تەرميندەر توڭىرەگىندەگى تۇيتكىلدەر تالقىلاندى

جاقىندا مادەنيەت جانە سپورت مينيسترلىگى ەلىمىزدەگى تىلدەردى قولدانۋ مەن دامىتۋدىڭ 2011-2020 جىلدارعا ارنالعان مەملەكەتتىك باعدارلاماسىن ىسكە اسىرۋ جانە لينگۆيستيكالىق ساراپتاما ساپاسىن ارتتىرۋعا باعىتتالعان شارالار جونىندەگى ىنتىماقتاستىق تۋرالى مەموراندۋمى اياسىندا زاڭناما ماتىندەرىنىڭ مەملەكەتتىك تىلدەگى نۇسقالارىنىڭ جانە ءىس قاعازدارىن جۇرگىزۋدىڭ ساپاسىن جاقسارتۋ, سالالىق تەرميندەردى بىرىزدەندىرۋ ماقساتىندا «زاڭناما ماتىندەرى: تەڭتۇپ نۇسقالىقتى قامتاماسىز ەتۋ جانە تەرميندەردى بىرىزدەندىرۋ ماسەلەلەرى» تاقىرىبىندا رەسپۋبليكالىق ادىستەمەلىك سەمينار وتكىزدى. سەميناردا پرەزيدەنت اكىمشىلىگى, پرەمەر-ءمينيستردىڭ كەڭسەسى, پارلامەنت سەناتى مەن ءماجىلىسى اپپاراتتارىنىڭ رەداكتسيالاۋ بولىمدەرىنىڭ, سونداي-اق, قازاقستان رەسپۋبليكاسى زاڭناما ينستيتۋتى لينگۆيستيكالىق ورتالىعى قىزمەت­كەرلەرى وسى سالاداعى وزەكتى ءما­سەلەلەر بو­يىنشا ءوز ويلارىن ءبىل­دىرىپ, تاجىريبەلەرىمەن ءبولىستى. جانە دە ءىس-شاراعا ورتالىق جانە جەرگىلىكتى اتقارۋشى ورگانداردىڭ زاڭدار مەن باسقا دا نورماتيۆتىك-قۇقىقتىق اكتى­لەر جوبالارىنىڭ مەملەكەتتىك تىلدەگى نۇس­قالارىن ازىرلەۋگە جانە رەداكتسيالاۋعا جاۋاپتى ماماندارى, ۇلتتىق كومپانيالار مەن اكتسيونەرلىك قوعامداردىڭ مەملەكەتتىك تىلدە ءىس قاعازدارىن جۇرگىزۋگە جاۋاپتى قىزمەتكەرلەرى قاتىسقانىن دا ايتا كەتسەك دەيمىز. ساراپشىلار مەن لينگۆيستەر قازىرگى ۋاقىت­تاعى قاتەلەردى تىزبەلەپ, كەي اۋدار­مالاردىڭ قيسىنعا كەلمەيتىنىن العا تارتتى. قاتىسۋشىلار قوردالانعان ماسەلەنى شەشۋ ءۇشىن ءتىل ماماندارى جۇمىلىپ اۋدار­ماعا قاتىستى ورتاق مامىلەگە كەلۋى ءتيىس دەگەن پىكىرلەرىن ءبىلدىردى. وسى ماق­ساتتا بەرتىندە مادەنيەت جانە سپورت مينيسترلىگىنىڭ مۇرىندىق بولۋىمەن تەرمينكوم.كz سايتى اشىلعان بولاتىن. بۇل پورتالدا رەسمي بەكىتىلگەن تەرميندەر تىزبەگىمەن تانىسا الاسىز. – بۇكىل تەرميندەردىڭ تىزبەسى الفاۆيتتىك رەتپەن ءبىزدىڭ سايتىمىزدا ورنالاسقان. ونى كەز كەلگەن ادام سول سايتىمىزعا كىرىپ, كەز كەلگەن تەرميننىڭ دۇرىستىعىن, بۇرىس­تىعىن كورە الادى. ويتكەنى, قازىرگى كەز­دەگى تەرميندەردىڭ دۇرىس نۇسقاسى جانە بۇرىس نۇسقاسى جازىلعان, – دەدى سەمي­ناردا سويلەگەن مادەنيەت جانە سپورت مي­نيسترلىگى تىلدەردى دامىتۋ جانە قوعام­دىق-ساياسي جۇمىس كوميتەتى توراعاسىنىڭ ورىنباسارى عالىمجان مەلدەشوۆ. – تەرميندەردى بىرىزدەندىرۋ ماسەلەسى ءبىر كۇندە شەشىلىپ كەتەدى دەپ ايتا المايمىن. بۇگىنگى جيىنعا قاتىسۋشىلار ءوز ءىسىنىڭ ماماندارى. بۇل كۇردەلى ماسەلە. اسىرەسە, زاڭناما سالاسىنداعى تەرميندەردى بىرىزدەندىرۋ ۇلكەن جاۋاپكەرشىلىك جۇكتەپ, اسقان ساۋاتتىلىقتى تالاپ ەتەدى. مادەنيەت جانە سپورت مينيسترلىگىنىڭ جانىندا تەرمينولوگيالىق كوميسسيا جۇمىس جاسايدى. بۇگىنگى سەمينار جۇمىسىنا قاتىسۋشى ماماندار قاجەت دەگەن تەرميندەرگە بايلانىستى ويلارىن ءبىلدىرىپ, ءبىر نۇسقاسىن جاساپ بىزگە شەشىم شىعارۋعا ۇسىنادى, – دەدى ول قورىتىندى سوزىندە.