لاتۆيامەن اراداعى قاشىقتىقتى "قىسقارتۋعا" تىرىسامىز - ۆاسيلەنكو

«قازاقستان مەن لاتۆيا اراسىن بايلانىستىرۋداعى ەڭ نەگىزگى كەدەرگى – ول اراقاشىقتىق. ماسەلەن, استانا مەن ريگا اراسىنداعى اراقاشىقتىق – 3700 شاقىرىم. بىراق ءبىز, سوعان قاراماستان, ەكى ەلدى الشاقتاتىپ تۇرعان وسى قاشىقتىقتى «قىسقارتۋعا» بارىنشا كۇش سالاتىن بولامىز».  قازاقستان مەن لاتۆيانىڭ ەكونوميكالىق جانە عىلىمي-تەحنيكالىق ىنتىماقتاستىق جونىندەگى ۇكىمەتارالىق كوميسسياسىنىڭ 6-شى وتىرىسى كەزىندە سويلەگەن سوزىندە ەلىمىزدىڭ سىرتقى ىستەر ءمينيسترىنىڭ ورىنباسارى رومان ۆاسيلەنكو وسىلاي دەدى. وتىرىسقا رومان ۆاسيلەنكومەن بىرگە لاتۆيا رەسپۋبليكاسىنىڭ بايلانىس ءمينيسترى ۋلديس اۋگۋليس تەڭ توراعالىق ەتتى. اۋقىمدى ماسەلەلەر كوتەرىلگەن جيىن جۇمىسىنا ينۆەستيتسيالىق كليماتتى جاقسارتۋ باعىتىندا قىزمەت اتقارىپ جاتقان مەملەكەتتىك ۇيىمدار مەن ىسكەرلىك قۇرىلىمداردىڭ وكىلدەرى قاتىستى. ال لاتۆيادان كەلگەن دەلەگاتسيانىڭ قۇرامىندا ەكونوميكا, ءبىلىم جانە عىلىم, قورشاعان ورتانى قورعاۋ مينيسترلىكتەرىنىڭ جوعارى لاۋازىمدى وكىلدەرى, سونىمەن قاتار, وسى ەلدىڭ بىرقاتار كاسىپكەرلەرى بولدى. وتىرىس بارىسىندا تاراپتار كولىك جانە ترانزيت, تۋريزم, اۋىل شارۋاشىلىعى, ءبىلىم جانە عىلىم, «جاسىل» ەكونوميكا سالالارىنداعى ەكىجاقتى ىنتىماقتاستىق, سونداي-اق, لاتۆيانىڭ «ەكسپو-2017» حالىقارالىق مامانداندىرىلعان كورمەسىنە قاتىسۋ ماسەلەلەرىن تالقىلادى. جيىن سوڭىندا 6-شى ۇكىمەتارالىق كوميسسيانىڭ حاتتاماسىنا قول قويىلدى. قول قويۋ راسىمىنەن كەيىن رومان ۆاسيلەنكو مەن ۋلديس اۋگۋليس قىسقاشا مالىمدەمە جاسادى, سونىمەن قاتار, جۋرناليستەردىڭ ساۋالدارىنا جاۋاپ بەردى. ر.ۆاسيلەنكو ۇكىمەتارالىق كوميسسيا قۇرامىنداعى قوس تاراپ مۇشەلەرىنە اۋقىمدى جۇمىستارى ءۇشىن العىسىن ءبىلدىردى. «ءبىز وتىرىس بارىسىندا كوپ ءجايتتى تالقىلاۋعا مۇمكىندىك الدىق. كوميسسيانىڭ كۇن تارتىبىنە 11 تارماقتان تۇراتىن ماسەلەلەلەر قويىلدى. كەيبىر تارماقتار ءوز ىشىندە 5 تارماقشانىڭ باسىن بىرىكتىردى. ولار كولىكتىڭ بارلىق تۇرىنە