رەسەيدەن قازاقستانعا كەلەتىن تۋريستەر سانى كوبەيۋدە

«قازاقستانعا رەسەيدەن كەلەتىن تۋريستەر سانى جىل وتكەن سايىن كوبەيىپ كەلەدى. ماسەلەن, 2015 جىلى ەلىمىز رەسەيلىك ازاماتتار ءۇشىن سىرتقا شىعاتىن تۋريزم بويىنشا تانىمالدىلىعى جاعىنان  4-ءشى ورىنعا شىقتى. قازاقستانعا 3 ملن رەسەيلىكتىڭ كەلىپ, كورىكتى جەرلەرىمىزبەن تانىسىپ قايتۋى – سونىڭ ايعاعى. قوناقتار ەڭ كوپ تىنىعاتىن وڭىرلەر  – بۋراباي شيپاجاي ايماعى, پاۆلودار وبلىسىنداعى باياناۋىل ۇلتتىق ساياباعى, بالقاش جانە الاكول كولدەرى, سونداي-اق, شىمبۇلاق تاۋ-شاڭعى شيپاجايى». قازاقستان مەن رەسەي فەدەراتسياسىنىڭ XIII وڭىرارالىق ىنتىماقتاستىق فورۋمى اياسىندا «قازاقستان رەسپۋبليكاسى مەن رەسەي فەدەراتسياسى اراسىنداعى ءتۋريزمدى دامىتۋدىڭ جاڭا مۇمكىندىكتەرى» تاقىرىبىندا وتكەن پانەلدىك سەسسيا كەزىندە ەلىمىزدىڭ ينۆەستيتسيا جانە دامۋ ۆيتسە-ءمينيسترى تيمۋر توقتاباەۆ وسىلاي دەدى. ال رەسەي فەدەراتسياسى مادەنيەت مينيسترلىگىنىڭ تۋريزم بويىنشا فەدەرالدىق اگەنتتىگىنىڭ جەتەكشىسى ولەگ سافونوۆ روستۋريزم مەكەمەسى رەسەيلىك-قازاقستاندىق قارىم-قاتىناس مۇمكىندىكتەرىن بارىنشا كەڭەيتۋ باعىتىنداعى ءىس-شارالاردى جان-جاقتى اتقارىپ جاتقانىن جەتكىزدى. ونىڭ ايتۋىنشا, تمد-عا مۇشە مەملەكەتتەردىڭ تۋريزم جونىندەگى كەڭەسىنىڭ جەلىسى بويىنشا تمد-نىڭ ورتاق تۋريستىك كەڭىستىگىن قۇرۋ باعىتىنداعى جۇمىستار جۇيەلى جۇرگىزىلىپ, وعان قازاقستان دا بەلسەندى اتسالىسىپ جاتىر ەكەن.  «فورۋم اياسىندا «قازاقستان مەن رەسەي اراسىندا ءتۋريزمدى دامىتۋدىڭ جاڭا مۇمكىندىكتەرى» تاقىرىبىندا پانەلدىك سەسسيا وتىرىسىن وتكىزۋ – ەلدەرىمىزدىڭ الەۋمەتتىك-ەكونوميكالىق قاتىناستارى قۇرىلىمىن قالىپتاستىرۋدا, حالىققا ارنالعان مادەني-تانىمدىق جانە ساۋىقتىرۋ باعدارلامالارىن جۇزەگە اسىرۋدا تۋريزم يندۋسترياسىنىڭ قانشالىقتى رولگە يە ەكەندىگىنە ايقىن دالەل», دەدى ولەگ سافونوۆ. ءلايلا ەدىلقىزى