پارلامەنتارالىق ۇنقاتىسۋدى نىعايتۋ - قازاقستان مەن فينليانديا اراسىنداعى جان-جاقتى ىنتىماقتاستىق پەن ءوزارا سەنىمنىڭ جانە حالىقارالىق ديپلوماتيانىڭ ماڭىزدى بولىگى. بۇل تۋرالى ءماجىلىس توراعاسى نۇرلان نىعماتۋلين فينليانديا رەسپۋبليكاسىنا رەسمي ساپارى بارىسىندا مالىمدەدى.
حەلسينكي قالاسىندا قازاقستاندىق ماجىلىسمەندەر فينليانديا پارلامەنتىنىڭ سپيكەرى ماريا لوحەلامەن كەلىسسوزدەر جۇرگىزىپ, ساۋدا-ەكونوميكالىق ىنتىماقتاستىق جونىندەگى قازاقستاندىق-فيندىك پارلامەنتارالىق كوميسسيا جەتەكشىلەرىمەن كەزدەسىپ, «وتانيەمي» تەحنوپاركىنە باردى, دەپ حابارلايدى قر پارلامەنتى ءماجىلىسى اپپاراتىنىڭ ءباسپاسوز قىزمەتىنەن.
ن. نىعماتۋليننىڭ ايتۋىنشا, ەلباسى نۇرسۇلتان نازارباەۆتىڭ ەڭ دامىعان 30 ەلدىڭ قاتارىنا كىرۋ جولىنداعى اۋقىمدى رەفورمالارىن جۇزەگە اسىرۋ باعىتىندا فينلياندىق ارىپتەستەردىڭ يننوۆاتسيالىق دامۋدى زاڭنامالىق قامتاماسىز ەتۋ, ءبىلىم سالاسىن جەتىلدىرۋ, اقپاراتتىق-كوممۋنيكاتسيالىق تەحنولوگيانى دامىتۋ, عىلىمي جانە ىسكەر ورتامەن ىقپالداستىق سالاسىنداعى تاجىريبەلەرى وتە ماڭىزدى.
م. لوحەلامەن اڭگىمە بارىسىندا ءماجىلىس سپيكەرى ەكىجاقتى قارىم-قاتىناستى تۇراقتى نىعايتۋ جولىنداعى ءوزارا بايلانىس وتە جوعارى دەڭگەيدە قارقىن الىپ كەلە جاتقانىن اتاپ ءوتتى.
م. لوحەلا ءوز كەزەگىندە قوس مەملەكەتتىڭ ارىپتەستىگىن جوعارى باعالاي كەلە, پارلامەنتتىك كوميتەتتەر ارقىلى ىقپالداستىقتى ارتتىرا تۇسۋگە ىنتالىلىق ءبىلدىردى.
ءماجىلىس توراعاسى حالىقارالىق پارلامەنتتىك ۇيىمدار اياسىندا كۇن تارتىبىندەگى وزەكتى ماسەلەلەردىڭ شەشىمىن تابۋ جولىندا دا كۇش-جىگەردى ۇيلەستىرۋگە دايىن ەكەندىگىن ءبىلدىردى.
قازاقستان تاۋەلسىزدىگىنىڭ 25 جىلدىعى جانە كەلەر جىلى فينليانديا تاۋەلسىزدىگىنىڭ 100 جىلدىعى, سونىمەن بىرگە, ديپلوماتيالىق قاتىناس ورناعانىنا 25 جىل تولاتىن اتاۋلى كۇندەردى العا تارتقان ءماجىلىس توراعاسى ارىپتەسىن ءبىزدىڭ ەلىمىزگە رەسمي ساپارمەن كەلۋگە شاقىردى.