قاتىستى ماسەلەلەردى قامتيدى. ءبىزدىڭ ارىپتەستىك الەۋەتىمىز وتە جوعارى. ارينە, ەكونوميكالىق ىقپالداستىقتى دامىتۋعا كەدەرگى كەلتىرىپ وتىرعان فاكتورلار ءالى دە كەزدەسەدى. ءبىز وتىرىس اياسىندا سولاردى شەشۋدىڭ باعىت-باعدارىن ايقىندادىق», – دەدى ر. ۆاسيلەنكو. سونىمەن قاتار, ول لاتۆيانىڭ تەڭىز پورتتارى ارقىلى قازاقستاننىڭ ەكسپورتتىق جۇكتەرىن باتىس نارىقتارىنا جەتكىزۋگە جول اشىلاتىنىن, وسى ورايدا بۇل ەلدى ستراتەگيالىق سەرىكتەس رەتىندە ەرەكشە باعالايتىنىن جەتكىزدى. «سونداي-اق, كەرى باعىتتا ەۋرازيالىق ەكونوميكالىق وداق ەلدەرىنە, ورتالىق ازيا مەملەكەتتەرىنە, قحر-عا, سونىمەن قاتار, ازيانىڭ باسقا دا ەلدەرىنە جۇكتەردى جەتكىزۋدە بۇل ارىپتەستىكتىڭ الار ورنى ايرىقشا. قازىرگى تاڭدا ەۋرازيالىق ەكونوميكالىق وداقتىڭ 170 ملن تۇتىنۋشىنى قامتيتىن بىرىڭعاي نارىعىنا شىعۋ ءۇشىن بارلىق جاعداي جاسالعان. قازاقستان لاتۆيا بيزنەسىنىڭ ەل ەكونوميكاسىنىڭ دامۋىنا قاتىسۋىنا مۇددەلىلىك تانىتىپ وتىر. قازىردىڭ وزىندە قازاقستاندا 60-قا جۋىق بىرلەسكەن كاسىپورىننىڭ تەتىگى ىسكە قوسىلدى», – دەدى ول.  بۇعان قوسا, ر.ۆاسيلەنكو ۇكىمەتارالىق كوميسسيانىڭ 6-شى وتىرىسىندا قول قويىلعان حاتتامادا ناقتى اتقارىلۋى ءتيىس ماسەلەلەر كورسەتىلگەنىن جەتكىزدى. «لاتۆيانىڭ «ۆەنتسپيلس» پورتىندا ەكى ەلدىڭ كاسىپورىندارى بىرلەسىپ ىسكە قوسقان استىق تەرمينالى جۇمىس ىستەپ تۇر. بۇل تەرمينالدىڭ جىل سايىن 2,5 ملن تونناداي استىق وتكىزەتىندەي قۋاتى بار. ازىرگە تەرمينال ارقىلى جىلىنا 500 توننادان 700 تونناعا دەيىن استىق تاسىمالدانادى. ءبىزدىڭ الدىمىزدا تۇرعان ەندىگى مىندەت – ونىڭ قۋاتى مەن الەۋەتىن تولىقتاي پايدالانۋ.»,– دەدى ر. ۆاسيلەنكو. ال ۋلديس اۋگۋليس ۇكىمەتارالىق كوميسسيا بۇعان دەيىن كوپتەگەن جۇمىستىڭ باسىن قايىرعانىنا, ال بۇل وتىرىس الدا اتقارىلار ءىس-شارالاردى ايقىنداۋعا سەپ بولعانىنا توقتالدى. «مەن قىزمەت ەتەتىن سالا – ول كولىك جانە ترانزيت. سول سەبەپتى, كولىكتىك-لوگيستيكالىق, ترانزيتتىك سالالارداعى ىنتىماقتاستىقتى دامىتىپ جاتىرمىز», – دەدى ول.   ءلايلا ەدىلقىزى