نازارباەۆ پەن پۋتين تاريحي ءفيلمدى تاماشالادى

قازاقستان پرەزيدەنتى «جيىرما سەگىز پانفيلوۆشى» كينوفيلمىنىڭ كورسەتىلىمىن تاماشالادى, دەپ حابارلادى قازاقستان پرەزيدەنتىنىڭ ءباسپاسوز قىزمەتى. رەسەي پرەزيدەنتىنىڭ قازاقستانعا جۇمىس ساپارى نۇرسۇلتان نازارباەۆ پەن ۆلاديمير ءپۋتيننىڭ «جيىرما سەگىز پانفيلوۆشى» ءفيلمىن بىرگە كورۋىمەن اياقتالدى. كينوتۋىندى ا.بەكتىڭ «ۆولو­كو­لامسك تاس جولى» شىعارماسى نەگىزىندە تۇسىرىلگەن. ونىڭ وقيعالارى پانفيلوۆ ديۆيزياسى اتقىشتار باتالونىنىڭ كومانديرى باۋىرجان مومىش ۇلىنىڭ اتىنان اڭگىمەلەنەدى. مەملەكەتتەر باسشىلارى ال­ماتىدا قۇرىلعان, جاۋ تانكىلەرىنىڭ ماسكەۋگە باراتىن جولىن بوگەگەن ديۆي­زيانىڭ ەرلىگى كەلەر ۇرپاق ەسىندە ءاردايىم قالۋعا ءتيىس ەكەنىن اتاپ ءوتتى. رەسەيدىڭ مادەنيەت ءمينيسترى ۆ.مەدينسكي ەكى ەل باسشىلارىنا قازاق, ورىس, قىرعىز جانە ۋكراين جاۋىن­­گەرلەرىنەن قۇرالعان ديۆيزيا­نىڭ باتىرلىعى مەن قاھارماندىعى تۋرالى اڭگىمەلەدى. – ەرلىك كورسەتكەن ديۆيزيانىڭ ەرەكشەلىگى ونىڭ قۇرامىندا ەكەندى­گىن اتاپ ايتۋ كەرەك. ول كادرلىق ءاس­كەريلەردەن ەمەس, اسكەرگە شاقى­رىلعان قاراپايىم ازاماتتاردان جاساقتالدى, ولار سوعان دەيىن بۇكىل ەۋروپانى باسىپ وتكەن كاسىبي تانك قۇرامالارىن توقتاتا الدى, – دەدى ۆ.مەدينسكي. فيلمدەگى وقيعا 1941 جىلدىڭ كۇزىندە بولعان. جازباشا دەرەك بويىنشا 1941 جىلدىڭ 16 قاراشاسىندا گەنەرال ي.ۆ.پانفيلوۆ قولباسشىلىق ەتكەن 316-شى اتقىشتار ديۆيزياسىنىڭ 28 ساربازى دۋبوسەكوۆو رازەزىن قورعاپ, ماسكەۋگە بەت العان نەمىستىڭ تانك باتالونىن توقتاتادى. سيۋجەت تولىعىمەن كەڭەس ساربازدارىنىڭ ەرلىگىنە ارنالعان. قىسقى كورىنىستەر سانكت-پەتەربۋرگ پەن يۆانوۆو توڭىرەگىندە تۇسىرىلگەن. سوڭعى كادرلاردا الماتىداعى 28 گۆاردياشى-پانفيلوۆشىلار اتىنداعى ساياباق كورسەتىلەدى.