قازاقستان مەن رەسەيدىڭ تۋريستىك مۇمكىندىكتەرى تالقىلاندى

قازاقستان رەسپۋبليكاسى مەن رەسەي فەدەراتسياسىنىڭ XIII وڭىرارالىق ىنتىماقتاستىق فورۋمى اياسىندا «قازاقستان رەسپۋبليكاسى مەن رەسەي فەدەراتسياسى اراسىنداعى ءتۋريزمدى دامىتۋدىڭ جاڭا مۇمكىندىكتەرى» تاقىرىبىندا پانەلدىك سەسسيا ءوتتى, دەپ حابارلايدى «ەگەمەن قازاقستان» ءتىلشىسى. سەسسيا بارىسىندا تاراپتار تۋريستىك نارىقتى دامىتۋ سالاسىنداعى يدەيالار جانە جەتىستىكتەر جايلى پىكىر الماسىپ, ەۋرازيالىق كەڭىستىكتەگى ىقپالداستىق ۇدەرىستەرىن جانداندىرۋداعى ەكى ەلدىڭ وسى سالاداعى ءوزارا بايلانىسى مەن مۇمكىندىكتەرىن تالقىلادى. قازاقستاندىق تاراپ حالىقارالىق «ەكسپو-2017» مامانداندىرىلىعان كورمەسى مەن استانا قالاسى جانە ماڭعىستاۋ وبلىسىنىڭ تۋريستىك الەۋەتىن تانىستىردى. سەسسيا جۇمىسىن اشقان ەلىمىزدىڭ «اتامەكەن» ۇلتتىق كاسىپكەرلەر پالاتاسى باسقارما توراعاسىنىڭ ورىنباسارى يۋليا ياكۋپباەۆا قازاقستاندىق تۋريزم سالاسىن دامىتۋ جانە قازاقستان مەن رەسەي فەدەراتسياسى اراسىندا وسى سالانى وركەندەتۋدەگى جوعارى مۇمكىندىكتەر جايىنا توقتالدى. «ءبىز كوزدەپ وتىرعان ماسەلەلەر – ولار جول مەن كولىك قولجەتىمدىلىگى, قوناق ۇيلەردىڭ, اسىرەسە وڭىرلەردەگى قوناق ۇيلەر قىزمەتىنىڭ ساپاسى, كورىكتى ورىنداردى اقپاراتتىق جاعىنان قولداۋ. بۇل ماسەلەلەر ەكى ەل ءۇشىن دە وزەكتى دەپ ويلايمىن. ءبىزدىڭ تۋريستىك سالاداعى ىنتىماقتاستىعىمىزدىڭ الەۋەتى قۋاتتى. الداعى ۋاقىتتا ترانسشەكارالىق باعدارلار تەتىگىن جاساۋعا, تۇراقتى اۆيارەيستەر مەن تەمىر جول قاتىناسى اۋقىمىن كەڭەيتۋ مەن چارتەرلىك رەيستەردى ىسكە قوسۋ ارقىلى كولىك قولجەتىمدىلىگىن ارتتىرۋعا دايىنبىز», دەدى ول. سونىمەن قاتار, يۋ.ياكۋپباەۆا قازىرگى تاڭدا ەكى ەلدىڭ الدىندا تۋرونىمدەردىڭ ساپاسىن كوتەرۋ, تۋركومپانيالار مەن قوناق ۇيلەردىڭ, تاماقتانۋ ورىندارىنىڭ, اۋە تاسىمالداۋشىلارىنىڭ, كولىك كومپانيالارىنىڭ كۇشىن بىرىكتىرۋ مىندەتتەرى تۇرعانىن اتاپ ءوتتى. ءلايلا ەدىلقىزى