مينيسترلىك ايىقتىرعاشتار سانىن كوبەيتۋدى كوزدەيدى

«ەگەمەن قازاقستان» گازەتىنىڭ 8 كۇنگى سانىندا الەكساندر تاسبولاتوۆتىڭ «ابايلاڭىز... ايىقتىرعىش!» تاقىرىبىمەن ماتەريال جاريالانعان بولاتىن. وندا مەملەكەت تاراپىنان ىشىمدىككە قارسى كۇرەستىڭ جۇرگىزۋدىڭ ءتۇرلى امال-ارەكەتتەرى ءتيىستى زاڭنامالىق نەگىزدە جاسالىپ جاتقانىمەن, «باياعى جارتاس – سول جارتاس» كۇيىندە قالىپ وتىرعانى جايىندا جازىلعان بولاتىن. ەندى مىنە, وسى ماسەلەگە بايلانىستى ءىىم مەملەكەتتىك ءتىل جانە اقپارات دەپارتامەنتىنىڭ ديرەكتورى الماس سادۋباەۆ مەديتسينالىق ايىقتىرعىشتارعا قاتىستى ارنايى تۇسىندىرمە جاسادى. قۇزىرلى ورگان وكىلى ءوز مالىمدەمەسىندە 2010 جىلى 32 مەديتسينالىق ايىقتىرعىش (قازىرگى ۋاقىتتا ۋاقىتشا بەيىمدەۋ جانە وڭالتۋ ورتالىقتارى) دەنساۋلىق ساقتاۋ ورگاندارىنىڭ قۇزىرەتىنە تاپسىرىلعاندىعىن جانە بۇل رەتتە ماس ادامداردى ءتيىستى ورىندارعا جەتكىزۋ فۋنكتسياسى ىشكى ىستەر ورگاندارىنىڭ قۇزىرەتىندە قالدىرىلعاندىعىن ايتادى. سونىمەن قاتار, ول: «ەل ىشىندە وسىنداي 29 ورتالىق جۇمىس ىستەيدى, ولاردا بارلىعى 598 توسەك-ورىن بولعانىمەن, قاجەتتىلىك تولىق قامتاماسىز ەتىلمەيدى. ءبىز قولدانىستاعى ورتالىقتاردى 240 توسەك-ورىنعا كەڭەيتۋدى ۇسىنامىز جانە 595 توسەك-ورىندى قامتيتىن قوسىمشا تاعى دا وسىنداي 38 ورتالىق اشۋدى ۇسىنىپ وتىرمىز», – دەدى ا.سادۋباەۆ. ونىڭ ايتۋىنشا, مۇنداي مەكەمەلەر بارلىق اۋدان ورتالىقتارىندا بولعان. قازىرگى ۋاقىتتا ولار تەك قالالار مەن وبلىس ورتالىقتارىندا جۇمىس ىستەيدى. ءىىم مۇنداي ورتالىقتارمەن ەلىمىزدىڭ بارلىق اۋداندارىن قامتۋدى كوزدەپ وتىرعان جوق. ال كەيبىر جەكەلەگەن ءۇش-ءتورت اۋدان ءۇشىن ءبىر ورتالىق بولسە, جەتكىلىكتى بولادى دەپ سانايدى. سونداي-اق ءىىم-ءنىڭ وكىلى وزگە پروبلەماعا دا توقتالدى. قازىرگى قولدانىستاعى زاڭناماعا سايكەس, اكىمشىلىك قاماۋعا الۋ تۋرالى سوت شەشىمىنە دەيىن پوليتسيا ماسكۇنەمدى ءۇش ساعات قانا ۇستاي الادى. «مىسالعا, كۇيەۋى ۇيىندە جانجال شىعارسا, ايەلى پوليتسيا شاقىرادى. ءۇش ساعات وتكەننەن كەيىن ونى ۇيىنە جىبەرەدى. ودان ءارى ول ماستىعىنان ايىقپاستان وتباسىنىڭ بەرەكەسىن قاشىرۋى دا مۇمكىن. سوندىقتان ماس كۇيىندەگى ادامدى ءماجبۇرلى ەمدەۋگە رەسىمدەۋ جانە جىبەرۋ راسىمدەرىن وزگەرتۋ جونىندە ۇسىنىستار ازىرلەۋدەمىز», – دەيدى ا.سادۋباەۆ. ايتا كەتەيىك, قازىرگى ۋاقىتتا ماس كۇيدە جاسالعان قىلمىستىق قۇقىق بۇزۋشىلىقتار سانى شارىقتاۋ شەگىنە جەتىپ تۇر. اعىمداعى جىلدىڭ 9 ايىندا ماس كۇيدە 14 مىڭنان استام قىلمىستىق قۇقىق بۇزۋشىلىقتار جاسالعان بولسا, وتكەن جىلدىڭ 12 ايىندا بۇل كورسەتكىش 12,7 مىڭدى قۇراعان. سونىمەن قاتار, ماس كۇيدە قۇقىقبۇزۋشىلىق جاساعانى ءۇشىن ۇستالعان ادامدار سانى دا كۇن ساناپ ارتىپ كەلە جاتقانىن ستاتيستيكالىق دەرەكتەر راستايدى.