مۇنداي فۋتبولدىڭ بىزگە دە كەرەگى جوق

استانادا 11 قازان كۇنى 2018 جىلعى الەم چەمپيوناتىنىڭ ىرىكتەۋ ءتۋرنيرى شەڭبەرىندە قازاقستان جانە رۋمىنيا قۇرامالارى اراسىندا وتكەن ويىننان كەيىن ءبىزدىڭ ويىمىزعا نيكولاي وزەروۆتىڭ كوپشىلىكتىڭ كوڭىلىندە بەرىك ۇيالاپ, كەيىن ناعىز ناقىلعا اينالعان «تاكوي حوككەي نام نە نۋجەن!» دەگەن اتاقتى ءسوز تىركەسى ورالدى. كەشەگى كەڭەس كەزەڭىنىڭ ايگىلى سپورت كوممەنتاتورى مۇنى 1972 جىلى كەڭەس وداعى مەن كانادا حوككەيشىلەرىنىڭ اراسىندا وتكەن سۋپەرسەريا ماتچتارى بارىسىندا ءورىس العان دورەكى ويىن مەن سپورتتىق مارتتىككە ساي كەلمەيتىن ارەكەتتەردى كورگەن كەزىندە جان كۇيزەلىسىن اپتىعا بىلدىرەتىن ايقايعا باسىپ, قاتتى اشىنا ايتقان ەدى. ءدال وسىعان ۇقساس كورىنىستەر سەيسەنبى كۇنى «استانا ارەنا» سپورت كەشەنىندە دە ورىن الدى. ءبىزدىڭ فۋتبولشىلار كەزدەسۋ باستالعاننان قارسى­لاس­تارى­نىڭ ادىمىن اشتىرماۋدىڭ باستى امالى مەن ايلاسى رەتىندە ولاردى اياقتان شالۋ, يىقپەن قاعۋ سياقتى قاتقىل ويىنعا ەرىك بەرىپ كەتتى. ءبىز مۇنى اۋەلگىدە ويىنشىلارىمىزدىڭ چەرنوگورياداعى ساتسىزدىكتىڭ قايتالانىپ قالماۋى ءۇشىن بارىن سالىپ جۇرگەندەرى رەتىندە قابىلداپ ەدىك. بىراق قاتقىل ويىننىڭ سوڭى قايتا-قايتا اشىق دورەكىلىككە ۇلاسىپ كەتە بەرگەن سوڭ كوڭىلگە كۇدىك ۇيالاي ءتۇستى. ونىڭ العاشقى ناتيجەسى كوپ ۇزاماي كورىندى. ماتچتىڭ 26-مينۋتىندا رۋمىنداردىڭ كوماندا كاپيتانى دراگوش گرەگورە مۇرنىنان اققان قان توقتاماي قويعاسىن, الاڭنان كەتۋگە ءماجبۇر بولدى. قازىر ونىڭ كەمىندە ەكى اپتالىق مەرزىمگە قاتاردان شىعىپ قالعانى, سودان كەيىن الاڭعا ورالعاندا دا, ءبىراز ۋاقىت مۇرنىنا ارنايى جابدىق كيىپ جۇرۋىنە تۋرا كەلەتىنى بەلگىلى بولىپ وتىر. ال جارتىلاي قورعاۋشى الەكساندرۋ كيپچۋ ءبىرىنشى تايمنىڭ سوڭىنا دەيىن ارەڭ شىدادى. ول الاڭ ۇستىندە ورىن الا بەرگەن تەكەتىرەستەر سالدارىنان بۇلشىق ەتتەرىن اۋىرتىپ العان بولىپ شىقتى. ءبىزدىڭ «ارقارلاردىڭ» ارقىراعان ويىندارى مۇنىمەن دە توقتامادى. ەڭ سوڭىندا ولار قورعاۋشى كريستيانۋ ساپۋنارۋدىڭ بەس بىردەي ءتىسىن ۇرىپ ءتۇسىردى. وسىنىڭ سالدارىنان ول ماتچ بىتكەن بويدا استانا اۋرۋحانالارىنىڭ بىرىنە جاتقىزىلدى. ءبىر عاجابى, ءبىزدىڭ ويىنشىلار تاراپىنان قانشاما كوپە-كورىنەۋ ءتارتىپ بۇزۋشىلىقتار جاسالىپ جاتقانىنا قاراماستان, پورتۋگال اربيترى مانۋەل جوزە سوۋزا تەك ەكى ويىنشىعا (دميتري شومكو, يسلامبەك قۋات) عانا «سارى قاعاز» كورسەتتى. ال فۋتبولدىڭ ەسەپ-قيسابىن تاسقاياقتاي قاعاتىن ستاتيستەر وسى ويىندا قازاقستان قۇراماسى مۇشەلەرىنىڭ 60 رەت فول جاساعانىن