋىرجان بايبەك پەن قالانىڭ بيزنەس قۇرىلىمدارى وكىلدەرى اراسىنداعى كەزدەسۋ اياسىندا «AllurGroup» كومپانياسى ديرەكتورلار كەڭەسىنىڭ توراعاسى اندرەي لاۆرەنتەۆپەن ءوزارا ىنتىماقتاستىق تۋرالى مەموراندۋمعا قول قويىلدى. كەلىسىمگە سايكەس, ەكسپو-2017 باستالۋىنا دەيىن الماتىدا ەلەكتروموبيلدەرگە ارنالعان 40 ەلەكترلىك جانارماي قۇيۋ بەكەتى ورناتىلادى. بۇل قازاقستان رەسپۋبليكاسىنىڭ 2013-2020 جىلدارعا ارنالعان «جاسىل ەكونوميكاعا» ءوتۋ تۇجىرىمىنىڭ نەگىزگى باعىتتارىنىڭ ءبىرى. سونىمەن بىرگە, كومپانيا تەستىلەۋدەن وتكىزۋ ءۇشىن 30 كۇن مەرزىمگە اكىمدىككە ءۇش ەلەكتروموبيل بەرۋدى جوسپارلاۋدا. «25 جىل ىشىندە الماتىداعى كولىكتەر سانى ءۇش ەسەگە ارتتى. قازىر قالادا 570 مىڭ اۆتو بولسا, وبلىستا 270 مىڭ كولىك بار. ياعني, كۇن سايىن 840 مىڭ اۆتو قالاعا كىرىپ-شىعادى. سوڭعى ون جىلدا مەملەكەت الماتى كولىك ينفراقۇرىلىمىنا 500 ميلليارد تەڭگەگە جۋىق قاراجات جۇمساعان», - دەدى باۋىرجان بايبەك. ازىرگە, مەگاپوليس اكىمدىگى 10 ەلەكتروجانارماي بەكەتىن ورناتۋ جۇمىستارىن جۇرگىزىپ جاتىر, سونىمەن بىرگە بۇرىندارى ورناتىلعان جەكە ەلەكتروجانارماي بەكەتتەرى بار.