قازاقستان رەسپۋبليكاسىنىڭ باس پروكۋرورى جاقىپ اسانوۆتىڭ ۇندەۋى

(«پروكۋراتۋرا تۋرالى» زاڭنىڭ 25-2-بابىنىڭ ءتارتىبى بويىنشا) «پروكۋراتۋرا تۋرالى» زاڭنىڭ 25-2-بابىن باسشىلىققا الىپ, تومەندەگى ۇندەۋدى جاريا ەتەمىن. تۇرعىن ءۇي – ومىردەگى ەڭ باستى قاجەت­تىلىك­تىڭ ءبىرى. حالقىمىز «ءۇيى جوقتىڭ كۇيى جوق» دەپ بەكەر ايتپايدى. ونى قولجەتىمدى ەتۋ ءۇشىن ەلىمىزدە ارنايى باعدارلامالار ىسكە اسۋدا. 25 جىلدا ميلليوننان استام وتباسى باسپا­نالى بولدى. بىراق, وسى ماسەلەنىڭ باسقا دا جاعى بار. كەيبىر قۇرىلىس كومپانيالارى ارزان باعامەن قىزىقتىرىپ, كۇماندى شارتتار ۇسىنىپ, كوپ ادامدى الداپ كەتتى. ازاماتتار جىلداپ جينا­عان اقشاسىنان ايىرىلىپ, ارمانداعان پاتەرىن الا الماي قالعان. 3 كۇن بۇرىن, 10 قازاندا جاڭا زاڭ قول­دا­نىسقا ەندى. ەندى قۇرىلىس كومپانيالارى ۇلەس­كەر­لەردىڭ اقشاسىن تەك ەكى جاعدايدا عانا تارتا الادى: ارنايى قور كومپانياعا كەپىلدىك بەرسە نەمەسە اكىمدىكتىڭ رۇقسات قاعازى بولسا. ال اكىمدىك رۇقساتتى قانداي جاعدايدا بەرەدى؟ قۇرىلىس بىتەدى دەپ بانك كەپىلدىك بەرسە نەمەسە ءۇيدىڭ قاڭقاسى (كاركاسى) سالىنىپ بىتسە. ءسويتىپ, بۇل زاڭ الاياقتاردىڭ قارماعىنا ءتۇسىپ قالماۋعا بوگەت بولماق. سوندىقتان زاڭعا سۇيەنىپ, قازاق­ستان­دىقتاردى ەسكەرتەتىنىم – كەز كەلگەن جارناماعا, اۋىزشا بەرگەن ۋادەگە سەنىپ, «ءۇي سالاتىن جەرى بار ەكەن عوي» دەپ اقشالارىڭىزدى كىم بولسا سوعان بەرمەڭىزدەر! ءسوزسىز, اركىم ءوز اقشاسىنا ءوزى يە. بىراق, كومپانيانىڭ قۇجاتتارى زاڭ تالاپتارىنا سايكەس بولماسا دا, وعان اقشاسىن بەرىپ, الدانىپ قالعانداردىڭ الدىندا جەرگىلىكتى اكىمدىك تە, كەپىلدىك قورى دا جاۋاپ بەرمەيدى. ارينە, الاياقتار قىلمىستىق جاۋاپكەرشىلىككە تارتىلار. بىراق, تۇبىندە ءۇيدىڭ قۇرىلىسى اياعىنا دەيىن بىتپەي, اقشاڭىز قايتارىلماي قالۋى مۇمكىن. سوندىقتان باس پروكۋرور رەتىندە زاڭعا سۇيەنىپ ەسكەرتەمىن – اقشانى ۇلەسكەرلىك قۇرىلىسقا بەرمەستەن بۇرىن كومپانيادان ەكى قۇجاتتىڭ ءبىرىن تالاپ ەتىڭىز: كەپىلدىك قورىمەن جاسالعان شارتتى نەمەسە اكىمدىكتىڭ رۇقساتىن. بۇل قۇجاتتاردى ءوز كوزىڭىزبەن كورىپ, مۇقيات وقىپ شىعىڭىز. بىراق, ولار دا جالعان بولۋى مۇمكىن. ەڭ دۇرىسى – ءوزىڭىز اكىمدىككە بارىپ نەمەسە ونىڭ رەسمي سايتىنان اكىمدىكتىڭ رۇقساتى نەمەسە قوردىڭ كەپىلدىگى بار ما, جوق پا, سوعان كوز جەتكىزىڭىز. مۇنداي قۇجات بار بولسا, وندا ەكىنشى قادام – «تۇرعىن ءۇي قۇرىلىسىنا ۇلەستىك قاتىسۋ تۋرالى شارتقا» قول قويۋ. بىراق, ودان بۇرىن ونى دا باستان-اياق وقىپ شىعىپ, ۇلتتىق ەكونوميكا ءمينيسترى بەكىتكەن (28.07.2016 №345 بۇيرىق) ۇلگىلىك شارتپەن سالىستىرىڭىز. شارتتىڭ باسقا تۇرلەرىن جاساۋعا تىيىم سالىنعان. بۇرىن كومپانيالار اقشا تارتۋ ءۇشىن «ينۆەس­تيتسيا جاساۋ», «بىرلەسكەن قاتىسۋ», «الدىن-الا ساتۋ» شارتتارىن ۇسىناتىن. ەندى مۇنداي قۇجات تۇرلەرى زاڭسىز. كەلىسىم تەك «تۇرعىن ءۇي قۇرىلىسىنا ۇلەستىك قاتىسۋ تۋرالى شارت» دەپ اتالۋى كەرەك. بۇل وتە ماڭىزدى. نازار اۋدارىڭىز: بۇل شارت اكىمدىكتە ەسەپكە الىنعاننان كەيىن عانا جاسالعان جانە زاڭدى كۇشى بار دەپ سانالادى. شارتتىڭ مازمۇنىندا قانداي دا ءبىر كۇمانىڭىز تۋسا, زاڭگەردەن, اكىمدىكتەن سۇراڭىز, قۇقىق قورعاۋ ورگانىنا ساۋال جىبەرىڭىز. الدانىپ قالماۋ ءۇشىن وسى­لاي بارىنشا ساۋاتتى قيمىلداعان ءجون. ال ەگ­جەي-تەگجەيلى اقپاراتتى اكىمدىكتەردىڭ جانە ار­نايى اشىلعان ulesker.kz سايتىنان الۋعا بولادى. الاياقتاردىڭ كوبەيۋىنە ءوزىمىز جاعداي جاسامايىق, قادىرلى ازاماتتار! قۇقىق قورعاۋ ورگاندارىنا – تۇرعىن ءۇي سالامىز دەپ حالىقتان زاڭسىز اقشا جيناۋدىڭ ءاربىر فاكتىسى بويىنشا دەرەۋ قىلمىستىق قۋدالاۋدى باستاڭىزدار.