شىعارىپ بەردى. مۇندا 8 رەت قارسىلاستارىن شالىپ قۇلاتقان سەرگەي حيجنيچەنكو توپ باستاپتى. بۇدان ءارى يسلامبەك قۋات, ەلدوس احمەتوۆ جانە دميتري شومكو سىندى سپورتشىلاردىڭ ءاربىرى 7 رەتتەن ءتارتىپ بۇزعان. مۇنىڭ ەڭ قيىنى, بۇرىن بىزدە ويىن ءتارتىبىن بۇزۋعا كەيبىر جەكەلەگەن ويىنشىلار عانا قۇشتار بولسا, بۇل جولى وعان بۇكىل كوماندا مۇددەلى سياقتى بولىپ كورىندى. ەگەر وسىعان قاتىستى تاپسىرما جاتتىقتىرۋشىلار شتابىنان بەرىلىپ وتىرعان بولسا, جاعدايدىڭ ءتىپتى قيىن ەكەنىن مويىنداماسقا ءاددىمىز جوق. ال ءبىزدىڭ بۇلاي كۇدىك شاقىرۋىمىزعا نەگىز دە بار. بۇل ءبىر قاراعاندا, قۇرامانىڭ سوڭعى كەزدەردەگى وزىندىك داستۇرىنە اينالىپ كەلە جاتقانداي اسەر بەرەدى. وسى كەزدە ءبىزدىڭ كوز الدىمىزعا كوماندا تىزگىنىن تالعات بايسۋفينوۆ ۇستاعالى بەرگى وتكىزىلگەن بىرقاتار ماتچتار كەلبەتى كەلىپ وتىر. الدىمەن قىتايعا بارىپ وينادىق. ويىن جولداستىق سيپاتتا بولعانىنا قاراماستان, قازاقستاندىقتاردىڭ وتە دورەكى ويناعاندارىن الاڭ يەلەرى بىردەن ايتقان. بىراق ءبىز بۇل دابىلعا قۇلاق اسپادىق. كەلەسى جولى سونداي دوكىرلىك پولشانى قابىلداعان ويىندا كورىنىس تاپتى. سوڭىنان پولياكتار دا قىتايلاردىڭ ءسوزىن قايتالاپ, قازاقتاردىڭ فۋتبول ويناماي, دورەكىلىك جاساۋمەن اينالىسىپ كەتكەندەرىنە شاعىم جاسادى. بۇعان 6 ويىنشىمىزدىڭ ەسكەرتۋ العانى دا كۋا ەدى. بىراق اۋپىرىممەن قول جەتكەن تەڭ ويىننىڭ بۋىنا ماساتتانعان ءبىز وعان تاعى ءمان بەرە قويمادىق. چەرنوگوريادا تاعى 3 ويىنشىمىز «سارى قاعازبەن» اداقتالدى. وسى ماتچتاردىڭ بارىندە قازاقستاندىقتاردىڭ العان ەسكەرتۋلەرىنىڭ سانى قارسىلاستارىنان الدەقايدا اسىپ جاتتى. مىنە, سونىڭ سالدارىنان قازاقستان قۇراماسى ىرىكتەۋ ءتۋرنيرىنىڭ العاشقى 3 تۋرىنان كەيىن العان ەسكەرتۋلەرىنىڭ سانى جاعىنان (11) ليۋكسەمبۋرگ پەن اندوررا كوماندالارىنان كەيىنگى ءۇشىنشى پوزيتسياعا ورنالاستى. بىزدەن كەيىنگى ورىندا سان-مارينو كەلەدى. ءبىزدىڭ كورشىلەرىمىزدىڭ ءتۇرى وسىنداي. بۇعان قاراپ تۇرىپ, ويىنىمىزدىڭ الەۋەتى دە وسى ماڭدا ەكەنىن پايىمداي الامىز. ءسوز جوق, قازاقستان جانكۇيەرلەرى دە ءاربىر فۋتبول ماتچىن وزىندىك ءبىر مەرەكە, وزىنشە ءبىر سپەكتاكل رەتىندە كورەدى. سوندىقتان ستاديونعا كەلگەندە, تەلەديدار الدىندا وتىرعاندا, ەڭ الدىمەن فۋتبولدىڭ وزىنە ءتان ادەمى دە ورنەكتى ويىن كورگىلەرى كەلەدى. قازاقتا «اتىڭ شىقپاسا, جەر ورتە» دەگەن ءسوز بار. بۇل – كۇيىنگەننەن ايتىلعان شاراسىزدىق ءۋاجى. ال بىزگە ەلىمىز فۋتبولىنىڭ تاپ بۇلايشا اتى شىققانىنىڭ كەرەگى جوق. قۇداي اقى... سەرىك ءپىرنازار, «ەگەمەن قازاقستان»